ປະທານສະພາແຫ່ງຊາດ ຕ້ອນຮັບນາຍົກລັດຖະມົນຕີ ແຫ່ງ ລາຊະອານາຈັກ ກຳປູເຈຍ
13/12/2018

(ສພຊ) ໃນຕອນບ່າຍວັນທີ 5 ທັນວາຜ່ານມາ ທີ່ສະພາແຫ່ງຊາດ, ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ຕ້ອນຮັບການເຂົ້າພົບປະຢ້ຽມຢາມຂອງ ສົມເດັດ ອັກຄະມະຫາ ເສນາ ບໍດີ ເຕໂຈ ຮຸນແຊນ ນາຍົກລັດຖະມົນຕີ ແຫ່ງ ລາຊະອານາຈັກກໍາປູເຈຍ ພ້ອມດ້ວຍຄະນະ ໃນ ໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ລະຫວ່າງວັນທີ 5-6 ທັນວາ 2018.

         ໃນການພົບປະຢ້ຽມຢາມ, ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບອັນອົບ ອຸ່ນມາຍັງ ສົມເດັດ ອັກຄະມະຫາ ເສນາບໍດີ ເຕໂຈ ຮຸນແຊນ ທີ່ເດີນທາງມາຢ້ຽມຢາມ ສປປລາວ ຢ່າງເປັນທາງການ; ເຊິ່ງເປັນການປະກອບສ່ວນຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີຖານບ້ານໃກ້ເຮືອນຄຽງ ທີ່ມີມາແຕ່ດົນນານລະຫວ່າງສອງປະເທດລາວ-ກໍາປູເຈຍໃຫ້ແໜ້ນແຟ້ນຍິ່ງໆຂຶ້ນ; ພ້ອມກັນນັ້ນ, ທ່ານປະທານສະພາແຫ່ງຊາດລາວ ໄດ້ສະແດງຄວາມຊົມເຊີຍຕໍ່ໄຊຊະນະອັນຈົບງາມຂອງພັກປະຊາຊົນກໍາປູເຈຍໃນການເລືອກຕັ້ງສະມາຊິກສະພາແຫ່ງຊາດຊຸດທີ 6 ທີ່ຜ່ານມາ ແລະ ຊົມເຊີຍ ສົມເດັດ ອັກຄະມະຫາ ເສນາບໍດີ ເຕໂຈ ຮຸນແຊນ ທີ່ໄດ້ຖືກແຕ່ງຕັ້ງເປັນນາຍົກລັດຖະມົນຕີ ອີກຄັ້ງໃຫມ່; ພ້ອມທັງໄດ້ຊົມເຊີຍຕໍ່ຜົນສໍາເລັດຂອງການພົບປະສອງຝ່າຍກັບທ່ານ ທອງລຸນ ສີສຸລິດ ນາຍົກລັດຖະມົນຕີ ເຊິ່ງສາມາດຕົກລົງຫລາຍບັນຫາທີ່ສໍາຄັນ ແລະ ລົງນາມຫລາຍເອກະສານຮ່ວມກັນ; ທ່ານ ນາງ ປານີ ຢາທໍ່ຕູ້ ກໍໄດ້ແຈ້ງສະພາບການຮ່ວມມືລະຫວ່າງສອງອົງການນິຕິບັນຍັດ ເຊິ່ງໃນໄລຍະຜ່ານມາ ທັງສອງສະພາແຫ່ງຊາດ ໄດ້ມີການພົວພັນຮ່ວມມືອັນດີຢ່າງສະໜິດແຫນ້ນ ແລະ ຕໍ່ເນື່ອງ ທັງໃນຂອບການຮ່ວມມືສອງຝ່າຍ ແລະ ຫລາຍຝ່າຍ ເປັນຕົ້ນການແລກປ່ຽນຄະນະຜູ້ແທນຂັ້ນສູງ ຕະຫລອດຮອດຂັ້ນກໍາມາທິການ, ເລຂາທິການ, ຄະນະມິດຕະພາບ ແລະ ວິຊາການນໍາກັນ, ການສະໜັບສະໜູນໃຫ້ລັດຖະບານຂອງສອງປະເທດ ຈັດຕັ້ງປະຕິບັດຕາມບັນດາສັນຍາ ແລະ ສົນທິສັນຍາ ລະຫວ່າງສອງຝ່າຍ, ການຮ່ວມມືສະໜັບສະໜູນເຊິ່ງກັນ ແລະ ກັນໃນເວທີລັດຖະສະພາພາກພື້ນ ແລະ ສາກົນ ເພື່ອສັນຕິພາບ, ມິດຕະພາບ ແລະ ການຮ່ວມມືເພື່ອການພັດທະນາ.

ສົມເດັດ ອັກຄະມະຫາ ເສນາບໍດີ ເຕໂຈ ຮຸນແຊນ ໄດ້ສະແດງຄວາມຂອບໃຈຕໍ່ການຕ້ອນ ຮັບຢ່າງອົບອຸ່ນ ແລະ ຕີລາຄາສູງຕໍ່ສາຍພົວພັນມິດຕະພາບຖານບ້ານໃກ້ເຮືອນຄຽງທີ່ມີມາແຕ່ດົນ ນານໃຫ້ດີຍິ່ງຂຶ້ນ, ພ້ອມທັງໄດ້ໃຫ້ຮູ້ເຖິງລະບົບ ແລະ ສະພາບການເລືອກຕັ້ງຂອງກໍາປູເຈຍແຕ່ອະ ດີດຈົນເຖິງປັດຈຸບັນ ແລະ ແຈ້ງຜົນການພົບປະກັບທ່ານນາຍົກລັດຖະມົນຕີໃຫ້ຊາບ ເປັນຕົ້ນການ ແກ້ໄຂບັນຫາຊາຍແດນ ເພື່ອໃຫ້ຊາຍແດນລະຫວ່າງລາວ-ກໍາປູເຈຍ ເປັນຊາຍແດນແຫ່ງມິດຕະ ພາບ, ສັນຕິພາບ ແລະ ການຮ່ວມມື.

ລາວ-ກໍາປູເຈຍ ສ້າງຕັ້ງສາຍພົວພັນການທູດນໍາກັນຕັ້ງແຕ່ວັນທີ 15 ມິຖຸນາ 1956.

(ສົມນຶກ ແກ້ວໄຊຍະຈັກ)