ຮອງປະທານສະພາແຫ່ງຊາດ ຕ້ອນຮັບຜູ້ແທນອົງການກວດສອບແຫ່ງລັດ ແລະ ອົງການລິເລີ່ມເພື່ອການພັດທະນາ
07/12/2018

(ສພຊ) ວັນທີ 5 ທັນວາ 2018 ທີ່ຫ້ອງການເລຂາທິການສະພາແຫ່ງຊາດ ທ່ານ ບຸນປອນ ວັນນະຈິດ ຮອງອົງການກວດສອບແຫ່ງລັດ ແລະ ທ່ານ ກາມາ ເທັນຊິນ ຜູ້ຈັດການຈາກອົງການລິ ເລີ່ມເພື່ອການພັດ ທະນາ IDI ພ້ອມດ້ວຍຄະນະເຝິກອົບຮົມຈາກອາຊຽນຊາຍ (ASEANSAI) ໄດ້ເຂົ້າຢ້ຽມຂໍ່ານັບທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ ເນື່ອງໃນໂອກາດການມາເຝິກອົບຮົມພາຍໃຕ້ຫົວຂໍ້  ການກວດ ສອບການເງິນພາຍໃຕ້ແຜນງານຮ່ວມມືຂອງ DI-ASEANSAI ໃນລະຫວ່າງວັນທີ 3-7 ທັນວາ 2018 ເຊິ່ງປະກອບມີນັກເຝິກອົບຮົມຈາກສະຖາບັນກວດສອບສູງສຸດອາຊຽນຊາຍ 8 ປະເທດ ເຂົ້າຮ່ວມມີ 34 ທ່ານ ໃນນັ້ນ, ນັກກວດສອບອົງການກວດສອບແຫ່ງລັດ ສປປລາວ ເຂົ້າຮ່ວມຈຳນວນ 8 ທ່ານ ແລະ ມີບັນດາ ຄູເຝິກເຂົ້າຮ່ວມຈຳນວນ 6 ທ່ານ, ຈາກບັນດາປະເທດ: ຟິລະປິນ 2 ທ່ານ, ມາເລເຊຍ 1 ທ່ານ, ອິນໂດເນເຊຍ 1 ທ່ານ ແລະອົງການລິເລີ່ມເພື່ອການພັດທະນາ (IDI)  1 ທ່ານ.  ການເຝິກອົບຮົມໃນຄັ້ງນີ້ ແມ່ນໜຶ່ງໃນກິດ ຈະກຳໂຄງການຮ່ວມມືລະຫວ່າງ IDI-ASEANSAI ທີ່ໄດ້ເຫັນດີເປັນເອກະພາບກັນໃນກອງປະຊຸມ ທີ່ໄດ້ຈັດ ຂຶ້ນຢູ່ທີ່ເມືອງມາລາກາ ປະເທດມາເລເຊຍ ລະຫວ່າງວັນທີ 26-27 ກໍລະກົດ 2018 ທີ່ຜ່ານມາ ເຊິ່ງເປັນໂຄງ ການສ້າງຄວາມເຂັ້ມແຂງ ໃຫ້ກັບວຽກງານກວດສອບພາກລັດຂອງປະເທດສະມາຊິກອາຊຽນຊາຍ ໃນການ ຈັດຕັ້ງປະຕິບັດກວດສອບດ້ານການເງິນ ບົນພື້ນຖານການນຳໃຊ້ມາດຕະການສາກົນ (ISSI on Fnancial Audit). ນອກນັ້ນ, ກິດຈະກຳການເຝິກອົບຮົມຄັ້ງນີ ຖືວ່າເປັນຂີດຫມາຍອັນສຳຄັນ ທີ່ສ່ອງແສງ ໃຫ້ເຫັນເຖິງ ເຈດຈຳນົງ, ຄວາມພະຍາຍາມ, ຄວາມສາມັກຄີ, ຄວາມຕັດສິນໃຈຮ່ວມມືຂອງບັນດາສະຖາບັນ ກວດສອບສູງ ສຸດອາຊຽນຊາຍ ໃນການຈັດຕັ້ງປະຕິບັດມາດຖານການກວດສອບສາກົນ ແລະ ປະຕິບັດຕາມ ແຜນຍຸດທະ ສາດຂອງອາຊຽນຊາຍ 2018-2021 ທີ່ກຳນົດໄວ້.

ໃນໂອກາດດັ່ງກ່າວ ທ່ານ ບຸນປອນ ບຸດຕະນະວົງ ໄດ້ສະແດງຊົມເຊີຍ ແລະ ຕີລາຄາສູງ ຕໍ່ການເຝິກອົບຮົມຍົກລະດັບຂີດຄວາມສາມາດຂອງນັກກວດສອບ ບັນດາປະເທດອາຊຽນດ້ວຍກັນ ເຊິ່ງເປັນ ໂອກາດດີ ສະພາແຫ່ງຊາດຍາມໄດກໍໃຫ້ການຕິດຕາມ ແລະ ສ້າງເງື່ອນໄຂໃຫ້ມີຄວາມສະດວກໃກ້ສິດ ຕິແທດອົງການກວດສອບແຫ່ງລັດ ໃຫ້ເຄື່ອນໄຫວວຽກງານຂອງຕົນຢ່າງເຕັມຂີດຄວາມສາມາດ, ສະພາແຫ່ງ ຊາດເປັນໂຕແທນຂອງປະຊາຊົນ ດັ່ງນັ້ນ, ງົບປະມານແຫ່ງລັດທຸກເມັດເງິນ ແມ່ນໄດ້ຈາກການເສຍພາສີ-ອາກອນຂອງປະຊາຊົນ ສະນັ້ນ, ການນຳໃຊ້ເງິນຂອງປະຊາຊົນ ເພື່ອເຂົ້າໃນການພັດທະນາປະເທດຊາດ ພັດທະນາເສດຖະກິດ-ສັງຄົມ ຕ້ອງມີຄວາມໂປ່ງໃສ ແລະ ຖືກເປົ້າຫມາຍ ເພື່ອບໍ່ໃຫ້ພາສີ-ອາກອນທີ່ປະຊາ ຊົນເສຍໄປເປັນປະໂຫຍດຂອງສ່ວນບຸກຄົນ  ຫລື ນຳໃຊ້ບໍ່ຖືກເປົ້າຫມາຍ. ສະພາແຫ່ງຊາດແມ່ນອາໄສອົງ ການກວດສອບແຫ່ງລັດ ເປັນອົງການຕິດຕາມກວດກາ ກວດສອບຊ່ວຍ  ແລະ ທາງສະພາແຫ່ງຊາດ ມີຄວາມເຊື່ອຫມັ້ນທີ່ສຸດ ໃນຂັ້ນຕໍ່ໄປໃນການພົວພັນການຮ່ວມມືຊ່ວຍເຫລືອບັນດາປະເທດອາຊຽນດ້ວຍກັນ (ASEANSAI)  ຈະແໜ້ນແຟ້ນ ແລະ ສ້າງຄວາມເຂັມແຂງໃຫ້ນັກກວດສອບຂອງລາວນັບມື້ນັບດີຂຶ້ນ.

(ສົມສັກ ສຸບັນດິດ)