ກອງປະຊຸມຄົບຄະນະຂອງກໍາມາທິການຍຸຕິທໍາ ປະຈໍາປີ 2017
20/10/2017

ລະຫວ່າງວັນທີ 5-6 ຕຸລາ 2017 ທີ່ສູນຮ່ວມມືສາກົນ ແລະ ການປະຊຸມ (ICTC) ໄດ້ຈັດກອງປະຊຸມຄົບຄະນະຂອງກໍາມາທິການຍຸຕິທໍາ ປະຈໍາປີ 2017; ພາຍໃຕ້ການເປັນປະທານຂອງທ່ານ ນາງ ບົວຄໍາ ທິບພະວົງ ກໍາມະການຄະນະປະຈໍາ, ປະທານກໍາມາທິການຍຸຕິທໍາສະພາແຫ່ງຊາດ; ໃຫ້ກຽດເຂົ້າຮ່ວມ ແລະ ໂອ້ລົມໂດຍທ່ານ ນາງ ສີໄສ ລືເດມູນສອນ ຮອງປະທານຄະນະປະຈໍາ, ຮອງປະທານສະພາແຫ່ງຊາດ ຜູ້ຊີ້ນໍາຂົງເຂດວຽກງານຍຸຕິທໍາ; ມີຮອງລັດຖະມົນຕີກະຊວງຍຸຕິທໍາ, ຮອງລັດຖະມົນຕີກະຊວງປ້ອງກັນຄວາມສະຫງົບ, ຮອງປະທານກໍາມາທິຍຸຕິທໍາ, ຮອງປະທານສານປະຊາຊົນສູງສຸດ, ຮອງອົງການໄອຍະການປະຊາຊົນສູງສຸດ, ສະມາຊິກສະພາແຫ່ງຊາດທີ່ເປັນກໍາມະການກໍາມາທິການຍຸຕິທໍາ, ຮອງເລຂາທິການສະພາແຫ່ງຊາດ ແລະ ຫົວໜ້າ-ຮອງຫົວໜ້າກົມທີ່ກ່ຽວຂ້ອງພາຍໃນສະພາແຫ່ງຊາດເຂົ້າຮ່ວມ.

        ກອງປະຊຸມໃນຄັ້ງນີ້, ກໍເພື່ອເປັນການສະຫລຸບຕີລາຄາການຈັດຕັ້ງປະຕິບັດພາລະບົດບາດການເປັນເສນາທິການໃຫ້ແກ່ສະພາແຫ່ງຊາດ, ການຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ຂອງອົງການລັດກ່ຽວຂ້ອງ ທັງເປັນກອງປະຊຸມປຶກສາຫາລື, ແລກປ່ຽນທັດສະນະຄໍາຄິດຄໍາເຫັນຮ່ວມກັນ ກ່ຽວກັບບັນຫາພົ້ນເດັ່ນທີ່ເກີດຂຶ້ນຕິດພັນກັບການປະຕິບັດວຽກງານວິຊາສະເພາະຂົງເຂດຍຸຕິທໍາ; ເພື່ອເຮົາຮັບຮູ້, ເຂົ້າໃຈ ແລະ ຄົ້ນຄວ້າປະກອບຄໍາເຫັນ ໃຫ້ມີຄວາມເປັນເອກະພາບກັນຕໍ່ບັນດາເນື້ອໃນ ທີ່ຈະນໍາເຂົ້າຜ່ານກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII ທີ່ຈະຈັດຂຶ້ນໃນເດືອນຕຸລານີ້.

        ກອງປະຊຸມຈະໄດ້ຮັບຟັງ ບົດສະຫລຸບຕີລາຄາການເຄື່ອນໄຫວວຽກງານປະຈໍາປີ 2017 ແລະ ທິດທາງແຜນການເຄື່ອນໄຫວປະຈໍາປີ 2018 ຂອງກໍາມາທິການຍຸຕິທໍາສະພາແຫ່ງຊາດ; ບົດລາຍງານການເຄື່ອນໄຫວວຽກງານປະຈໍາປີ ຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ຕໍ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII; ບົດປະກອບຄໍາເຫັນຂອງທ່ານປະທານກໍາມາທິການຍຸຕິທໍາ ຕໍ່ກັບບົດລາຍງານການເຄື່ອນໄຫວປະຈໍາປີ ຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ; ຮ່າງປັບປຸງກົດໝາຍ ວ່າດ້ວຍການດໍາເນີນຄະດີອາຍາ, ຮ່າງກົດໝາຍ ວ່າດ້ວຍຜູ້ພິພາກສາ ແລະ ຮ່າງກົດໝາຍ ວ່າດ້ວຍສັນຊາດ; ຮ່າງມະຕິກອງປະຊຸມສະໄໝສາມັນເທື່ອທີ 4 ວ່າດ້ວຍການຮັບຮອງເອົາບົດລາຍງານ ແລະ ມາດຕະການ ໃນການຈັດຕັ້ງປະຕິບັດທິດທາງແຜນການປີ 2018 ຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ.

ບັນດາຜູ້ແທນທີ່ເຂົ້າຮ່ວມກອງປະຊຸມຈະໄດ້ສຸມສະຕິປັນຍາເຂົ້າໃນການປະກອບຄໍາຄິດຄໍາເຫັນໃສ່ບົດລາຍງານຕ່າງໆ ເພື່ອເຮັດໃຫ້ເນື້ອໃນຄົບຖ້ວນ ແລະ ສົມບູນ ກ່ອນທີ່ຈະນໍາເຂົ້າໄປພິຈາລະນາໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII.