ສສຊ ປະກອບຄຳເຫັນຕໍ່ບົດລາຍງານ ຂອງລັດຖະບານ, ອົງການກວດສອບແຫ່ງລັດ ແລະອົງການກວດກາລັດຖະບານ
27/11/2018

(ສພຊ) ໃນຕອນເຊົ້າຂອງວັນທີ 21 ພະຈິກ 2018, ທີ່ຫ້ອງປະຊຸມສະພາແຫ່ງຊາດ (ຫລັກ 6) , ນະຄອນຫລວງວຽງຈັນ ໂດຍການເປັນປະທານກອງປະຊຸມຂອງທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ ບັນດາທ່ານສະມາຊິກສະພາແຫ່ງຊາດ (ສສຊ) ໄດ້ສຸມສະຕິປັນຍາຄົ້ນຄວ້າປະກອບຄຳຄິດຄຳເຫັນໃສ່ບົດລາຍງານຂອງລັດຖະບານ, ອົງການກວດສອບແຫ່ງລັດ ແລະ ອົງການກວດກາລັດຖະບານ ຕາມຄໍາເຈາະຈີ້ມຂອງທ່ານປະທານສະພາແຫ່ງຊາດ ຢ່າງມີເຫດມີຜົນ ແລະ ກົງໄປກົງມາ.  

ຕອນບ່າຍຂອງວັນດຽວກັນ, ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ກອງປະຊຸມໄດ້ສືບຕໍ່ຮັບຟັງການປະກອບຄຳເຫັນຈາກບັນດາທ່ານ ສສຊ ແຕ່ລະເຂດເລືອກຕັ້ງ ເຊິ່ງບັນດາທ່ານທີ່ປະກອບຄຳເຫັນນັ້ນ ລ້ວນແຕ່ນຳເອົາບັນຫາທີ່ສ່ອງແສງເຖິງສະພາບຄວາມເປັນຈິງຢູ່ທ້ອງຖິ່ນຕົນມາສະເໜີຕໍ່ກອງປະຊຸມ ເພື່ອສະເໜີຕໍ່ລັດຖະບານຊອກວິທີການແກ້ໄຂໃຫ້ສອດຄ່ອງກັບສະພາບຄວາມເປັນຈິງ.

          ລະຫວ່າງວັນທີ 22-23 ພະຈິກ 2018, ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ກອງປະຊຸມໄດ້ສືບຕໍ່ຮັບຟັງການປະກອບຄຳຄິດຄຳເຫັນຈາກບັນດາທ່ານ ສສຊ ​​ໃນແຕ່ລະ​ເຂດ​ເລືອກ​ຕັ້ງ ​ໃສ່​ບົດ​ລາຍ​ງານຂອງລັດຖະບານ, ອົງການກວດສອບແຫ່ງລັດ ແລະ ອົງການກວດກາລັດຖະບານ ​ເຊິ່ງບັນຫາສ່ວນຫລາຍທີ່ ສສຊ ໃຫ້ຄວາມສົນໃຈ ແມ່ນກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປີ 2018 ແລະ ທິດທາງແຜນການ ປີ 2019, ກ່ຽວກັບ​ວຽກງານດ້ານວັດທະນະທຳ-ສັງຄົມ, ການສົ່ງເສີມການທ່ອງທ່ຽວ, ການພັດທະນາຊັບພະຍາກອນມະນຸດ ໃນຂົງເຂດວິຊາຊີບ ແລະ ອາຊີວະສຶກສາ, ການລົງທຶນຂອງເອກະຊົນພາຍໃນ ແລະ ຕ່າງປະເທດ, ພັດທະນາຊົນນະບົດ ແລະ ລຶບລ້າງຄວາມທຸກຍາກ, ​ໄພພິບັດ​ທາງ​ທຳ​ມະ​ຊາດ, ການແກ້ໄຂບາງຈຸດອ່ອນ ໃນ 8 ມາດຕະການຊຸກຍູ້ດ້ານເສດຖະກິດທີ່ຕິດພັນກັບການກວດສອບ ແລະ ສາເຫດຂອງການທີ່ຈະບໍ່ບັນລຸບາງຄາດໝາຍມະຫາພາກຂອງຂະແໜງສາທາລະນະສຸກ ແລະ ລວມທັງການແກ້ໄຂປາກົດການຫຍໍ້ທໍ້ຕ່າງໆໃນສັງຄົມ.

          ທ່ານ ນາງ ປານີ ຢາທໍ່ຕູ້ ໄດ້ຊີ້ນຳໃຫ້ບັນດາທ່ານ ສສຊ ມີຄຳເຫັນລົງເລິກບັນຫາທີ່ມີຄວາມສຳ ຄັນຂອງຊາດ ເປັນຕົ້ນການກຳນົດກົນໄກນະໂຍບາຍ ແລະ ມາດຕະການຊຸກຍູ້ສົ່ງເສີມການລົງທຶນ ທັງພາຍໃນ ແລະ ຕ່າງປະເທດ ແລະ ທ່ານຍັງໄດ້ເນັ້ນໃຫ້ບັນດາທ່ານ ສສຊ ຕີລາຄາຄືນຄວາມສອດຄ່ອງຂອງການກຳນົດລະດັບການຂະຫຍາຍຕົວຂອງເສດຖະກິດ ຈາກ 6,5% ເພີ່ມເປັນ 6,7% ຂອງລັດ ຖະບານ ແລະ ບັນຫາອື່ນໆອີກຈຳນວນໜຶ່ງ.

 

(ນາງ ສຸພາ​ວັນ ຫອມ​ສະ​ນິດ)