ຄະນະນຳ ສພຊ ເຂົ້າຮ່ວມພິທີຕັກບາດບຸນນະມັດສະການພະທາດຫລວງ
27/11/2018

(ສພຊ) ວັນທີ 22 ພະຈິກ 2018, ກົງກັບມື້ຂຶ້ນ 15 ຄໍ່າ ເດືອນ 12 (ລາວ) ພຸດທະສັງກະລາດ ພສ. 2561, ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ (ສພຊ) ພ້ອມດ້ວຍສະມາຊິກສະພາແຫ່ງຊາດ (ສສຊ) ແລະ ພະນັກງານ-ລັດຖະກອນຈໍານວນໜຶ່ງ ໄດ້ເຂົ້າຮ່ວມພິທີທຳບຸນຕັກບາດຖວາຍທານໃນບຸນນະມັດສະການພະທາດຫລວງ ຮ່ວມກັບບັນດາການນຳພັກ-ລັດ, ຊາວພຸດທະສາສະນິກະຊົນລາວບັນດາເຜົ່າໃນຂອບເຂດທົ່ວປະເທດ ກໍຄືມວນຊົນຊາວນະຄອນຫລວງວຽງຈັນ ເພື່ອທຳບຸນຕັກບາດຖວາຍສັງຄະທານຖວາຍແດ່ພຣະພິກຂຸສົງສາມະເນນຫລາຍກວ່າພັນອົງ, ພ້ອມທັງຮັບຟັງທຳມະເທດສະໜາຕາມຄໍາສັ່ງສອນຂອງພຣະສໍາມາສໍາພຸດທະເຈົ້າຕໍ່ການໃຫ້ທານຮັກສາສິນພາວະນາ ຕາມຫລັກພຸດທະສາສະໜາອັນເປັນຮີດຄອງປະເພນີອັນດີງາມທີ່ມີມາແຕ່ບູຮານນະການຈາກພຣະອາຈານໃຫຍ່ ມະຫາງອນ ດໍາລົງບຸນ ປະທານສູນກາງອົງການພຸດທະສາສະໜາສໍາພັນລາວ (ອພສ) ເຊິ່ງການເຮັດບຸນສິນກິນທານແມ່ນເພື່ອລະນຶກເຖິງຄຸນງາມຄວາມດີ ແລະ ອຸທິດບຸນກຸສົນແດ່ບັນພະບູລຸດລາວຜູ້ເສຍສະລະເລືອດເນື້ອເພື່ອຜືນແຜ່ນດິນລາວ ເປັນຕົ້ນແມ່ນພະເຈົ້າໄຊຍະເສດຖາທິລາດ ທີ່ເປັນຜູ້ສ້າງ ແລະ ປະຕິສັງຂອນພະທາດຫລວງວຽງຈັນ.

ບຸນນະມັດສະການພະທາດຫລວງວຽງຈັນ ເປັນປາງໃຫຍ່ທີ່ມີຄວາມໝາຍຄວາມສໍາຄັນຕໍ່ປວງຊົນລາວທັງຊາດ ເພື່ອສືບສານວັດທະນະທໍາ ແລະ ຮີດຄອງປະເພນີອັນດີງາມຂອງຊາດ ໃຫ້ຢູ່ຄູ່ສັງຄົມຕະຫລອດໄປ.

(ສອນສັກ ວັນວິໄຊ)