ກວດກາເນື້ອໃນຮອບດ້ານ ຮ່າງກົດໝາຍວ່າດ້ວຍການປະກັນສຸຂະພາບ
31/10/2018

(ສພຊ) ​ເພື່ອ​ເປັນ​ການກຽມຄວາມ​ພ້ອມ​ທາງ​ດ້ານ​ເນື້ອ​ໃນ​ຂອງ​ກົດໝາຍທີ່​ຈະ​ນໍາ​ເຂົ້າ​ພິຈາລະນາ​ໃນ​ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດຊຸດທີ VIII, ​ລະຫວ່າງ​ວັນ​ທີ 15-16 ຕຸລາ 2018 ສະພາ​ແຫ່ງ​ຊາດ ໄດ້ຈັດກອງປະຊຸມກວດກາເນື້ອໃນຮອບດ້ານຂອງຮ່າງກົດໝາຍວ່າດ້ວຍ ການ​ປະກັນ​ສຸຂະພາບ ທີ່​ແຂວງ​ວຽງຈັນ ໂດຍການເປັນປະທານຂອງທ່ານ ສົມ​ພັນ ​ແພງ​ຄໍາ​ມີ ຮອງ​ປະທານ​ສະພາ​ແຫ່ງ​ຊາດ; ເຂົ້າຮ່ວມມີບັນດາປະທານ​-ຮອງປະທານກໍາມາທິການທີ່​ກ່ຽວຂ້ອງ​ຂອງ​ສະພາ​ແຫ່ງ​ຊາດ, ຮອງ​ລັດຖະມົນຕີ​ກະຊວງສາທາລະນະ​ສຸກ, ຮອງ​ລັດຖະມົນຕີ​ກະຊວງ​ຍຸຕິ​ທໍາ, ພະນັກງານບໍານານ, ຜູ້ຕາງໜ້າຈາກຫ້ອງວ່າການປະທານ​ປະ​ເທດ, ຫ້ອງ​ວ່າ​ການສໍານັກງານນາຍົກລັດຖະມົນຕີ, ກະ ຊວງຍຸຕິທໍາ, ກະຊວງ​ການ​ເງິນ, ບັນດາຫົວໜ້າ-ຮອງຫົວໜ້າກົມ, ລັດຖະກອນທີ່ກ່ຽວຂ້ອງ ຈາກສະພາແຫ່ງຊາດ ແລະ  ກະຊວງ​ສາທາລະນະ​ສຸກຈໍານວນໜຶ່ງ.

ຮ່າງ​ກົດໝາຍວ່າ​ດ້ວຍ ການ​ປະກັນ​ສຸຂະພາບ ສະບັບ​ນີ້ ເປັນ​ກົດໝາຍທີ່ສ້າງ​ໃໝ່ ມີ​ຈຸດປະສົງ​ເພື່ອ​ເຮັດ​ໃຫ້​ພົນລະ​ເມືອງ​ລາວ ໄດ້​ຮັບ​ການ​ປະກັນ​ສຸຂະພາບ, ​ເຂົ້າ​ເຖິງ​ການ​ບໍລິການ​ປິ່ນປົວຢ່າງ​ສະ​ເໝີພາບ, ​ເປັນ​ທໍາ ​ແລະ ທົ່ວ​ເຖິງ. ກົດໝາຍສະບັບດັ່ງກ່າວ ປະກອບມີ 12 ພາກ, 7 ໝວດ ແລະ 80 ມາດຕາ. ພ້ອມ​ດຽວກັນ​ນັ້ນ, ຜູ້ເຂົ້າຮ່ວມກອງປະຊຸມຍັງໄດ້ສຸມສະຕິ​ປັນຍາ​ເຂົ້າ​ໃນ​ການປະກອບຄໍາຄິດຄໍາເຫັນຢ່າງກົງໄປກົງມາຕໍ່ບັນດາມາດຕາ​ ເພື່ອເຮັດໃຫ້ເນື້ອໃນຄົບ​ຖ້ວນ, ຮັດ​ກຸມ, ​ເຂົ້າ​ໃຈງ່າຍ, ສອດ​ຄ່ອງ​ກັບ​ກົດໝາຍອື່ນທີ່​ກ່ຽວຂ້ອງ ແລະ ສາມາດ​ຈັດ​ຕັ້ງ​ປະຕິບັດ​ໄດ້. ພາຍຫລັງສໍາເລັດການກວດກາ​ເນື້ອ​ໃນຮອບດ້ານແລ້ວ ຈະໄດ້ລາຍງານຕໍ່ກອງ​ປະຊຸມຄະນະປະຈໍາສະພາແຫ່ງຊາດ ພິຈາລະນາຕົກລົງ ນໍາເຂົ້າໃນວາລະກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດຊຸດທີ VIII ພິຈາລະນາຮັບຮອງເອົາ.

(ກົມໂຄສະນາ ແລະ ຕີຄວາມໝາຍກົດໝາຍ)