ສພຊ ທາບທາມການສ້າງແຜນກຳນົດພະນັກງານ ນຳພາ-ຄຸ້ມຄອງ ຂັ້ນສູນກາງຮອບທີ່ II
25/10/2018

(ສພຊ) ໃນຕອນບ່າຍຂອງວັນທີ 19 ຕຸລາ 2018, ສະພາແຫ່ງຊາດ (ສພຊ) ໄດ້ຈັດກອງປະຊຸມສ້າງແຜນກໍານົດພະນັກງານນໍາພາ-ຄຸ້ມຄອງຂັ້ນສູນກາງຄຸ້ມຄອງຂອງ ສພຊ ຢູ່ທີ່ຫ້ອງປະຊຸມຄະນະເລຂາທິການ ສພຊ (ຫລັກ 6) ນະຄອນຫລວງວຽງຈັນ ໂດຍການເປັນປະທານຂອງສະຫາຍ ນາງ ສີໃສ ລືເດດມູນສອນ ກໍາມະການສູນກາງພັກ, ຮອງເລຂາຄະນະພັກສະພາແຫ່ງຊາດ; ມີບັນດາເລຂາທິການ-ຮອງເລຂາທິການ, ປະທານ-ຮອງປະທານກໍາມາທິການ, ຫົວໜ້າ-ຮອງຫົວໜ້າກົມ, ສູນພາຍໃນ ສພຊ ເຂົ້າຮ່ວມ.

       ໂອກາດດັ່ງກ່າວ, ທ່ານປະທານກອງປະຊຸມ ໄດ້ມີຄໍາເຫັນຕໍ່ກອງປະຊຸມວ່າ: ອີງຕາມມະຕິຂອງກົມການເມືອງສູນກາງພັກ ສະບັບເລກທີ 032/ກມສພ, ລົງວັນທີ 3 ມັງກອນ 2018 ວ່າດ້ວຍວຽກງານສ້າງແຜນກໍານົດພະນັກງານນໍາພາ-ຄຸ້ມຄອງ, ອີງຕາມຄໍາແນະນໍາຂອງຄະນະຈັດຕັ້ງສູນກາງພັກ ສະບັບເລທີ 292/ຄຈສພ, ລົງວັນທີ 26 ເມສາ 2018 ກ່ຽວກັບການຈັດຕັ້ງປະຕິບັດມະຕິຂອງກົມການເມືອງສູນກາງພັກ ວ່າດ້ວຍມາດຕະຖານຂອງພະນັກງານນໍາພາ-ຄຸ້ມຄອງ, ວຽກງານຄຸ້ມຄອງພະນັກງານ ແລະ ວຽກງານສ້າງແຜນກໍານົດພະນັກງານນໍາພາ-ຄຸ້ມຄອງ, ອີງຕາມແຈ້ງການແນະນໍາຂອງຄະນະຈັດຕັ້ງສູນກາງພັກສະບັບເລກທີ 168/ຄຈສພ, ລົງວັນທີ 10 ສິງຫາ 2018 ກ່ຽວກັບການກະກຽມພະນັກງານສືບທອດປ່ຽນແທນຕໍາແໜ່ງນໍາພາ-ຄຸ້ມຄອງແຕ່ລະຂັ້ນ ອີງຕາມມາດຖານເງື່ອນໄຂຂອງພະນັກງານນໍາພາ-ຄຸ້ມຄອງປະເພດທີ I ພາຍໃນສະພາແຫ່ງຊາດທີ່ຂຶ້ນກັບສິດຄຸ້ມຄອງຂອງກົມການເມືອງ ແລະ ຄະນະເລຂາທິການສູນກາງພັກ, ອີງຕາມການຕົກລົງເຫັນດີໃນກອງປະຊຸມຂອງຄະນະປະຈໍາ, ຄະນະບໍລິຫານງານພັກ ສພຊ ຄັ້ງວັນທີ 2 ຕຸລາ 2018, ຂໍສະຫລຸບສັງເຂບກ່ຽວກັບການທາບທາມຮອບທີ 1 ເຊິ່ງເອີ້ນວ່າການທາບທາມເປີດກວ້າງໃນວັນທີ 16 ກັນຍາ 2018 ແລະ ໃນວັນທີ 26 ກັນຍາ 2018 ຜ່ານມາ ຄະນະຮັບຜິດຊອບການສ້າງແຜນກໍານົດພະນັກງານນໍາພາ-ຄຸ້ມຄອງປະເພດທີ  I ແຜນ 1.2 1.3 ແລະ 1.4 ພາຍໃນສະພາແຫ່ງຊາດທີ່ຂຶ້ນກັບສິດຄຸ້ມຄອງຂອງກົມການເມືອງ, ເລຂາທິການສູນກາງພັກ ເຊິ່ງມີທັງໝົດ 55 ແຜນ ໃນນັ້ນ ຄະນະບໍລິຫານງານພັກສະພາແຫ່ງຊາດມີ 4 ແຜນ, ເລຂາຄະນະບໍລິຫານງານພັກ, ຮອງເລຂາຄະນະປະຈໍາ ແລະ ກໍາມະການພັກ, ປະທານກໍາມາທິການ ແລະ ຫົວໜ້າກົງຈັກທີ່ຄະນະປະຈໍາສະພາແຫ່ງຊາດສ້າງຕັ້ງຂຶ້ນມີ 12 ແຜນ, ຮອງປະທານກໍາມາທິການ ແລະ ຮອງຫົວໜ້າກົງຈັກທີ່ຄະນະປະຈໍາສ້າງຕັ້ງຂຶ້ນມີ 12 ແຜນ, ຫົວໜ້າກົມ, ສູນພາຍໃນສະພາແຫ່ງຊາດ ມີ 27 ສະນັ້ນ ເພື່ອເຮັດໃຫ້ການທາບທາມໃນຄັ້ງນີ້ມີມາດຖານດີຂຶ້ນກວ່າເກົ່າຂໍມີບາງຄໍາເຫັນດັ່ງນີ້:

  1. ສະເໜີໃຫ້ບັນດາສະຫາຍ ມີການຄົ້ນຄິດຕຶກຕອງລະອຽດຮອບດ້ານ ຕໍ່ແຕ່ລະເປົ້າໝາຍທີ່ມີຊື່ໃນບັດທາບທາມໃນຮອບທີ II  ເປັນຕົ້ນແມ່ນດ້ານທັດສະນະຫລັກໝັ້ນຄຸນທາດການເມືອງ, ປະຕິບັດລະບອບແບບແຜນ, ການຊີ້ນໍາ-ນໍາພາວິທີການເຮັດວຽກ, ຄວາມຮູ້ຄວາມສາມາດ, ປະສົບການຜົນງານໃນໄລຍະຜ່ານມາ, ຄວາມຮັບຜິດຊອບແຕ່ລະວຽກງານຫົວຄິດປະດິດສ້າງ.
  2.  ການຄັດເລືອກເປົ້າໝາຍ ຕ້ອງຖືສໍາຄັນທີ່ສຸດແມ່ນມາດຖານເງື່ອນໄຂເປັນຕົ້ນຕໍ.
  3.  ການຂີດບັດທາບທາມໃນຮອບທີ II ນີ້ ແມ່ນໃຫ້ຂີດແຕ່ເລກລໍາດັບຊື່ ແລະ ນາມສະກຸນ ໄປຈົນສຸດແຖວ ແລະ ຈໍານວນທີ່ຂີດອອກແມ່ນໃຫ້ຂີດອອກຕາມຈໍານວນທີ່ໄດ້ກໍານົດ.