ຮອງປະທານ ສພຊ ເຂົ້າຮ່ວມກອງປະຊຸມສະມັດຊາສະຫະພັນລັດຖະສະພາສາກົນ (IPU) ຄັ້ງທີ 39
22/10/2018

(ສພຊ) ລະຫວ່າງວັນທີ 14-18 ຕຸລາ 2018, ທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ (ສພຊ) ໄດ້ນຳພາຄະນະຜູ້ແທນຂອງສະພາແຫ່ງຊາດ ແຫ່ງ ສປປລາວ ເຂົ້າຮ່ວມກອງປະຊຸມສະມັດຊາສະຫະພັນລັດຖະສະພາສາກົນ (IPU) ຄັ້ງທີ 139, ທີ່ນະຄອນເຊີແນວ ປະເທດສະວິດ ພາຍໃຕ້ຫົວຂໍ້: “ບົດບາດນໍາໜ້າຂອງ​ລັດຖະສະພາ ​ໃນ​ການ​ສົ່ງ​ເສີມ​ສັນຕິພາບ ​ແລະ ການ​ພັດທະນາ ​ໃນ​ຍຸກ​​ແຫ່ງ​ການ​ປ່ຽນ​ແປງ​ທາງ​ດ້ານ​ເຕັກ​ໂນ​ໂລ​ຊີ ແລະ ນະວັດຕະກຳ” (Parliamentary leadership in promoting peace and development in the age of innovation and technological change), ເຂົ້າຮ່ວມກອງປະຊຸມດັ່ງກ່າວ ມີຄະນະຜູ້ແທນຈາກປະເທດສະມາຊິກ IPU ຈຳນວນ 149 ປະເທດ, ໃນນັ້ນ ມີຂັ້ນປະທານລັດຖະສະພາ 58 ທ່ານ ແລະ ຮອງປະທານລັດຖະສະພາ 60 ທ່ານ, ສະມາຊິກສະພາແຫ່ງຊາດ 742 ທ່ານ, ສະມາຊິກລັດຖະສະພາແຫ່ງຊາດໜຸ່ມ 141 ທ່ານ ແລະ ສະມາຊິກລັດຖະສະພາແຫ່ງຊາດເພດຍິງ 247 ທ່ານ.

ໃນກອງປະຊຸມຄັ້ງນີ້, ບັນດາປະທານ-ຮອງປະທານລັດຖະສະພາ, ຫົວໜ້າຄະນະຜູ້ແທນ ຈາກປະເທດຕ່າງໆ ໄດ້ຜັດປ່ຽນກັນຂຶ້ນກ່າວຄຳປາໄສກ່ຽວກັບ “ບົດບາດນໍາໜ້າຂອງ​ລັດຖະສະພາ ​ໃນ​ການ​ສົ່ງ​ເສີມ​ສັນຕິພາບ ​ແລະ ການ​ພັດທະນາ ​ໃນ​ຍຸກ​​ແຫ່ງ​ການ​ປ່ຽນ​ແປງ​ທາງ​ດ້ານ​ເຕັກ​ໂນ​ໂລ​ຊີ ແລະ ນະວັດຕະກຳ” ເຊິ່ງສ່ວນໃຫຍ່ເຫັນດີເປັນເອກະພາບກັນວ່າ: ວິທະຍາສາດມີຄວາມສໍາຄັນຢ່າງຍິ່ງ ຕໍ່ການພັດທະນາເສດຖະກິດ ແລະ ສັງຄົມຂອງໂລກ, ໄດ້ປະກອບສ່ວນເຂົ້າໃນການສ້າງນະໂຍບາຍທີ່ແຫລມຄົມ, ຊ່ວຍປັບປຸງການ ບໍລິການດ້ານສະຫວັດດີການຂອງປະຊາຊົນ, ສ້າງຂີດຄວາມສາມາດໃນການພັດທະນາເສດຖະກິດ ແລະ ຄວາມໝັ້ນຄົງຂອງໂລກ ພ້ອມທັງສະໜັບໜູນການຮ່ວມມືກັນລະຫວ່າງປະຊາຊາດຕ່າງໆໃນໂລກ ໃຫ້ຢູ່ຮ່ວມກັນຢ່າງສັນຕິ.

ທ່ານ ແສງນວນ ໄຊຍະລາດ ຫົວໜ້າຄະນະຜູ້ແທນສະພາແຫ່ງຊາດລາວ ກໍໄດ້ຂຶ້ນກ່າວຄຳປາໄສຕໍ່ຫົວຂໍ້ດັ່ງກ່າວ ເຊິ່ງທ່ານໄດ້ຍົກໃຫ້ເຫັນເຖິງບົດບາດ ແລະ ຄວາມສຳຄັນຂອງວິທະຍາສາດ, ເຕັກໂນໂລຊີ ແລະ ນະວັດຕະກຳຕໍ່ການພັດທະນາເສດຖະກິດ-ສັງຄົມ ຕາມຍຸດທະສາດຫັນເປັນອຸດສາຫະກຳ ແລະ ທັນສະໄໝຂອງປະເທດ ກໍຄືການບັນລຸເປົ້າໝາຍການພັດທະນາແບບຍືນຍົງ ໃນປີ 2030 ຂອງສະຫະປະຊາຊາດ. ພ້ອມທັງເນັ້ນເຖິງບົດບາດດ້ານນິຕິບັນຍັດ ແລະ ຕິດຕາມກວດກາຂອງສະພາແຫ່ງຊາດລາວ ທີ່ໄດ້ຮັບຮອງເອົາກົດໝາຍໃນຂົງເຂດວິທະຍາສາດ ແລະ ເຕັກໂນໂລຊີ ຫລາຍສະບັບ ເພື່ອຮັບປະກັນໃຫ້ວຽກງານດັ່ງກ່າວໄດ້ຮັບການພັດທະນາ ແລະ ຄຸ້ມຄອງຢ່າງເປັນລະບົບ ເປັນຕົ້ນ: ກົດໝາຍວ່າດ້ວຍວິທະຍາສາດ ແລະ ເຕັກໂນໂລຊີ, ກົດໝາຍວ່າດ້ວຍຄວາມປອດໄພດ້ານເຕັກໂນໂລຊີດ້ານຊີວະພາບ, ກົດໝາຍວ່າດ້ວຍທຸລະກຳທາງເອເລັກໂຕຣນິກ, ກົດໝາຍວ່າດ້ວຍການວັດແທກ, ກົດໝາຍວ່າດ້ວຍມາດຕະຖານ, ກົດໝາຍວ່າດ້ວຍຊັບສິນທາງປັນຍາ ແລະ ອື່ນໆ. ລວມທັງການເຮັດບົດບາດຕິດຕາມກວດກາການຈັດຕັ້ງປະຕິບັດກົດໝາຍ ແລະ ນະໂຍບາຍຕ່າງໆຂອງລັດຖະບານ ກ່ຽວກັບການຊຸກຍູ້ສົ່ງເສີມການຄົ້ນຄວ້າ ແລະ ນຳໃຊ້ວິທະຍາສາດ, ເຕັກໂນໂລຊີ ແລະ ນະວັດຕະກຳ ໃຫ້ດຳເນີນໄປຕາມທີ່ກົດໝາຍກຳນົດ.

ຄະນະຜູ້ແທນສະພາແຫ່ງຊາດລາວ ຍັງໄດ້ເຂົ້າຮ່ວມກອງປະຊຸມຄະນະກຳມະການປະຈຳຕ່າງໆ ຂອງໄອພີຢູເຊັ່ນ: ກຳມາທິການປະຈໍາກ່ຽວກັບບັນຫາສັນຕິພາບ ແລະ ຄວາມໝັ້ນຄົງຂອງໂລກ; ກຳມາທິການປະຈໍາກ່ຽວກັບການພັດທະນາແບບຍືນຍົງ, ການເງິນ ແລະ ການຄ້າ; ກຳມາທິການກ່ຽວກັບບັນຫາປະຊາທິປະໄຕ ແລະ ສິດທິມະນຸດ; ກໍາມາທິການປະຈໍາກ່ຽວກັບກິດຈະການຂອງອົງການສະຫະປະຊາຊາດ; ເວທີປຶກສາຫາລືຂອງສະມາຊິກລັດຖະສະພາເພດຍິງ; ເວທີປຶກສາຫາລືຂອງສະມາຊິກລັດຖະສະພາໜຸ່ມ ແລະ ເຂົ້າຮ່ວມກອງປະຊຸມຂອງກຸ່ມລັດຖະສະພາຈາກບັນດາປະເທດອາຊຽນບວກ 3 ແລະ ກອງປະຊຸມກຸ່ມລັດຖະສະພາພາກພື້ນອາຊີ ແລະ ປາຊີຟິກ.

ນອກຈາກນີ້, ຄະນະຜູ້ແທນສະພາແຫ່ງຊາດລາວ ຍັງໄດ້ພົບປະສອງຝ່າຍແບບບໍ່ເປັນທາງການ ກັບຄະນະຜູ້ແທນສະພາຄູຣານ ໃຫຍ່ມົງໂກນ ແລະ ຄະນະຜູ້ແທນສະພາປະຊາຊົນສູງສຸດ ແຫ່ງ ສາທາລະນະລັດ ປະຊາຊົນ ປະຊາທິປະໄຕເກົາຫລີ ເພື່ອປຶກສາຫາລື ແລະ ແລກປ່ຽນຄຳຄິດຄຳເຫັນກ່ຽວກັບການພົວພັນຮ່ວມມືລະຫວ່າງອົງການນິຕິບັນຍັດ.

ກອງປະຊຸມດັ່ງກ່າວ ໄດ້ອັດລົງດ້ວຍຜົນສຳເລັດອັນຈົບງາມ ໂດຍໄດ້ຮັບຮອງເອົາຍັດຕິ ກ່ຽວກັບບັນຫາຕ່າງໆ ຕາມວາລະຂອງກອງປະຊຸມ ລວມທັງຖະແຫລງການກ່ຽວກັບການສະເຫລີມສະຫລອງ 70 ປີ ແຫ່ງການອອກຖະແຫລງການວ່າດ້ວຍສິດທິມະນຸດ ຂອງໂລກ, ໄດ້ຮັບຮອງເອົາບັນດາບົດລາຍງານຂອງຄະນະກຳມະການປະຈຳ ແລະ ເອກະສານກ່ຽວກັບຜົນຂອງການອະພິປາຍລວມຂອງກອງປະຊຸມສະມັດຊາລັດຖະສະພາ ຄັ້ງທີ 139.