ຮອງປະທານ ສພຊ ເຂົ້າຮ່ວມກອງປະຊຸມປະທານລັດຖະສະພາຂອງບັນດາປະເທດເອີຣົບ-ອາຊີ
18/10/2018

(ສພຊ) ລະຫວ່າງວັນທີ 8-11 ຕຸລາ 2018, ທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ (ສພຊ) ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມປະທານລັດຖະສະພາຂອງບັນດາປະເທດເອີຣົບ-ອາຊີ (ຢູເຣເຊຍ) ຄັ້ງທີ 3 ທີ່ເມືອງອັນຕາລຢາ ປະເທດຕວກກີ ພາຍໃຕ້ຫົວຂໍ້ “ການຮ່ວມມືດ້ານເສດຖະກິດ ສິ່ງແວດລ້ອມ ແລະ ການພັດທະນາແບບຍືນຍົງ (Economic Cooperation, Environment and Sustainable Development)” ໂດຍການຜັດປ່ຽນເປັນປະທານຂອງປະທານສະພາດູມາ ແຫ່ງສະຫະພັນຣັດເຊຍ, ປະທານສະພາແຫ່ງຊາດ ແຫ່ງ ສ.ເກົາຫລີ ແລະ ປະທານສະພາແຫ່ງຊາດ ແຫ່ງ ຕວກກີ; ມີບັນດາຄະນະຜູ້ແທນຂັ້ນສູງຂອງລັດຖະສະພາບັນດາປະເທດຢູເຣເຊຍ ເຂົ້າຮ່ວມຈຳນວນ 40 ກວ່າປະເທດ, ໃນນັ້ນ ມີປະທານລັດຖະສະພາ 23 ປະເທດ.

ໃນກອງປະຊຸມຄັ້ງນີ້, ບັນດາຫົວໜ້າຄະນະຜູ້ແທນໄດ້ພ້ອມກັນແລກປ່ຽນຄໍາຄິດຄໍາເຫັນ ແລະ ມີທັດສະນະຕໍ່ການພົວພັນທາງດ້ານເສດຖະກິດ, ການປົກປັກຮັກສາສິ່ງແວດລ້ອມ ແລະ ການພັດທະນາແບບຍືນຍົງ ເຊິ່ງສ່ວນໃຫຍ່ແມ່ນໄດ້ຍົກໃຫ້ເຫັນນະໂຍບາຍຕົວຈິງຂອງບັນດາປະເທດ ຕິດພັນກັບການປະຕິບັດ ເພື່ອໃຫ້ບັນລຸເປົ້າໝາຍການພັດທະນາແບບຍືນຍົງ ຕາມວາລະຮອດປີ 2030 ຂອງສະຫະປະຊາຊາດ.

ໃນໂອກາດດັ່ງກ່າວ, ທ່ານ ບຸນປອນ ບຸດຕະນະວົງ ໄດ້ກ່າວຄຳເຫັນຕໍ່ກອງປະຊຸມ ເຊິ່ງທ່ານໄດ້ຕີລາຄາການເຊື່ອມໂຍງໃນຍຸກໂລກາພິວັດ ໂດຍເນັ້ນໃຫ້ເຫັນຄວາມສຳຄັນຂອງການຮ່ວມມືດ້ານເສດຖະກິດ, ການປົກປັກຮັກສາສິ່ງແວດລ້ອມ ກາຍເປັນປັດໄຈ​ພື້ນຖານຊຸກຍູ້​ໃຫ້ການ​ພັດທະນາ​ແບບ​ຍືນຍົງ ເຊິ່ງປັດຈຸບັນ ສປປລາວ ໄດ້ດໍາເນີນແນວທາງການພັດທະນາຕາມທິດສີຂຽວ ແລະ ຍືນຍົງ, ດຸນດ່ຽງການພັດທະນາ ກັບການປົກປັກຮັກສາສິ່ງແວດລ້ອມ, ເຂົ້າ​ຮ່ວມ​ຢ່າງ​ຕັ້ງ​ໜ້າ​ຢູ່​ໃນ​ຂະ​ບວນ​ການ​ເຊື່ອມ​ໂຍງ​ທາງ​ດ້ານ​ເສດ​ຖະ​ກິດ​ຂອງ​ພາກ​ພື້ນ ແລະ ຂອງ​ໂລກ ໂດຍໄດ້ນໍາເອົາ 17 ເປົ້າໝາຍການພັດທະນາແບບຍືນຍົງນັ້ນ ມາຜັນຂະຫຍາຍເຂົ້າໃນແຜນພັດທະນາເສດຖະກິດ-​ສັງ​ຄົມໄລຍະ 5 ປີ ແລະ ປະ​ຈໍາ​ປີຂອງຊາດ; ພ້ອມນັ້ນ, ບັນດາຂະແໜງການກໍໄດ້ນໍາເອົາແຕ່ລະເປົ້າໝາຍໄປຜັນຂະຫຍາຍເປັນອັນສະເພາະເຂົ້າໃນວຽກງານຂອງຕົນ ເຊິ່ງ ສປປລາວ ເປັນປະ​ເທດ​ທີ 27 ທີ່​ໄດ້ໃຫ້ ສັດຕະຍາບັນແກ່ສັນຍາປາຣີ ວ່າດ້ວຍການປ່ຽນແປງຂອງດິນຟ້າອາກາດ ນີ້ສະແດງໃຫ້ເຫັນເຖິງຄວາມມຸ່ງໝັ້ນຂອງ ສປປລາວ ທີ່ຈະຮ່ວມກັບວົງຄະນາຍາດສາກົນ ເພື່ອກ້າວໄປສູ່ການພັດທະນາຕາມທິດສີຂຽວ ແລະ ຍືນຍົງ.

ພ້ອມກັນນີ້້, ທ່ານຮອງປະທານ ສພຊ ຍັງໄດ້ຮຽກຮ້ອງໄປຍັງລັດຖະສະພາບັນດາປະເທດຢູເຣເຊຍວ່າ: “ເພື່ອຄວາມຈະເລີນຮຸ່ງເຮືອງຂອງພາກພື້ນຢູເ​ຣເຊຍ, ລັດຖະສະພາ ກໍຄືສະມາຊິກລັດຖະສະພາ ພວກເຮົາມີໜ້າທີ່ສໍາຄັນໃນການຄົ້ນຄວ້າ ແລະ ຮັບຮອງເອົານະໂຍບາຍເສດຖະກິດທີ່ເໝາະສົມ ເພື່ອອໍານວຍໃຫ້ແກ່ການຮ່ວມມືພັດທະນາ; ພວກເຮົາຕ້ອງຮັບປະກັນໃຫ້ກົດໝາຍ ແລະ ນິຕິກໍາຂອງພວກເຮົາມີຄວາມສອດ​ຄ່ອງກົມກຽວກັນ ແລະ ບໍ່ເປັນອຸປະສັກຕໍ່ການຮ່ວມມືດ້ານການຄ້າ ແລະ ການລົງທຶນນໍາກັນ”; ພ້ອມນັ້ນ, ຮອງປະທານ ສພຊ ຍັງໄດ້ກ່າວຕື່ມວ່າ ເພື່ອກ້າວເດີນໄປດ້ວຍກັນ ແນ​ໃສ່​​ໃຫ້​ພາກພື້ນຢູເຣເຊຍ ມີສັນຕິພາບ, ມີແຕ່ຢູ່ໃນສັນຕິພາບເທົ່ານັ້ນ ປະຊາຊົນຂອງພວກເຮົາຈຶ່ງຈະມີການພັດທະນາ ແລະ ສາມາດຍືນຍົງໄດ້. ສະນັ້ນ, ປະເທດທີ່ພັດທະນາແລ້ວກໍຕ້ອງໄດ້ຊ່ວຍບັນດາປະເທດກໍາລັງພັດທະນາ ແລະ ດ້ອຍພັດທະນາເຊັ່ນກັນ.

ໃນກອງປະຊຸມປະທານລັດຖະສະພາບັນດາປະເທດຢູເຣເຊຍ ໄດ້ເປັນເອກະພາບກັນ ແລະ ຮັບຮອງເອົາ  ຖະແຫລງການອັນຕາລຢາ ວ່າດ້ວຍ “ການຮ່ວມມືດ້ານເສດຖະກິດ, ສິ່ງແວດລ້ອມ ແລະ ການພັດທະນາແບບຍືນຍົງ (Economic Cooperation, Environment and Sustainable Development)” ປະກອບມີ 17 ບັນຫາທີ່ຄະນະຜູ້ແທນແຕ່ລະປະເທດໄດ້ຍົກມາປຶກສາຫາລືແລກປ່ຽນບົດຮຽນນຳກັນ ແລະ ກອງປະຊຸມໄດ້ເປັນເອກະພາບຈະຈັດຕັ້ງກອງປະຊຸມປະທານລັດຖະສະພາບັນດາປະເທດຢູເຣເຊຍ ຢູ່ກາຊັກສະຖານ ໃນປີ 2019.     

ໂອກາດເຂົ້າຮ່ວມກອງປະຊຸມຄັ້ງນີ້, ທ່ານ ບຸນປອນ ບຸດຕະນະວົງ ພ້ອມດ້ວຍຄະນະ ຍັງໄດ້ໄປຢ້ຽມຢາມບາງພື້ນຖານເສດຖະກິດ-ວັດທະນະທຳທາງປະຫວັດສາດຈຳນວນໜຶ່ງຂອງເມືອງອັນຕາລຢາ ປະເທດຕວກກີ ອີກດ້ວຍ.