ກວດກາເນື້ອໃນຮອບດ້ານ ຮ່າງກົດໝາຍວ່າດ້ວຍຄົນພິການ
18/10/2018

(ສພຊ) ເພື່ອເປັນການກຽມຄວາມພ້ອມທາງດ້ານເນື້ອໃນຂອງກົດໝາຍ ທີ່ຈະນໍາເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII, ລະຫວ່າງວັນທີ 13-14 ຕຸລາ 2018 ທີ່ແຂວງວຽງຈັນ ສະພາແຫ່ງຊາດ ໄດ້ຈັດກອງປະຊຸມກວດກາເນື້ອໃນຮອບດ້ານ ຮ່າງກົດໝາຍວ່າດ້ວຍຄົນພິການ ໂດຍການເປັນປະທານຂອງ ທ່ານ ສົມພັນ ແພງຄໍາມີ ຮອງປະທານສະພາແຫ່ງຊາດ ເຂົ້າຮ່ວມມີບັນດາທ່ານປະທານ-ຮອງປະທານກໍາມາທິການທີ່ກ່ຽວຂ້ອງ ຂອງສະພາແຫ່ງຊາດ, ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ພະນັກງານບໍານານ, ຜູ້ຕາງໜ້າຈາກຫ້ອງວ່າການປະທານປະເທດ, ຫ້ອງວ່າການສໍານັກງານນາຍົກລັດຖະມົນຕີ, ກະຊວງຍຸຕິທໍາ, ບັນດາຫົວໜ້າ-ຮອງຫົວໜ້າກົມ, ລັດຖະກອນທີ່ກ່ຽວຂ້ອງ ຈາກສະພາແຫ່ງຊາດ ແລະ ກະຊວງແຮງງານ ແລະ ສະຫວັດດີການສັງຄົມຈໍານວນໜຶ່ງ.

ຈຸດປະສົງຂອງການສ້າງກົດໝາຍວ່າດ້ວຍຄົນພິການ ແມ່ນເພື່ອເຮັດໃຫ້ຄົນພິການໄດ້ຮັບການປົກປ້ອງສິດ ແລະຜົນປະໂຫຍດ, ມີໂອກາດພັດທະນາຕົນເອງ, ສາມາດເຂົ້າຮ່ວມກິດຈະກໍາຕ່າງໆໃນສັງຄົມ ແລະ ມີຄວາມສະເໝີພາບທາງດ້ານການເມືອງ, ກົດໝາຍ, ເສດຖະກິດ, ວັດທະນະທໍາ, ສັງຄົມ ແລະ ຄອບຄົວ ເຊິ່ງເປັນກົດໝາຍທີ່ສ້າງໃໝ່ ປະກອບດ້ວຍ 12 ພາກ, 15 ໝວດ ແລະ 91 ມາດຕາ. ພ້ອມດຽວກັນນັ້ນ, ຜູ້ເຂົ້າຮ່ວມກອງປະຊຸມ ຍັງໄດ້ສຸມສະຕິປັນຍາເຂົ້າໃນການປະກອບຄໍາເຫັນຢ່າງກົງໄປກົງມາຕໍ່ບັນດາມາດຕາ ເພື່ອເຮັດໃຫ້ເນື້ອໃນມີຄວາມຄົບຖ້ວນ, ຈະແຈ້ງ, ຮັດກຸມ, ເຂົ້າ ໃຈງ່າຍ ແລະ ສາມາດຈັດຕັ້ງປະຕິບັດໄດ້ ພາຍຫລັງສໍາເລັດການກວດກາເນື້ອໃນຮອບດ້ານແລ້ວ ຈະລາຍງານຕໍ່ກອງປະຊຸມຄະນະປະຈໍາສະພາແຫ່ງຊາດ ພິຈາລະນາຕົກລົງ ນໍາເຂົ້າໃນວາລະກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ພິຈາລະນາຮັບຮອງເອົາ.