ປະທານສະພາແຫ່ງຊາດ ຕ້ອນຮັບຜູ້ແທນຂັ້ນສູງ ສສ. ຫວຽດນາມ
11/10/2018

(ສພຊ) ຕອນເຊົ້າວັນທີ 9 ຕຸລາ 2018 ທີ່ຫ້ອງຮັບແຂກສະພາແຫ່ງຊາດ,  ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບການເຂົ້າຢ້ຽມຢາມຂອງຄະນະຜູ້ແທນຂັ້ນສູງຂອງພັກກອມມູນິດຫວຽດນາມ ເຊິ່ງ ນໍາພາໂດຍສະຫາຍ ເຈິ່ນ ກວັກ ເວືອງ ກໍາມະການກົມການເມືອງສູນກາງພັກກອມມູນິດຫວຽດນາມ, ຜູ້ປະຈໍາການຄະ ນະເລຂາທິການສູນກາງພັກ ພ້ອມດ້ວຍຄະນະ.

        ສະຫາຍ ນາງ ປານີ ຢາທໍ່ຕູ້ ໄດ້ກ່າວວ່າ: ໃນນາມສວ່ນໂຕ ແລະ ຕາງໜ້າໃຫ້ສະພາແຫ່ງຊາດ ຂໍກ່າວຕ້ອນຮັບສະຫາຍ ແລະ ບັນດາສະຫາຍຜູ້ແທນຂັ້ນສູງຂອງພັກກອມມູນນິດຫວຽດນາມ ແລະ ສະແດງຄວາມເສຍໃຈເປັນຢ່າງຍິ່ງກັບພັກ-ລັດ ແລະ ປະຊາຊົນ ສສ.ຫວຽດ ນາມ ໃນການສູນເສຍ ສະຫາຍ ໂດ ເມືອຍ ອະດີດເລຂາທິການໃຫຍ່ພັກກອມມູນນິດຫວຽດນາມ;  ຂ້າພະເຈົ້າຕີລາຄາສູງຕໍ່ການເດີນທາງມາຢ້ຽມຢາມ ແລະ ເຮັດວຽກໃນຄັ້ງນີ້ ເຊິ່ງເປັນການ ປະກອບສ່ວນຢ່າງຫ້າວຫັນ ເຂົ້າໃນການເພີ່ມພູນຄູນສ້າງສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງຊາດ ລາວ-ຫວຽດນາມ. ທ່ານຍັງໄດ້ສະແດງຄວາມຂອບໃຈຕໍ່ພັກກອມມູນນິດຫວຽດນາມທີ່ໃຫ້ການສະໜັບສະໜູນ ໃຫ້ການຊ່ວຍກ່ຽວກັບໂຄງການສ້າງສະພາແຫ່ງຊາດລາວ ຫລັງໃຫມ່.  

ສະຫາຍ ເຈິ່ນ ກວັກ ເວືອງ ໄດ້ສະແດງຄວາມຂອບໃຈໃນການຕ້ອນຮັບອັນອົບອຸ່ນ ແລະ ໄດ້ລາຍງານໂດຍຫຍໍ້ ກ່ຽວກັບການເດີນທາງມາຢ້ຽມຢາມໃນຄັ້ງນີ້, ທ່ານຍັງຍັງໄດ້ສະແດງຄວາມດີໃຈຫລາຍທີ່ ສປປລາວ ປະສົບຜົນສໍາເລັດອັນໃຫຍ່ຫລວງຫລາຍຢ່າງ ພາຍໃຕ້ການນໍາພາຂອງພັກປະຊາຊົນປະຕິວັດລາວ, ລັດຖະບານ ແລະ ສະພາແຫ່ງຊາດ. ສະຫາຍຍັງໄດ້ສະແດງຄວາມເສຍໃຈນໍາການສູນເສຍອັນໃຫຍ່ຫລວງກັບໄພພິບັດ ທີ່ເກີດຂຶ້ນ ທີ່ແຂວງອັດຕະປື ແລະ ເຊື່ອຫມັ້ນວ່າ ພາຍໃຕ້ການການພໍາຂອງພັກ, ລັດຖະບານ ແລະ ສະພາແຫ່ງຊາດລາວ ຈະນໍາພາປະຊາຊົນລາວກັບສູ່ສະພາບປົກກະຕິໃນໄວໆນີ້.

ຫລັງຈາກສໍາເລັດການພົບປະແລ້ວ ຄະນະຜູ້ແທນຂັ້ນສູງຂອງ ສສ.ຫວຽດນາມ ໄດ້ໄປຕິດຕາມເບິ່ງໂຄງການກໍ່ສ້າງຫໍສະພາແຫ່ງຊາດລາວ ຫັລງໃໝ່ ທີ່ກໍາລັງດໍາເນີນການກໍ່ສ້າງ.