ປະທານ ສພຊ ຢ້ຽມຢາມປະຊາຊົນທີ່ໄດ້ຮັບຜົນກະທົບຈາກໄພທຳມະຊາດ
08/10/2018

(ສພຊ) ວັນທີ 28 ກັນຍາ 2018, ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ (ສພຊ) ພ້ອມດ້ວຍຄະນະ ໄດ້ພົບປະຢ້ຽມຢາມປະຊາຊົນທີ່ຖືກຜົນກະທົບຈາກໄພທຳມະຊາດ ຢູ່ບ້ານໜອງຈອງ ເມືອງຈອມເພັດ ແຂວງຫລວງພະບາງ, ໂດຍສົມທົບກັບທ່ານ ຄຳຂັນ ຈັນທະວີສຸກ ເຈົ້າແຂວງຫລວງພະບາງ, ທ່ານ ສາຍສະໝອນ ຄົມທະວົງ ປະທານສະພາປະຊາຊົນແຂວງ (ສພຂ) ຫລວງພະບາງ ພ້ອມດ້ວຍຫົວໜ້າພະແນກການທີ່ກ່ຽວຂ້ອງຂອງແຂວງ, ມີເຈົ້າເມືອງຈອມເພັດ ແລະ ບັນດາຫົວໜ້າຫ້ອງການຂອງເມືອງ ຕະຫລອດຮອດປະຊາຊົນບັນດາເຜົ່າ ແລະ ນ້ອງນັກຮຽນໃຫ້ການຕ້ອນຮັບຢູ່ເດີ່ນໂຮງຮຽນມັດທະຍົມສົມບູນ ບ້ານໜອງຈອງ.

ໂອກາດນີ້, ທ່ານ ຈັນ ວັນນະສີ ເຈົ້າເມືອງໆຈອມເພັດ ໄດ້ລາຍງານສະພາບຄວາມເສຍຫາຍຈາກໄພນ້ຳຖ້ວມ ວ່າ: ໃນໄລຍະລະດູຝົນປີ 2018 ເມືອງຈອມເພັດໄດ້ຮັບຜົນກະທົບຈາກໄພພິບັດທາງທຳມະຊາດຫລາຍບ້ານທີ່ໄດ້ຮັບຜົນເສຍຫາຍ ເປັນຕົ້ນ: ແມ່ນດິນເຊາະເຈື່ອນທັບເສັ້ນທາງຈຳນວນ 12 ເສັ້ນ, ມີຄວາມຍາວເກືອບ 183 ກິໂລແມັດ, ມູນຄ່າ 20 ຕື້ກວ່າກີບ, ເຮືອນເປ່ເພ 21 ຫລັງ ມູນຄ່າ 567 ລ້ານກວ່າກີບ, ຊົນລະປະທານ 11 ແຫ່ງ ມູນຄ່າ 1 ຕື້ກວ່າກີບ, ຄອງເໝືອງເປ່ເພ 9 ແຫ່ງ ມູນຄ່າ 710 ລ້ານກີບ; ນອກນີ້ ຍັງມີເນື້ອທີ່ທຳການຜະລິດ ແລະ ຜົນຜະລິດຂອງປະຊາຊົນຖືກເສຍຫາຍເຊັ່ນ: ເນື້ອທີ່ນາ 46 ເຮັກຕາກວ່າ, ດິນເຈື່ອນ 7,4 ເຮັກຕາ ແລະ ດິນຖົມ 4,2 ເຮັກຕາ, ພືດຜັກຕ່າງໆ 32.000 ໂຕນ ລວມມູນຄ່າເສຍຫາຍ 567 ລ້ານກວ່າກີບ ແລະ ສັດລ້ຽງຖືກຜົນກະທົບເສຍຫາຍມູນຄ່າເກືອບ 40 ລ້ານກີບ; ສະເພາະຢູ່ບ້ານໜອງຈອງ ເນື້ອທີ່ນາຖືກນ້ຳຖ້ວມ 15 ຄອບຄົວ, ລວມທັງໝົດ 14,35 ເຮັກຕາ ມູນຄ່າ 167 ລ້ານກີບ, ເຮືອນເປ່ເພ 3 ຫລັງ ມູນຄ່າ 20 ລ້ານກວ່າກີບ ແລະ ສັດລ້ຽງສູນຫາຍເປັນມູນຄ່າ 2 ລ້ານກີບ.

ໂອກາດດັ່ງກ່າວ, ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມເຫັນອົກເຫັນໃຈ ແລະ ເສຍໃຈຕໍ່ກັບເຫດການທີ່ເກີດຂຶ້ນໃນປີນີ້, ພ້ອມທັງກ່າວສະແດງຄວາມຍ້ອງຍໍຊົມເຊີຍຕໍ່ທາງອົງການປົກຄອງເມືອງ ແລະ ປະຊາຊົນບັນດາເຜົ່າ ທີ່ໄດ້ພ້ອມກັນສຸມໃສ່ແກ້ໄຂໃຫ້ທັນການ, ພ້ອມນີ້ ທ່ານໄດ້ເນັ້ນໃຫ້ອົງການຄອງເມືອງ ແລະ ອົງການປົກຄອງບ້ານ ຕະຫລອດຮອດປະຊາຊົນບັນດາເຜົ່າ ສືບຕໍ່ແກ້ໄຂ ແລະ ຊ່ວຍເຫລືອເຊິ່ງກັນ ແລະ ກັນ ເພື່ອຟື້ນຟູໄພພິບັດທີ່ເກີດຂຶ້ນໃນປີນີ້ ໃຫ້ກັບຄືນສູ່ສະພາບປົກກະຕິໂດຍໄວ, ສໍາຄັນ ແມ່ນຕ້ອງມີການສ້າງແຜນເພື່ອຮັບມືກັບໄພພິບັດທີ່ອາດຈະເກີດຂຶ້ນໃນຕໍ່ໜ້າ ເພື່ອໃຫ້ໄດ້ຮັບຜົນກະທົບໜ້ອຍທີ່ສຸດ.

ໃນການລົງຢ້ຽມຢາມຄັ້ງນີ້ ທ່ານ ນາງ ປານີ ຢາທໍ່ຕູ້ ຍັງໄດ້ນຳເອົາຄວາມຄິດເຫັນ ແລະ ຄໍາສະເໜີຕ່າງໆຂອງອົງການປົກຄອງເມືອງ, ອົງການປົກຄອງບ້ານ ແລະ ປະຊາຊົນບັນດາເຜົ່າ ໄປພິຈາລະຈາຄົ້ນຄວ້າ ແລະ ສະເໜີຕໍ່ລັດຖະບານເພື່ອຊ່ວຍແກ້ໄຂ. ໂອກາດນີ້ທ່ານຍັງໄດ້ຢ້ຽມຢາມ ນໍ້າຕົກຕາດຮ້ອຍຄົວ ແລະ ສວນດອກໄມ້ນາໆຊະນິດ ແຫລ່ງທ່ອງທ່ຽວຂອງເມືອງຈອມເພັດຕື່ມອີກ.

(ເພັດສາຄອນ ສິມມະວົງ)