ສພຊ ປິດ​ຊຸດ​ເຝິກອົບ​ຮົມ​ທິດສະ​ດີກາ​ນ​​ເມືອງ ​ແລະ ການ​ປົກຄອງ ​ໄລຍະ​ສັ້ນ 45 ວັນ ຊຸດ​ທີ IV
03/10/2018

       (ສພຊ) ຕອນ​ບ່າຍ​ວັນທີ 1 ຕຸລາ 2018, ທີ່​ຫ້ອງ​ປະຊຸມ​ຄະນະ​ເລຂາທິການ​ສະພາ​ແຫ່ງ​ຊາດ (ຫລັກ 6) ນະຄອນຫລວງ​ວຽງຈັນ ​ໄດ້​ມີ​ພິທີ​ປິດ​ຊຸດ​ເຝິກອົບ​ຮົມ​ທິດສະ​ດີກາ​ນ​​ເມືອງ ​ແລະ ການ​ປົກຄອງ ​ໄລຍະ​ສັ້ນ 45 ວັນ ຊຸດ​ທີ IV ​ໃຫ້​ແກ່​ສະມາຊິກ​ພັກ-ພະນັກງານ​ຂອງສະພາ​ແຫ່ງ​ຊາດ ​ໂດຍ​ການ​ເປັນ​ປະທານ​ຂອງ​ສະຫາຍ ນາງ ສີ​ໃສ ລື​ເດດ​ມູນ​ສອນ ຮອງເລຂາຄະນະບໍລິຫານງານ​ພັກສະພາແຫ່ງຊາດ, ຮອງ​ປະທານ​ສະພາ​ແຫ່ງ​ຊາດ; ມີ​ສະຫາຍ​ ສະ​ມຸດ​ທອງ ສົມ​ພານິດ ຄະນະ​ພັກ, ຮອງ​ຫົວຫນ້າ​ສະ​ຖາ​ບັນ​ການ​ເມືອງ ​ແລະ ການ​ປົກ​ຄອງ​ແຫ່ງ​ຊາດ, ສະຫາຍ ​ເຄນ ລໍ​ວັນ​ໄຊ ຮອງ​ເລຂາ​ຄະນະ​ພັກ ຮອງ​ປະທານ​ອົງການ​ກວດ​ສອບ​ແຫ່ງ​ລັດ,  ມີບັນດາຄະນະ​ພັກ​ສະພາ​ແຫ່ງ​ຊາດ, ຜູ້ຕາງຫນ້າ​ໜ່ວຍ​ພັກ, ສະມາຊິກ​ພັກ, ຕາງໜ້າອົງການ​ຈັດ​ຕັ້ງ​ມະຫາຊົນ ​ແລະ ນັກ​ເຝິກອົບຮົມ ​ແລະ ພະນັກງານ​ທີ່​ກ່ຽວຂ້ອງ ເຂົ້າຮ່ວມ.

        ​ໃນ​ພິທີ, ທ່ານ ນາງ ປິ່ງ​ຄຳ​ ລາຊະ​ສິມມ​າ ​ຄະນະພັກສະພາແຫ່ງຊາດ ໄດ້​ຜ່ານ​ບົດ​ສະຫລຸບ​ການ​ເຝິກອົບຮົມ​ທິດ​ສະ​ດີກາ​ນ​ເມືອງ ​ແລະ ການ​ປົກຄອງ ​ໄລຍະ​ສັ້ນ 45 ວັນ ຂອງ​ສະພາ​ແຫ່ງ​ຊາດ ຊຸດທີ IV. ຫລັງຈາກນັ້ນ, ກໍໄດ້ມີພິທີມອບໃບຢັ້ງຢືນໃຫ້ແກ່ນັກເຝິກອົບຮົມ ທັງໝົດ 34 ສະຫາຍ ຍິງ 18 ສະຫາຍ, ໃນນັ້ນ ເປັນພະນັກງານຫລັກແຫລ່ງຂອງໜ່ວຍພັກຮາກຖານອ້ອມຂ້າງຄະນະພັກສະພາແຫ່ງຊາດ 29 ສະຫາຍ ຍິງ 16 ສະຫາຍ, ເປັນສະມາຊິກພັກສົມບູນ 15 ສະຫາຍ ຍິງ 6 ສະຫາຍ, ສະມາຊິກພັກສໍາຮອງ 14 ສະຫາຍ ຍິງ 7 ສະຫາຍ, ມະຫາຊົນ 5 ສະຫາຍ ຍິງ 4 ສະຫາຍ ແລະ ມາຈາກອົງຄະນະພັກອົງການກວດສອບແຫ່ງລັດ ເຊິ່ງເປັນສະມາຊິກພັກສົມບູນ 5 ສະຫາຍ ຍິງ 2 ສະຫາຍ, ເຊິ່ງມອບໂດຍສະຫາຍ ນາງ ສີໃສ ລືເດດມູນສອນ ແລະ ສະຫາຍ ສະມຸດທອງ ສົມພານິດ.

        ຜ່ານການເຝິກອົບຮົມດັ່ງກ່າວ ນັກເຝິກອົບຮົມໄດ້ມີ​ຄວາມ​ຮັບ​ຮູ້​ຢ່າງ​ເປັນ​ລະບົບ ​ແລະ​ ເຂົ້າ​ໃຈ​ຈະ​ແຈ້ງ​ ​ກ່ຽວ​ກັບ​ບັນດາ​ຫລັກ​ມູນ​ພື້ນ​ຖານຂອງ​ທິດ​ສະ​ດີ​ມາກ​-​ເລ​ນິນ ​ໃນ​ເງື່ອນ​ໄຂ​ໃໝ່; ​ເຂົ້າ​ໃຈ​ຈະ​ແຈ້ງ​ ກ່ຽວ​ກັບ​ແນວ​ທາງການ​ປ່ຽນ​ແປງ​ໃໝ່​ຮອບດ້ານ ຢ່າ​ງມີ​ຫລັກການ​ຂອງ​ພັກ​ເຮົາ ​ແລະ ​ກຳ​ແໜ້ນ​ຕື່ມ​ກ່ຽວ​ກັບ​ບົດບາດ​ການ​ນຳ​ພາ​ຂອງ​ພັກ ​ແລະ​ ການ​ຄຸ້ມ​ຄອງ​ຂອງ​ລັດ​ຕໍ່​ກົນ​​ໄກ​ເສດຖະກິດ​ຕະຫລາດ ​ແລະ ​ນະ​​ໂຍບາຍ​ສັງຄົມ​ຈຳນວນ​ໜຶ່ງ. ນອກຈາກ​ນັ້ນ,  ຍັງ​ເຫັນ​ໄດ້​ຈຸ​ດໝາຍ​ກ້າວ​ຂຶ້ນ​ໄປຕາມ​ເສັ້ນທາງ​ສັງຄົມ​ນິຍົມເທື່ອ​ລະ​ກ້າວ ຂອງ​ພັກ​ເຮົາ,​ ເຫັນ​ໄດ້​ຢ່າງ​ຈະ​ແຈ້ງ​ຕໍ່​ກົນ​ອຸບາຍ​ຂອງ​ສັດຕູ ​ແລະ ​ອິດ​ທິກຳລັງ​ປໍ​ລະ​ປັກ​ທີ່​ຢາກ​ຫັນປ່ຽນ​ພວກ​ເຮົາ​ໂດຍ​ສັນຕິ; ເຮັດ​ໃຫ້​ນັກ​ເຝິກອົບຮົມ​ຂອງ 2  ອົງການ ເບິ່ງບັນຫາຢ່າງພາວະວິໄສ ແລະ ມີວິທະຍາສາດ, ມີທັດ​ສະ​ນະຫລັກ​ໝັ້ນ ​ແລະ ​ມີ​ວິ​ໄສ​ທັດ ຕາມແນວທາງນະໂຍບາຍຂອງພັກ-ລັດ.

       ຜ່ານການປະເມີນຄວາມຮັບຮູ້ ເຫັນວ່າມີຫລາຍສະຫາຍປະເມີນຕົນເອງແບບພາວະວິໄສ  ການປະເມີນຄວາມຮັບຮູ້ຕົນເອງສູງສຸດ 100% ແລະ ຕໍ່າສຸດ 60% ແລະ  ການປະເມີນສະເລ່ຍ 79,7%, ສ່ວນການຕີລາຄາການປະເມີນຜົນການສິດສອນຂອງອາຈານທັງໝົດ 30 ທ່ານ ແມ່ນຈັດໃນປະເພດດີຫລາຍເຊັ່ນ: ການສົ່ງຄວາມຮູ້ໄດ້ 88%, ການອະທິບາຍສົມທຽບໄດ້ 85% ແລະ ບັນຍາກາດໃນການສິດສອນໄດ້ 84%. ຜ່ານການປ້ອງກັນບົດເກັບກ່ຽວຄວາມຮັບຮູ້ ຄະນະກຳມະການປ້ອງກັນບົດໄດ້ໃຫ້ຂຶ້ນປ້ອງກັນບົດເປັນລາຍບຸກຄົນ ໂດຍຈັດຕີລາຄາຄວາມຮັບຮູ້ຂອງນັກເຝິກ ປະເພດດີເລີດ 1 ສະຫາຍ, ປະເພດດີຫລາຍ 25 ສະຫາຍ ຍິງ 13 ສະຫາຍ, ປະເພດດີ 8 ສະຫາຍ ຍິງ 5 ສະຫາຍ. ສ່ວນຜົນການຕີລາຄາຂອງຄະນະຮັບຜິດຊອບເຝິກອົບຮົມ ໄດ້ຈັດປະເພດດີຫລາຍ 26 ສະຫາຍ ຍິງ 13 ສະຫາຍ ເທົ່າກັບ 76,47%, ດີ 8 ສະຫາຍ ຍິງ 5 ສະຫາຍ ເທົ່າກັບ 23,53%; ນັກເຝິກອົບຮົມໄດ້ຮຽນຮູ້ກ່ຽວກັບວຽກງານຂອງສະພາແຫ່ງຊາດ ແລະ ການນຳພາຮອບດ້ານຂອງຄະນະພັກສະພາແຫ່ງຊາດ ໂດຍການຂຶ້ນຫ້ອງເພີ່ມຂອງກຳມະການຄະນະພັກສະພາແຫ່ງຊາດໄດ້ເຮັດໃຫ້ນັກເຝິກອົບຮົມມີຄວາມເຂົ້າໃຈເລິກເຊິ່ງກ່ຽວກັບວຽກງານຂອງສະພາແຫ່ງຊາດ ແລະ ການນຳພາຂອງຄະນະພັກ; ​ເຮັດ​ໃຫ້​ສະມາຊິກ​ພັກຂອງ​ຄະນະ​ບໍລິຫານ​ງານ​ພັກ​ສະພາ​ແຫ່ງ​ຊາດ ​ໄດ້​ຜ່ານ​ການ​ບໍຳລຸງ​ທິດ​ສະ​ດີກາ​ນ​ເມືອງ-ການ​ປົກຄອງ ​ເພີ່ມ​ຂຶ້ນ 8,8% ທຽບ​ໃສ່ພາຍຫລັງການເຝິກອົບຮົມທິດສະດີການເມືອງ ແລະ ການປົກຄອງ ຊຸດທີ III ຂອງສະພາແຫ່ງຊາດ ຫລື ກວມ 94,9% ຂອງ​ສະມາຊິກ​ພັກ​ທັງ​ໝົດຂອງສະພາແຫ່ງຊາດ; ມີ​ສະຖານ​ທີ່​ພ້ອມ​ດ້ວຍ​ອຸປະກອນ​ຮັບ​ໃຊ້ໃນ​ການ​ເຝິກ​ອົບຮົມຄົບ​ຖ້ວນ​ພໍ​ສົມຄວນ.