ສພຊ ທາບທາມບຸກຄະລາກອນເຂົ້າໃນແຜນກໍານົດພະນັກງານນໍາພາ-ຄຸ້ມຄອງ ປະເພດທີ 1(ຮອບທີ I)
28/09/2018

(ສພຊ) ໃນຕອນບ່າຍວັນທີ 26 ກັນຍາ 2018, ສະພາແຫ່ງຊາດ (ສພຊ) ໄດ້ຈັດກອງປະຊຸມທາບທາມແຜນກໍານົດພະນັກງານນໍາພາ-ຄຸ້ມຄອງ ປະເພດທີ 1 (ຮອບທີ I ແຜນ 1.2, 1.3 ແລະ 1.4)  ພາຍໃນ ສພຊ ທີ່ຂຶ້ນກັບສິດຄຸ້ມຄອງຂອງກົມການເມືອງສູນກາງພັກ ແລະ ຄະນະເລຂາທິການສູນກາງພັກ, ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6) ນະຄອນຫລວງວຽງຈັນ ໂດຍການເປັນປະທານຂອງສະຫາຍ ແສງນວນ ໄຊຍະລາດ ເລຂາທິການສູນກາງພັກ, ເລຂາຄະນະພັກສະພາແຫ່ງຊາດ, ຮອງປະທານສະພາແຫ່ງຊາດ, ຫົວໜ້າຄະນະຮັບຜິດຊອບຂຶ້ນແຜນກໍານົດພະນັກງານນໍາພາ-ຄຸ້ມຄອງ ປະເພດທີ 1; ເຂົ້າຮ່ວມມີສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ, ສະຫາຍ ສົມພັນ ແພງຄໍາມີ ກໍາມະການສູນກາງພັກ, ຮອງປະທານສະພາແຫ່ງຊາດ, ສະຫາຍ ບຸນປອນ ບຸດຕະນະວົງ ກໍາມະການສູນກາງພັກ, ຮອງປະທານສະພາແຫ່ງຊາດ, ສະຫາຍ ນາງ ສີໃສ ລືເດດມູນສອນ ກໍາມະການສູນກາງພັກ, ຮອງປະທານສະພາແຫ່ງຊາດ; ມີບັນດາປະທານ-ຮອງປະທານກໍາມາທິການ, ຫົວໜ້າສະຖາບັນ, ຫົວໜ້າ-ຮອງຫົວໜ້າກົມ ແລະ ຫົວໜ້າ-ຮອງຫົວໜ້າພະແນກ ເຂົ້າຮ່ວມຢ່າງພ້ອມພຽງ.

        ໃນກອງປະຊຸມ, ສະຫາຍ ນາງ ສີໃສ ລືເດດມູນສອນ ໄດ້ລາຍງານສັງລວມບາງເນື້ອໃນເອກະສານ ທີ່ເປັນບ່ອນອີງໃນການທາບທາມບຸກຄະລາກອນເຂົ້າໃນແຜນກໍານົດພະນັກງານນໍາພາ-ຄຸ້ມຄອງ ປະເພດທີ 1 ພາຍໃນສະພາແຫ່ງຊາດ; ຜ່ານແຜນການກະກຽມສ້າງແຜນກໍານົດພະນັກງານການນໍາພາປະເພດທີ 1 ທີ່ຂຶ້ນກັບສິດຄຸ້ມຄອງຂອງກົມການເມືອງ ແລະ ຄະນະເລຂາທິການສູນກາງພັກ ແລະ ຜ່ານມະຕິຕົກລົງແຕ່ງຕັ້ງຄະນະຮັບຜິດຊອບຂຶ້ນແຜນກໍານົດສ້າງພະນັກງານນໍາພາ-ຄຸ້ມຄອງຂອງສະພາແຫ່ງຊາດ.

ຫລັງຈາກນັ້ນ, ສະຫາຍ ແສງນວນ ໄຊຍະລາດ ໄດ້ຜ່ານມາດຕະຖານຕໍາແໜ່ງປະເພດ ຕ່າງໆ ຂອງແຜນກໍານົດພະນັກງານນໍາພາ-ຄຸ້ມຄອງ ປະເພດທີ 1. ຈາກນັ້ນ, ຄະນະກອງເລຂາ ກໍໄດ້ແຈກຢາຍບັດທາບທາມ ແລະ ດໍາເນີນການທາບທາມຕົວຈິງ ເຊິ່ງໃນການທາບທາມນີ້ ໄດ້ເລືອກພະນັກງານອາຍຸບໍ່ໃຫ້ກາຍ 55 ປີ ເພື່ອເຂົ້າແຜນກຳນົດພະນັກງານນຳພາ-ຄຸ້ມຄອງ ປະເພດທີ 1 (ຮອບທີ I).