ຄະນະຜູ້ແທນ ສພຊ ເຂົ້າຮ່ວມງານວາງສະແດງສາກົນພາກຕະເວັນຕົກ ຄັ້ງທີ 17
27/09/2018

(ສພຊ) ລະຫວ່າງວັນທີ 20-24 ກັນຍາ 2018 ທີ່ແຂວງເຊສວນ, ສປຈີນ ຄະນະຜູ້ແທນຂັ້ນສູງຂອງສະພາແຫ່ງຊາດລາວ ນໍາໂດຍສະຫາຍ ນາງ ສີໃສ ລືເດດມູນສອນ ກໍາມະການສູນກາງພັກ, ຮອງປະທານສະພາແຫ່ງຊາດ (ສພຊ) ໄດ້ເຂົ້າຮ່ວມງານວາງສະແດງສາກົນພາກຕະເວັນຕົກ ຄັ້ງທີ 17 ຕາມການເຊື້ອເຊີນໃນຖານະເປັນແຂກກິດຕິມະສັກຂອງເຈົ້າພາບ.

ການຈັດງານວາງສະແດງສາກົນຄັ້ງນີ້, ເປັນການຈັດຕັ້ງປະຕິບັດຍຸດທະສາດການພັດທະນາພາກຕາເວັນຕົກຂອງປະເທດຈີນ, ເຊິ່ງປີນີ້ຈັດຂຶ້ນພາຍໃຕ້ຄໍາຂວັນທີ່ວ່າ: “ຮ່ວມເປັນເຈົ້າພາບ, ຮ່ວມແບ່ງປັນ ແລະ ທຸກຝ່າຍໄດ້ປະໂຫຍດ” (Co-hosting, sharing and win-win) ຜູ້ໃຫ້ການສະໜັບສະໜູນໃນການຈັດງານວາງສະແດງສາກົນ ຄັ້ງທີ 17 ປະກອບມີ: ຄະນະກຳມະການປະຕິຮູບ ແລະ ການພັດທະນາແຫ່ງຊາດ, ກະຊວງການຄ້າ, ກະຊວງວິທະຍາສາດ ແລະ ເຕັກໂນໂລຊີ, ອົງການບໍລິຫານອຸດສາຫະກຳ ແລະ ການຄ້າແຫ່ງລັດ ຂອງ ສປຈີນ ຮ່ວມກັບອຳນາດການປົກຄອງຂອງແຂວງເຊສວນ ແລະ 12 ມົນທົນຕາເວັນຕົກຂອງຈີນ ຮ່ວມກັນຈັດຂຶ້ນຢ່າງຍິ່ງໃຫຍ່.  

ເຂົ້າຮ່ວມໃນງານວາງສະແດງສາກົນຄັ້ງນີ້ ມີ 60.000 ຄົນ ຈາກ 91 ປະເທດ ແລະ ພາກພື້ນ ລວມທັງ ສປປລາວ; ໃນນີ້, ຈຳນວນ 20.000 ຄົນ ແມ່ນມາຈາກພາຍໃນປະເທດ ແລະ ໄດ້ມີການເຊັນສັນຍາໂຄງການລົງທຶນເຖິງ 1.008 ໂຄງການ, ມີການວາງສະແດງສິນຄ້າທັງໝົດ 9.027 ລາຍການ ຈາກ 76 ປະເທດ; ໃນນັ້ນ, ມີການວາງສະແດງຈາກຕ່າງປະເທດ 2.347 ລາຍການ ໂດຍໃຊ້ງົບປະມານໃນການຈັດງານວາງສະແດງສາກົນຄັ້ງນີ້ສູງເຖິງ 78 ພັນຕື້ກວ່າຢວນ.

ໃນວາລະເຂົ້າຮ່ວມງານວາງສະແດງດັ່ງກ່າວ, ສະຫາຍ ນາງ ສີໃສ ລືເດດມູນສອນ ໄດ້ເຂົ້າຢ້ຽມຢາມພົບປະກັບທ່ານ ຫູ ຊູນຮົວ ຮອງນາຍົກລັດຖະມົນຕີແຫ່ງ ສປຈີນ ແລະ ທ່ານ ຢິນລີ້ ເຈົ້າແຂວງໆເຊສວນ ເຊິ່ງທ່ານຮອງປະທານ ສພຊ ໄດ້ສະແດງຄວາມຂອບໃຈຕໍ່ການເຊື້ອເຊີນຄະນະຜູ້ແທນຈາກ ສພຊ ແຫ່ງ ສປປລາວ ມາຮ່ວມງານວາງສະແດງສາກົນ ແລະ ໃຫ້ການຕ້ອນຮັບຢ່າງອົບອຸ່ນ ແລະ ສະໜິດສະໜົມຈາກການນຳພັກ-ລັດ ກໍຄືອຳນາດການປົກຄອງແຂວງເຊສວນ ພ້ອມທັງຍ້ອງຍໍຊົມເຊີຍ ແລະ ຕີລາຄາສູງຕໍ່ການກະກຽມຈັດງານວາງສະແດງອັນຍິ່ງໃຫຍ່ລະດັບໂລກດ້ວຍຜົນສໍາເລັດອັນຈົບງາມ ໂດຍມີຫລາຍປະເທດໃຫ້ຄວາມສົນໃຈເຂົ້າຮ່ວມ ເຊິ່ງໄດ້ສະທ້ອນໃຫ້ເຫັນເຖິງຜົນສຳເລັດອັນຍິ່ງໃຫຍ່ຮອບດ້ານຈາກການຈັດຕັ້ງປະຕິບັດນະໂຍບາຍເປີດປະຕູສູ່ໂລກພາຍນອກ ໂດຍສະເພາະແມ່ນການຈັດຕັ້ງປະຕິບັດຍຸດທະສາດການພັດທະນາພາກຕາເວັນຕົກຂອງ ສປຈີນ. ພ້ອມດຽວກັນນັ້ນ, ຝ່າຍຈີນເຈົ້າພາບ ກໍໄດ້ສະແດງຄວາມຂອບໃຈ ທີ່ ສປປລາວ ໃຫ້ກຽດຕອບຮັບຄຳເຊີນເຂົ້າຮ່ວມງານດັ່ງກ່າວ ພ້ອມທັງສະແດງຄວາມຊົມເຊີຍຕໍ່ບົດບາດຂອງສະພາແຫ່ງຊາດລາວ ໃນການຊຸກຍູ້ສົ່ງເສີມການຈັດຕັ້ງປະຕິບັດທິດຊີ້ນຳຂອງການນຳສູງສຸດຂອງສອງປະເທດ ໃຫ້ແຕກດອກອອກຜົນ.

ນອກຈາກນີ້, ຄະນະຜູ້ແທນສະພາແຫ່ງຊາດລາວ ຍັງໄດ້ເຄື່ອນໄຫວຢ້ຽມຢາມພື້ນຖານເສດຖະກິດ, ສັງຄົມ ແລະ ວັດທະນະທຳ ຢູ່ນະຄອນເສິນຕູ ແຂວງເຊສວນ.