ຮອງປະທານ ສພຊ ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 5 ຢູ່ແຂວງບໍລິຄຳໄຊ
27/09/2018

(ສພຊ) ລະຫວ່າງວັນທີ 17-21 ກັນຍາ 2018, ທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ (ສພຊ) ທັງເປັນສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 11 ແຂວງບໍລິຄຳໄຊ, ທ່ານ ນາງ ສີໄຄ ສີປະເສີດ ຮອງປະທານສະພາປະຊາຊົນແຂວງ ພ້ອມດ້ວຍສະມາຊິກສະພາປະຊາຊົນແຂວງ (ສສຂ) ປະຈຳເມືອງ ໄດ້ເຄື່ອນໄຫວເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ແລະ ຜົນສຳເລັດກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງບໍລິຄໍາໄຊ ຊຸດທີ I ຢູ່ເມືອງປາກກະດິງ ແລະ ເມືອງບໍລິຄັນ ລວມທັງໝົດ 10 ຈຸດ, ມີ 2 ສຳນັກເມືອງ, 2 ກົມກອງ, 3 ໂຮງຮຽນ ແລະ 4 ບ້ານ, ມີຜູ້ເຂົ້າຮ່ວມຮັບຟັງທັງໝົດ 1.398 ຄົນ ຍິງ 438 ຄົນ.

ການລົງເຄື່ອນໄຫວເຜີຍແຜ່ໃນຄັ້ງນີ້ ທ່ານຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ຮັບຟັງການລາຍງານໂດຍຫຍໍ້ກ່ຽວກັບສະພາບການພັດທະນາເສດຖະກິດ-ສັງຄົມຂອງເມືອງ ແລະ ຂອງບ້ານ; ຈາກນັ້ນ, ສສຊ ແລະ ສສຂ ກໍໄດ້ຜັດປ່ຽນກັນເຜີຍແຜ່ຜົນສຳເລັດຂອງກອງປະຊຸມ ເປັນຕົ້ນບັນດາບັນຫາສຳຄັນຕ່າງໆທີ່ໄດ້ຮັບຮອງເອົາໃນກອງປະຊຸມ ແລະ ຍັງໃຫ້ຮູ້ກ່ຽວກັບການປັບປຸງກົງຈັກການຈັດຕັ້ງ, ​ສິດ ແລະ ພາລະບົດບາດຂອງ ສສຊ ປະຈຳເຂດເລືອກຕັ້ງ ແລະ ສສຂ ໃນການເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ; ພ້ອມທັງເປີດໂອກາດໃຫ້ພໍ່ແມ່ປະຊາຊົນໄດ້ປະກອບຄຳຄິດຄຳເຫັນ ແລະ ຄຳສະເໜີບາງບັນຫາທີ່ຂັດຂ້ອງໝອງໃຈຈຳນວນໜຶ່ງ ເຊັ່ນ: ຜົນກະທົບດ້ານສິ່ງແວດລ້ອມ​, ບັນຫາພື້ນຖານໂຄງລ່າງ, ເສັ້ນທາງ, ຊົນລະປະທານ, ນໍ້າລິນ, ນ້ຳກິນ-ນ້ຳໃຊ້, ໄຟຟ້າ, ສຸກສາລາ, ໂຮງຮຽນ ແລະ ບັນຫາອື່ນໆ.  ຈາກນັ້ນ, ບັນດາທ່ານ ສສຊ ແລະ ສສຂ ກໍໄດ້ຊີ້ແຈງໃຫ້ຄວາມກະຈ່າງແຈ້ງຕໍ່ຄຳສະເໜີຂອງພໍ່ແມ່ປະຊາຊົນ ແລະ ກໍໄດ້ເນັ້ນໃຫ້ພໍ່ແມ່ປະຊາຊົນ ຈົ່ງມີຄວາມສາມັກຄີຮັກແພງປອງດອງ ຊ່ວຍເຫລືອເຊິ່ງກັນ ແລະ ກັນ ເອົາໃຈໃສ່ສືບຕໍ່ສ້າງເສດຖະກິດຄອບຄົວໃຫ້ມີຄວາມເຂັ້ມແຂງ ເພື່ອໃຫ້ຊີວິດການເປັນຢູ່ດີຂຶ້ນເປັນກ້າວໆ.

ພ້ອມດຽວກັນນັ້ນ,  ສສຊ ປະຈໍາເຂດເລືອກຕັ້ງ ຍັງໄດ້ນໍາເອົາເຄື່ອງຊ່ວຍເຫລືອມອບໃຫ້ພໍ່ແມ່ປະຊາຊົນຢູ່ບັນດາບ້ານທີ່ໄດ້ຮັບຜົນກະທົບຈາກໄພນໍ້າຖ້ວມເຊັ່ນ: ເຄື່ອງນຸ່ງຫົ່ມ, ເຂົ້າສານ, ໝີ່ສຳເລັດຮູບ ແລະ ອຸປະກອນຫລິ້ນກິລາຈຳນວນໜຶ່ງ.