ປະທານສະພາແຫ່ງຊາດ ເຂົ້າຮ່ວມກອງປະຊຸມເວທີປຶກສາຫາລື ແມ່ຍິງເອີຣົບ-ອາຊີ ຄັ້ງທີ 2
24/09/2018

ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ນຳພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມເວທີປຶກສາຫາລືແມ່ຍິງເອີຣົບ-ອາຊີ ຄັ້ງທີ 2 ພາຍໃຕ້ຫົວຂໍ້ "ແມ່ຍິງກັບຄວາມໝັ້ນຄົງຂອງໂລກ ແລະ ການພັດທະນາແບບຍືນຍົງ" ຈັດຂຶ້ນທີ່ນະຄອນຊັງປີເຕີສະເບີກ ສະຫະພັນຣັດເຊຍ ແຕ່ວັນທີ 20-21 ກັນຍານີ້.
    ໃນໂອກາດເຂົ້າຮ່ວມກອງປະຊຸມດັ່ງກ່າວ ທ່ານ ນາງປານີ ຢາທໍ່ຕູ້ ໄດ້ກ່າວປາໄສຕໍ່ກອງປະຊຸມໃນວັນທີ 20 ກັນຍາວ່າ: ບັນຫາສັນຕິພາບ, ຄວາມໝັ້ນຄົງ ແລະ ການພັດທະນາແບບຍືນຍົງ ເປັນສອງບັນຫາທີ່ມີສາຍພົວພັນກະທົບຊຶ່ງກັນ ແລະ ກັນ ທີ່ກໍາລັງກາຍເປັນຄວາມເປັນຫ່ວງເປັນໄຍ ແລະ ສິ່ງທ້າທາຍອັນໃຫຍ່ຫຼວງຕໍ່ທຸກປະເທດທົ່ວໂລກ. ການປົກປັກຮັກສາສັນຕິພາບ ແລະ ຄວາມໝັ້ນຄົງພາຍໃນປະເທດເປັນພື້ນຖານ ແລະ ກໍາລັງແຮງພັກດັນການພັດທະນາແບບຍືນຍົງ, ແຕ່ກົງກັນຂ້າມ ຖ້າປະເທດຊາດຫາກຂາດຄວາມໝັ້ນຄົງ ກໍ່ບໍ່ສາມາດສ້າງສາພັດທະນາເສດຖະກິດ-ສັງຄົມ ໃຫ້ມີຄວາມກ້າວໜ້າໄດ້, ຕໍ່ກັບບົດບາດຂອງແມ່ຍິງ ກັບຄວາມໝັ້ນຄົງ ແລະ ການພັດທະນາແບບຍືນຍົງ, ອົງການລັດຖະສະພາພາກພື້ນ ແລະ ສາກົນຕ່າງໆ ໄດ້ມີການປຶກສາຫາລືກັນມາຫຼາຍຄັ້ງ ໂດຍສະເພາະໃນກອງປະຊຸມເວທີປຶກສາຫາລືແມ່ຍິງອາຊີ-ເອີຣົບ ຄັ້ງທີ 1 ຊຶ່ງຈັດຂຶ້ນໃນປີ 2015 ທີ່ນະຄອນຊັງປີເຕີສະເບີກ ສະຫະພັນຣັດເຊຍ ກໍ່ໄດ້ຕີລາຄາ ແລະ ຮັບຮູ້ຮ່ວມກັນວ່າ ແມ່ຍິງເປັນສ່ວນປະກອບທີ່ຈໍາເປັນ ແລະ ມີບົດບາດສໍາຄັນໃນການຕັດສິນບັນຫາທາງດ້ານການເມືອງ, ເສດຖະກິດ, ວັດທະນະທໍາ-ສັງຄົມ ແລະ ຄອບຄົວ ຊຶ່ງປະຕິເສດບໍ່ໄດ້ວ່າປັດຈຸບັນສັງຄົມ ຍັງຕ້ອງການຟື້ນຟູທາງດ້ານແນວຄິດ ແລະ ຫຼັກຈາລິຍະທໍາ ເພື່ອສົ່ງເສີມສະຖາບັນຄອບຄົວທີ່ເຂັ້ມແຂງ ແລະ ປະຊາຄົມທີ່ມີການພັດທະນາແບບຍືນຍົງ ຊຶ່ງເວທີແຫ່ງນີ້ໄດ້ສ້າງມິຕິໃໝ່ແຫ່ງການປຶກສາຫາລືລະຫວ່າງຊາດ ໃນບັນຫາທີ່ກ່ຽວຂ້ອງກັບບົດບາດຂອງແມ່ຍິງ ແລະ ການພັດທະນາແບບຍືນຍົງ.
    ເວທີປຶກສາຫາລືແມ່ຍິງອາຊີ-ເອີຣົບ ເປັນເວທີໜຶ່ງທີ່ມີບົດບາດສໍາຄັນໃນການສ້າງໂອກາດໃຫ້ບັນດາທ່ານຜູ້ນໍາເພດຍິງ ໄດ້ປຶກສາຫາລື ແລກປ່ຽນຄໍາຄິດຄໍາເຫັນ ແລະ ປະສົບການນໍາກັນ ເພື່ອຮ່ວມກັນຊອກຫາຊ່ອງທາງໃນການຊຸກຍູ້ ແລະ ສົ່ງເສີມຄວາມກ້າວໜ້າຂອງແມ່ຍິງ ໃນການມີສ່ວນຮ່ວມໃນການຕັດສິນທາງການເມືອງ ເຮັດໃຫ້ແມ່ຍິງເຂົ້າສູ່ຂະບວນການຮ່ວມມື ເພື່ອສ້າງເຄືອຂ່າຍຄວາມສາມັກຄີ, ຄວາມປອງດອງ, ການທ້ອນໂຮມກໍາລັງແຮງໃນການແກ້ໄຂຂໍ້ຂັດແຍ່ງ, ຄວາມແຕກໂຕນກັນ ຂອງການພັດທະນາ ໂດຍຮ່ວມກັນເປັນເຈົ້າການຊຸກຍູ້ສົ່ງເສີມ ໃຫ້ແກ່ແມ່ຍິງນັບມື້ນັບມີສ່ວນຮ່ວມຢ່າງຫ້າວຫັນ ແລະ ມີບົດບາດສູງຂຶ້ນໃນທຸກຂົງເຂດວຽກງານຂອງສັງຄົມ ເປັນຕົ້ນແມ່ນການມີສ່ວນຮ່ວມໃນວຽກງານຄົ້ນຄວ້າວິທະຍາສາດ, ເຕັກໂນໂລຊີທີ່ທັນສະໄໝ, ການເຕີບໂຕທາງດ້ານເສດ ຖະກິດ, ຄວາມກ້າວໜ້າທາງສັງຄົມ, ລວມທັງເຂົ້າຮ່ວມເຄື່ອນໄຫວໃນການປຶກສາຫາລື ແລະ ເຈລະຈາ ແກ້ໄຂບັນຫາສັນຕິພາບ, ຄວາມໝັ້ນຄົງ ແລະ ບັນຫາຂໍ້ຂັດແຍ່ງຕ່າງໆຂອງໂລກຢ່າງສັນຕິວິທີຜ່ານກົນໄກການຮ່ວມມືແບບສອງຝ່າຍ ແລະ ຫຼາຍຝ່າຍ.
    ທ່ານປະທານສະພາແຫ່ງຊາດ ຍັງໄດ້ຮຽກຮ້ອງໃຫ້ປະເທດພັດທະນາແລ້ວ ທີ່ມີບົດຮຽນ ປະສົບການສູງ ແລະ ມີທ່າແຮງທາງດ້ານເສດຖະກິດ ຈົ່ງຊ່ວຍປະເທດດ້ອຍພັດທະນາ, ປະເທດກໍາລັງພັດທະນາ ລວມໄປເຖິງການຊຸກຍູ້ ສົ່ງເສີມໃຫ້ສະມາຊິກສະພາເພດຍິງ ໄດ້ມີການພົວພັນ ແລະ ຮ່ວມມືກັນ ເພື່ອແນໃສ່ປະກອບສ່ວນເຂົ້າໃນການເສີມສ້າງສັນຕິພາບ ສະຖຽນລະພາບ ແລະ ຄວາມສົມບູນພູນສຸກຂອງພາກພື້ນອາຊີ-ເອີຣົບ ກໍ່ຄືຂອງໂລກ, ສ້າງຄວາມເຊື່ອໝັ້ນ ແລະ ຄວາມເຂົ້າອົກເຂົ້າໃຈ ຊຶ່ງກັນ ແລະ ກັນ ລະຫວ່າງປະຊາຊົນສອງພາກພື້ນ ໃຫ້ກາຍເປັນພະລັງຂັບເຄື່ອນທີ່ສໍາຄັນໃຫ້ແກ່ການບັນລຸເປົ້າໝາຍການພັດທະນາແບບຍືນຍົງ ຊຶ່ງແມ່ຍິງມີສ່ວນປະກອບທີ່ສໍາຄັນໃນຂະບວນດັ່ງກ່າວ.
   ກອງປະຊຸມດັ່ງກ່າວ ພາຍໃຕ້ການເປັນປະທານຂອງທ່ານ ນາງ ວາແລນຕິນາ ມັດວິເຢັນໂກ ປະທານສະພາສູງສະຫະພັນຣັດເຊຍ ໂດຍໄດ້ຮັບກຽດເຂົ້າຮ່ວມກອງປະຊຸມ ຂອງທ່ານ ວາລາດີເມຍ ປູຕິນ ປະທານາທິບໍດີແຫ່ງສະຫະພັນຣັດເຊຍ ຊຶ່ງມີບັນດາລັດຖະສະພາແມ່ຍິງຈາກປະເທດອາຊີ ແລະ ເອີຣົບ ແລະ ພາກສ່ວນກ່ຽວຂ້ອງເຂົ້າຮ່ວມ.