ຮອງປະທານສະພາແຫ່ງຊາດ ຕ້ອນຮັບປະທານສະພາປະຊາຊົນນະຄອນໂຮ່ ຈີ ມິ່ງ
24/09/2018

(ສພຊ) ໃນຕອນເຊົ້າວັນອັງຄານທີ 18 ກັນຍາຜ່ານມາ, ທີ່ສະພາແຫ່ງຊາດ ສະຫາຍ ແສງ ນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າ ຢ້ຽມຂໍ່ານັບຂອງສະຫາຍ ນາງ ຫງວຽນ ທິ ກວຽດ ເຕິມ ຮອງເລຂາຄະນະພັກ, ປະທານສະພາປະຊາ ຊົນນະຄອນ ໂຮ່ ຈີ ມິ່ງ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ລະຫວ່າງວັນທີ 14-21 ກັນຍາ 2018.

ສະຫາຍ ແສງນວນ ໄຊຍະລາດ ໄດ້ສະແດງຄວາມດີໃຈ ແລະ ຍິນດີຕ້ອນຮັບ ພ້ອມທັງຕີລາ ຄາສູງຕໍ່ການການມາຢ້ຽມຢາມສະຫາຍ ຫງວຽນ ທິ ກວຽດ ເຕິມ ພ້ອມດ້ວຍຄະນະຜູ້ແທນສະພາປະ ຊາຊົນນະຄອນ ໂຮ່ ຈີ ມິນ ທີ່ເດີນທາງມາຢ້ຽມຢາມ ແລະ ຈັດກອງປະຊຸມສໍາມະນາແລກປ່ຽນບົດ ຮຽນ ໃຫ້ແກ່ພະນັກງານວິຊາການຂອງສະພາປະຊາຊົນຂັ້ນແຂວງ ສປປລາວ. ພິເສດສະຫາຍ ແລະ ຄະນະ ໄດ້ນໍາເອົາບົດຮຽນອັນດີມີຄຸນປະໂຫຍດມາໃຫ້ສະພາແຫ່ງຊາດ ກໍຄືສະພາປະຊາຊົນຂັ້ນ ແຂວງ ໂດຍໄດ້ຈັດສໍາມະນາເຝິກອົບຮົມຫົວຂໍ້ວິທະຍາສາດໃຫ້ແກ່ວິຊາການເສນາທິການຂອງສະ ພາແຫ່ງຊາດ ແລະ ສະພາປະຊາຊົນຂັ້ນແຂວງໃນທົ່ວປະເທດ; ທັງນີ້ກໍເພື່ອເປັນ​ເປັນ​ການປະ​ກອບ​ສ່ວນອັນສຳຄັນ​ເຂົ້າ​ໃນ​ການເສີມ​ສ້າງ​ມູນ​ເຊື້ອ​ອັນ​ດີ​ງາມແຫ່ງ​ສາຍ​ພົວ​ພັນ​ມິດ​ຕະ​ພາບ, ຄວາມ​ສາ​ມັກ​ຄີ​ພິ​ເສດ ແລະ ການ​ຮ່ວມ​ມື​ຮອບ​ດ້ານລະ​ຫວ່າງ​ສອງ​ພັກ, ສອງ​ລັດ ແລະ ປະ​ຊາ​ຊົນ​ສອງ​ຊາດລາວ-ຫວຽດ​ນາມ ເວົ້າລວມ, ເວົ້າສະເພາະລະຫວ່າງສະພາແຫ່ງຊາດ ກໍຄືສະພາປະຊາຊົນຂອງສອງປະເທດ ທີ່​ມີ​ມາ​ແຕ່​ດົນ​ນານ​ແລ້ວ​ນັ້ນ ໃຫ້​ມີ​ຄວາມ​ແໜ້ນ​ແຟ້ນ​ຈະ​ເລີນງອກ​ງາມ​ ແລະ ເກີດດອກ​ອອກ​ຜົນ​ຍິ່ງໆ​ຂຶ້ນ; ສະຫາຍຮອງປະທານສະພາແຫ່ງຊາດ ຍັງເວົ້າຕື່ມວ່າ ສາຍພົວພັນລາວຫວຽດນາມ ທີ່ປະ ທານ ສຸພານຸວົງ ໄດ້ເວົ້າໄວ້ເມື່ອກ່ອນວ່າ ບໍ່ມີນັກຂຽນຄົນໃດສາມາດປະພັນໄດ້ຄົບຖ້ວນ ສໍາລັບ ຄວາມສາມັກຄີລາວ-ຫວຽດນາມ; ພ້ອມນັ້ນ ກໍໄດ້ເລົ່າຄືນການໄປຢ້ຽມຢາມຫວຽດນາມໃນໄລຍະ ຜ່ານມາ, ເຊິ່ງໄດ້ພົບປະສອງຝ່າຍກັບສະຫາຍ ນາງ ຕ໋ອງ ຖິ ຟ໋ອງ ຮອງປະທານສະພາແຫ່ງຊາດ ຫວຽດນາມ ໃນນັ້ນ ໃນປຶກສາຫາຫລືກັນກ່ຽວກັບການພົວພັນປະສານງານ ໂດຍໄດ້ມອບໃຫ້ກໍາ ມາທິການການຕ່າງປະເທດຂອງສອງສະພາແຫ່ງຊາດ ລົງຕິດຕາມການໄປມາ, ການຍ້າຍຖິ່ນຖານ ແລະ ການແຕ່ງ ງານທີ່ບໍ່ຖືກຕ້ອງຢູ່ບໍລິເວນຊາຍແດນ, ເບື້ອງຕົ້ນໄດ້ກຳນົດ ເອົາ 2 ຈຸດ ຢູ່ແຂວງບໍລິຄໍາໄຊ ແລະ ແຂວງຄໍາມ່ວນ ສ່ວນຫວຽດນາມແມ່ນແຂວງທີ່ມີຊາຍແດນ ຕິດຈອດກັນ. ສະຫາຍ ແສງນວນ ໄຊຍະລາດ ໄດ້ກ່າວຕື່ມອີກວ່າ ສະພາແຫ່ງຊາດລາວ ຫາກໍສໍາ ເລັດການດໍາເນີນກອງປະຊຸມສະ ໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ແລະ ລົງພົບປະປະຊາຊົນເພື່ອເຜີຍແຜ່ເນື້ອໃນຈິດໃຈກອງປະຊຸມດັ່ງກ່າວ; ພ້ອມທັງລາຍງານການກະກຽມກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ເຊິ່ງຈະຈັດຂຶ້ນໃນເດືອນພະຈິກນີ້.

ສະຫາຍ ຫງວຽນ ທິ ກວຽດ ເຕິມ ໄດ້ສະແດງຄວາມດີໃຈ ແລະ ຂອບໃຈເປັນຢ່າງຍິ່ງຕໍ່ການ ຕ້ອນຮັບຢ່າງອົບອຸ່ນຂອງການນໍາພັກ-ລັດ ສປປລາວ; ໃນການມາຢ້ຽມຢາມ ແລະ ເຮັດວຽກໃນຄັ້ງ ນີ້ ເປັນໂອກາດດີທີ່ສຸດ ເພາະເປັນການຮັດແໜ້ນສາຍພົວພັນລະຫວ່າງສະພາປະຊາຊົນ ໂຮ່ ຈີ ມິ່ງ ກັບສະພາປະຊາຊົນຂັ້ນແຂວງຂອງລາວ, ພ້ອມທັງແຈ້ງສະພາບການພົບປະຂອງປະຊາຊົນທ້ອງຖິ່ນ ຂອງລາວ ໃນນັ້ນມີສະພາປະຊາຊົນແຂວງຊຽງຂວາງ ແລະ ນະຄອນຫລວງວຽງຈັນ ຕະຫລອດ ຮອດບັນດາວິຊາການທີ່ໄດ້ຮ່ວມກອງປະຊຸມ ພ້ອມນັ້ນ ກໍໄດ້ຕັ້ງບັນຫາທີ່ຕ່າງຝ່າຍຕ່າງມີຄວາມສົນ ໃຈ ແລະ ແລກປ່ຽນກັນຄໍາຄິດເຫັນຢ່າງກົງໄປກົງມາ; ສາໍລັບນະຄອນ ໂຮ່ ຈີ ມິ່ງ ຍາມໃດກໍມີ ຄວາມຮັກແພງຕໍ່ ສປປລາວ ເວົ້າລວມ, ເວົ້າສະເພາະ ກໍບັນດາທ້ອງຖິ່ນຂອງລາວ ແລະ ເພື່ອເປັນ ການຂະຫຍາຍການພົວພັນຮ່ວມມກັບທ້ອງຖິ່ນຂອງລາວນັ້ນ ກໍໄດ້ປະຕິບັດບັນດາໂຄງການຕ່າງໆ ເພື່ອເຮັດໃຫ້ການພົວພັນຂອງນະຄອນ ໂຮ່ ຈີ ມິ່ງ ກັບບັນຫາທ້ອງຖິ່ນຂອງລາວນັບມື້ນັບຂະຫຍາຍ ຕົວຢ່າງແໜ້ນແຟ້ນຍິ່ງຂຶ້ນໄປ; ພ້ອມນັ້ນ, ສະຫາຍປະທານສະພາປະຊາຊົນນະຄອນ ໂຮ່ ຈີ ມິ່ງ ຍັງຮຽກຮ້ອງໃຫ້ມີການ ແລກປ່ຽນຢ້ຽມຢາມ ລະຫວ່າງທ້ອງຖິ່ນ ເຊິ່ງກັນ ແລະ ກັນ ພ້ອມທັງເຊື້ອເຊີນບັນດາທ້ອງຖິ່ນຂອງ ລາວ ໄປຢ້ຽມຢາມນະຄອນ ໂຮ່ ຈີ ມິ່ງ, ສະຫາຍຍັງກ່າວຕື່ມວ່າ ສະພາປະຊາຊົນນະຄອນ ໂຮ່ ຈີ ມິ່ງ ຈະສືບຕໍ່ຮ່ວມມືກັບກັບບັນດາສະຫາຍ ເພື່ອແລກປ່ຽນບັນດາບົດຮຽນ ເພື່ອນໍາຜົນປະໂຫຍດສູງສຸດ ມາສູ່ປະຊາຊົນລາວ ແລະ ປະຊາຊົນນະຄອນ ໂຮ່ ຈີ ມິ່ງ ກໍຄືປະຊາຊົນຫວຽດນາມ.

ຫລັງຈາກນັ້ນ, ຄະນະຜູ້ແທນໄດ້ເຂົ້າຢ້ຽມຂໍ່ານັບສະຫາຍ ສິນລະວົງ ຄຸດໄພທຸນ ກໍາມະການກົດມການເມືອງສູນກາງພັກ, ເຈົ້າຄອງນະຄອນຫລວງວຽງຈັນ.