ທ່ານ ແສງນວນ ໄຊຍະລາດ ສືບຕໍ່ພົບປະປະຊາຊົນ ຢູ່ເມືອງພິນ
18/09/2018

(ສພຊ) ລະຫວ່າງວັນທີ 12-13 ກັນຍາ 2018 ທີ່ເມືອງພິນ ແຂວງສະຫວັນນະເຂດ, ທ່ານ ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ ທັງເປັນສະມາຊິກ ສະພາແຫ່ງຊາດ (ສສຊ) ປະຈໍາເຂດເລືອກຕັ້ງ 13 ແຂວງສະຫວັນນະເຂດ ພ້ອມດ້ວຍຄະນະ ສສຊ ປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ (ສສຂ) ປະຈໍາເມືອງ ໄດ້ສືບຕໍ່ເຄື່ອນໄຫວພົບປະປະຊາຊົນຜູ້ມີສິດເລືອກຕັ້ງ ແລະ ໂຄສະນາເຜີຍແຜ່ຜົນສໍາເລັດ ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ (ສພຊ) ຊຸດທີ VIII ແລະ ສະພາປະຊາຊົນແຂວງ (ສພຂ) ຊຸດທີ I; ໃນນີ້, ໄດ້ພົບປະ ແລະ ເຜີຍແຜ່ຢູ່ ຈຸດສຸມນາໂພຄໍາ, ກຸ່ມບ້ານພັດທະນາທີ 7 ຢູ່ໂຮງຮຽນປະຖົມອຸດົມໄຊ, ກຸ່ມບ້ານພັດທະນາທີ 2 ວັດບ້ານໃໝ່ໂນນສະອາດ ແລະ ສະໂມສອນເມືອງພິນ; ເຂົ້າຮ່ວມມີບັນດາທ່ານຄະນະປະຈໍາພັກເມືອງ, ພະນັກງານ-ລັດຖະກອນ, ທະຫານ-ຕໍາຫລວດ, ພະນັກງານອາວຸໂສບໍານານ, ນັກຮຽນ ຕະ ຫລອດຮອດປະຊາຊົນອ້ອມຂ້າງເມືອງ ແລະ ບ້ານ.

ໃນພິທີ, ໄດ້ຮັບຟັງການລາຍງານໂດຍສັງເຂບກ່ຽວກັບສະພາບແຜນພັດທະນາເສດຖະກິດ-ສັງຄົມ ຂອງເມືອງ, ກຸ່ມບ້ານພັດທະນາ ແລະ ບ້ານ ພ້ອມທັງຂໍ້ສະດວກ ແລະ ຂໍ້ຫຍຸ້ງຍາກ ໃນການດໍາລົງຊີວິດຕົວຈິງຂອງປະຊາຊົນ; ຈາກນັ້ນ, ບັນດາທ່ານ ສສຊ ແລະ ສສຂ ໄດ້ຜັດປ່ຽນກັນເຜີຍແຜ່ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 5 ຂອງ ສພຊ ຊຸດທີ VIII ແລະ ສພຂ ຊຸດທີ I; ເຊິ່ງການລົງພົບປະປະຊາຊົນໃນຄັ້ງນີ້, ເຮັດໃຫ້ປະຊາຊົນ ໄດ້ຮັບຮູ້ ແລະ ເຂົ້າໃຈການດໍາເນີນກອງປະຊຸມ, ການພິຈາລະນາຮັບຮອງ ແລະ ຕົກລົງບັນຫາທີ່ສໍາຄັນຂອງຊາດ ແລະ ຂອງແຂວງ; ພ້ອມກັນນັ້ນ, ກໍເຮັດໃຫ້ປະຊາຊົນໄດ້ຮັບຮູ້ເຖິງພາລະບົດບາດ, ສິດ ແລະ ໜ້າທີ່ ຂອງ ສພຊ, ສພຂ, ສສຊ ແລະ ສສຂ ທີ່ມີຕໍ່ປະຊາຊົນ, ພ້ອມທັງຮັບຟັງຄໍາຄິດຄໍາເຫັນ, ຄໍາສະເໜີ ຂອງປະຊາຊົນ ເຊິ່ງເຫັນວ່າມີຂໍ້ຫຍຸ້ງຍາກຫລາຍດ້ານທີ່ຈະຕ້ອງປັບປຸງແກ້ໄຂ ເປັນຕົ້ນ: ບັນຫາໂຮງຮຽນບໍ່ພຽງພໍຕໍ່ນັກຮຽນພາຍໃນບ້ານ ເຮັດໃຫ້ເກີດມີຄວາມແອອັດ, ໂຮງຮຽນມີຄວາມຊຸດໂຊມ, ຂາດເຂີນບຸກຄະລາກອນຄູອາຈານສອນ, ສອນມາຫລາຍປີກໍບໍ່ໄດ້ບັນຈຸເຂົ້າເປັນພະນັກງານ, ເສັ້ນທາງສັນຈອນພາຍໃນບ້ານມີຄວາມຫຍຸ້ງຍາກໃນລະດູຝົນ ມີບາງຈຸດໄດ້ໃຊ້ເຮືອໃນການໄປມາຫາສູ່ກັນ ແລະ ບັນຫາອື່ນໆ; ພ້ອມກັນນັ້ນ, ບັນດາທ່ານ ສສຊ ແລະ ສສຂ ກໍໄດ້ມີຄໍາຄິດຄຳເຫັນໃນການແກ້ໄຂບັນຫາເບື້ອງຕົ້ນ ແລະ ຮັບເອົາບັນດາຄໍາສະເໜີຂອງປະຊົນ ໄປນໍາສະເໜີຕໍ່ພາກສ່ວນທີ່ກ່ຽວຂ້ອງ ເພື່ອຄົ້ນຄວ້າພິຈາລະ ນາຫາວິທີການແກ້ໄຂໃນຕໍ່ໜ້າ.

(ສົມນຶກ ແກ້ວໄຊຍະຈັກ)