ສະຫະພັນແມ່ຍິງສະພາແຫ່ງຊາດເປີດຂະບວນການແຂ່ງຂັນສາມດີ
04/09/2018

(ສພຊ) ​ວັນ​ທີ 24 ສິງຫາ 2018 ທີ່​ຫ້ອງ​ປະຊຸມ​ສະພາ​​ແຫ່ງ​ຊາດ (ຫລັກ 6) ນະຄອນຫລວງ​ວຽງຈັນ ​ໄດ້​ມີ​ພິ​ເປີດ​ຂະ​ບວນການ​​ຈັດ​ຕັ້ງ​ປະຕິບັດ​ຄຳ​ຂວັນ ​ແລະ ຂໍ້​ແຂ່ງຂັນ 3 ດີ​ ຂອງ​ຄະນະ​ບໍລິຫານ​ງາ​ນສະຫະພັນ​ແມ່ຍິງ​ສະພາ​ແຫ່ງ​ຊາດ ​ໄລຍະ​ທີ II (2018-2020) ​ໂດຍ​ການ​ເປັນ​ປະທານຂອງ​ທ່ານ ນາງ ມະນີ​ວັນ ​ເຢຽປາວ​ເຮີ ຮອງ​ປະທານ​ກຳມາ​ທິການ​ວັດທະນະທຳ-ສັງຄົມ ທັງ​ເປັນ​ປະທານ​ຄະນະ​ບໍລິຫານ​ງານ​ແມ່ຍິງ​ສະພາ​ແຫ່ງ​ຊາດ; ເຂົ້າຮ່ວມມີ​ທ່ານ ນາງ ສີ​ໃສ ລື​ເດດ​ມູນ​ສອນ ຮອງ​ເລຂາ​ຄະນະ​ພັກ ຮອງ​ປະທານ​ສະພາ​ແຫ່ງ​ຊາດ, ທ່ານ ນາງ ບົວ​ຈັນ ສີ​ຫາ​ນາດ ຮອງປະທານ​ສູນ​ກາງສະຫະພັນ​ແມ່ຍິງ​ລາວ; ມີຕາງ​ຫນ້າ​ອົງການ​ຈັດ​ຕັ້ງ​ມະຫາຊົນ, ຮອງ​ປະທານ​ຄະນະ​ບໍລິຫານ​ງານ​ສະ​ຫະ​ພັນ​ແມ່ຍິງ, ບັນດາ​ຫົວຫນ້າ-ຮອງ​ຫົວໜ້າ​ຫນ່ວຍ​ສະຫະພັນ​ແມ່ຍິງ ​ແລະ ສະມາຊິກ​ສະ​ຫະພັນ​ແມ່ຍິງ​ພາຍ​ໃນ​ສະພາ​ແຫ່ງ​ຊາດ​ເຂົ້າ​ຮ່ວມ.

ທັງ​ນີ້, ກໍ​ເພື່ອ​ເປັນການປັບ​ປຸງ​ການ​ເຄື່ອນ​ໄຫວ​ວຽກງານ​ຂອງ​ອົງການ​ຈັດ​ຕັ້ງ​ສະຫະພັນ​ແມ່ຍິງ​ສະພາ​ແຫ່ງ​ຊາດ ​ໃຫ້​ກ້າວ​ໄປ​ສູ່​ຄຸນ​ນະພາ​ບ, ມີ​ປະສິດທິພາບ​ສູງ​ກວ່າ​ເກົ່າ ​ແລະ ມີ​ການ​ເຕີບ​ໃຫຍ່​ຂະຫຍາຍຕົວ​ຂຶ້ນ​ເລື້ອຍໆ ທັງ​ເປັນ​ການ​ປຸກລະດົມ ​ແລະ ຊຸກຍູ້​​ໃຫ້​ສະມາຊິກ​ສະຫະພັນ​ແມ່ຍິງ​ທົ່ວ​ສະພາ​ແຫ່ງ​ຊາດ ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ຂະ​ບວນການຈັດ​ຕັ້ງ​ປະຕິບັດ “ຂໍ້​ແຂ່ງ​ຂັນ 3 ດີ” ຕິດ​ພັນ​ກັບ​ການຈັດ​ຕັ້ງ​ປະຕິບັດ​ຂໍ້​ແຂ່ງຂັນ “ຮັກ​ຊາດ ​ແລະ ພັດທະນາ” ​ໃຫ້​ເປັນ​ຂະ​ບວນການ​ຟົດ​ຟື້ນ​ຕິດ​ພັນ​ກັບ​ການ​ປັບປຸງ​ອົງການ​ຈັດ​ຕັ້ງ​ສະຫະພັນ​ແມ່ຍິງ​ສະພາ​ແຫ່ງ​ຊາດ ​ໃຫ້​ປອດ​ໃສ, ​ເຂັ້ມ​​ແຂງ, ໜັກ​ແໜ້ນ​ ຕາມ​ແຜນການ​ຂອງ​ສູນ​ກາງ​ສະຫະພັນ​ແມ່ຍິງ​ລາວ​ກຳນົດ​ໄວ້; ​ເພື່ອ​ໃຫ້​ສະມາຊິກ​ສະຫະພັນ​ແມ່ຍິງ​ພາຍ​ໃນ​ສະພາ​ແຫ່ງ​ຊາດ ຍົກ​ສູງຈິດ​ໃຈ​ຮັກ​ຊາດ, ຮັກ​ລະບອບ​ປະຊາທິປະ​ໄຕ​ປະຊາຊົນ, ຍົກ​ສູງ​ສະຕິຊາດ, ສະຕິ​ເຄົາລົບ​ລັດຖະທຳ​ມະນູນ​, ກົດໝາຍ, ​ເປັນ​ເຈົ້າ​ຕົນ​ເອງ, ສ້າງ​ຄວາມ​ເຂັ້ມ​ແຂງ​ດ້ວຍ​ຕົນ​ເອງ, ສ້າງ​ຄວາມ​ສາມັກຄີ​ເປັນ​ປຶກ​ແຜ່ນ, ມີ​ນ້ຳ​ໃຈ​ປະ​ຢັດມັດທະຍັດ, ມີ​ຄວາມ​ດຸ​ໝັ່ນ​ຂະຫຍັນ​ຮ່ຳຮຽນ, ມີ​ການ​ພັດທະນາ​ຕົນ​​ເອງ​ຢ່າງຮອບດ້ານ ​ແລະ ມີ​ແບບ​ແຜນ​ດຳລົງ​ຊີວິດ​ທີ່​ດີ, ການ​ພົວພັນ​​ໃນ​ຄອບຄົວ ​ແລະ ສັງຄົມ ສອດຄ່ອງ​ກັບ​ຮີດຄອງ​ປະ​ເພນີ​ອັນ​ງາມ​ຂອງ​ຊາດ ​ແລະ ລະບຽບກົດໝາຍ ​ແລະ ທັງ​ປັນ​ການ​ສ້າງ​ຂະ​ບວນການ​ຕ່າງໆຢູ່​ພາຍ​ໃນ​ສະພາ​ແຫ່ງ​ຊາດ​ ໃຫ້​ມີ​ຄວາມ​ຟົດ​ຟື້ນ ​ແລະ ມີ​ເນື້ອ​ໃນ​ໜັກ​ແໜ້ນ, ຕໍ່​ເນື່ອງ​ ແນ​ໃສ່​ຊອກ​ໃຫ້​ໄດ້​ການຈັດ​ຕັ້ງ ​ແລະ ບຸກຄົນ​ດີ​ເດັ່ນ ​ເພື່ອ​ປະຕິບັດ​ນະ​ໂຍບາຍ​ຍ້ອງຍໍ​ຢ່າງ​ຖືກ   ຕ້​ອງຊັດ​ເຈນ.

​ໃນ​ພິທີ​ເປີດ​ທ່ານ ນາງ​ມະນີ​ວັນ​ ​ເຢຍປາວ​ເຮີ​ ​ໄດ້​ກ່າວ​ວ່າ: ສະຫະພັນແມ່ຍິງສະພາແຫ່ງຊາດ ແມ່ນເປັນອົງການ ຈັດຕັ້ງໜຶ່ງ ຄືກັບອົງການຈັດຕັ້ງມະຫາຊົນອື່ນໆຂອງສະພາແຫ່ງຊາດ ທີ່ຢູ່ພາຍໃຕ້ການຊີ້ນໍາ-ນໍາພາ ແລະ ໄດ້ຮັບການອົບ ຮົມບົ່ມເພາະຈາກຄະນະພັກ, ຄະນະປະຈໍາສະພາແຫ່ງຊາດ ແລະ ສູນກາງສະຫະພັນແມ່ຍິງລາວ ​ເຊິ່ງຕະຫລອດໄລຍະ ທີ່ຜ່ານມາ ສະຫະພັນແມ່ຍິງສະພາແຫ່ງຊາດໄດ້ມີການປະສົມທົບແໜ້ນ ແລະ ຄຽງບ່າຄຽງໄລ່ ກັບບັນດາອົງການຈັດ ຕັ້ງມະຫາຊົນຂອງສະພາແຫ່ງຊາດ ກໍຄືອົງການຈັດຕັ້ງສັງຄົມ ແລະ ອົງການຈັດຕັ້ງສາກົນອື່ນໆ ທີ່ກ່ຽວຂ້ອງອ້ອມຂ້າງສູນ ກາງ ເພື່ອຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງອົງການຕົນ ເຂົ້າໃນການເປັນເສນາທິການໃຫ້ແກ່ຄະນະ ພັກ, ຄະນະປະຈໍາສະພາແຫ່ງຊາດ ແລະ ສູນກາງສະຫະພັນແມ່ຍິງລາວ; ໄປພ້ອມກັບການປະຕິບັດພາລະບົດບາດນັ້ນ, ສະມາຊິກສະຫະພັນແມ່ຍິງສະພາແຫ່ງຊາດຈໍານວນໜຶ່ງ ຍັງໄດ້ເຄື່ອນໄຫວປະຕິບັດໜ້າທີ່ວຽກງານຢ່າງຕັ້ງໜ້າ ຢູ່ໃນລະ ບົບການເມືອງຂັ້ນສູງຂອງພັກ-ລັດ, ເຂົ້າຮ່ວມປັບປຸງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມຂອງຊາດ, ແຜນງົບປະມານແຫ່ງລັດ ແລະ ບັນດາມະຕິຕ່າງໆ ທີ່ກອງປະຊຸມສະພາແຫ່ງຊາດໄດ້ ຮັບຮອງເອົາ, ເຂົ້າຮ່ວມເຄື່ອນໄຫວວຽກງານຂະບວນການອື່ນໆ ຕາມທິດຊີ້ນໍາຂອງຄະນະພັກ ຕາມທີ່ຄະນະເລຂາທິ ການສະພາແຫ່ງຊາດ, ບັນດາອົງການຈັດຕັ້ງມະຫາຊົນພາຍໃນສະພາແຫ່ງຊາດ, ອົງການຈັດຕັ້ງທາງສັງຄົມ ແລະ ອົງການ ຈັດຕັ້ງສາກົນທີ່ກ່ຽວຂ້ອງອ້ອມຂ້າງສູນກາງໄດ້ຈັດຂຶ້ນ ​ເຊິ່ງທັງໝົດນັ້ນໄດ້ເປັນການປະກອບສ່ວນອັນສໍາຄັນເຂົ້າໃນການ ຈັດຕັ້ງປະຕິບັດພາລະບົດບາດຂອງສະພາແຫ່ງຊາດ ໃຫ້ມີຜົນສໍາເລັດເປັນກ້າວໆມາ.

​ກອງ​ປະຊຸມ​ຄັ້ງ​ນີ້, ຜູ້​ເຂົ້າ​ຮ່ວມ​ກອງ​ປະຊຸມ​ໄດ້​ຮັບ​ຟັງ​ບົດ​ສະຫລຸບ​ຕີ​ລາຄາ​ການຈັດ​ຕັ້ງ​ປະຕິບັດ​ຂໍ້​ແຂ່ງຂັນ 3 ດີ ​ແລະ ​ແຜນການ​ຈັດ​ຕັ້ງ​ປະຕິບັດ​ຂໍ້​ແຂ່ງ​ຂັນ 3 ດີ ຂອງ​ສະຫະພັນ​ແມ່ຍິງ​ສະພາ​ແຫ່ງ​ຊາດ ​ໄລຍະປີ 2018-2020; ພ້ອມ​ ດຽວກັນນັ້ນ, ຕາງຫນ້າ​ຫນ່ວຍ​ສະຫະພັນ​ແມ່ຍິງ​ພາຍໃນ​ສະພາ​ແຫ່ງ​ຊາດຂຶ້ນ​ຈັບ​ມື​ເພື່ອ​ຮັບ​ເອົາ​ຂໍ້​ແຂ່ງຂັນ​ດັ່ງກ່າວນຳ​ໄປ​ຈັດ​ຕັ້ງ​ປະຕິບັ​ດ.

​ໂອກາດ​ດຽວກັນ​ນີ້, ຍັງ​ໄດ້​ຮັບ​ຟັງ​ການ​ໂອ້​ລົມ​ຈາກທ່ານ ນາງ ສີ​ໃສ​ ລື​ເດ​ດມູນ​ສອນ ​ແລະ ​ທ່ານ ນາງ ບົວ​ຈັນ ສີ​ຫາ​ນາດ, ​ເຊິ່ງທັງ​ສອງ​ທ່ານ​ໄດ້​ເນັ້ນ​ຫນັກ​ໃຫ້​ສະມາຊິກ​ແມ່ຍິງ​​ເອົາ​ໃຈ​ໃສ່​ໃນ​ປະຕິບັດ​ຂໍ້​ແຂ່ງຂັນ 3 ດີ​ ໃຫ້​ປາກົດ​ຜົນ​ເປັນ​ຈິງ ​ແລະ ​ສາມາດ​ສ້າງ​ໄດ້​ແມ່ຍິງ​ສາມ​ດີ​ໃນ​ທົ່ວ​ສະພາ​ແຫ່ງ​ຊາດ.

 

(ນາງ ອາ​ລິນ ສຸ​ພິມ​ມະ​ປະດິດ)

ກວດແລ້ວ, August 28, 2018

ບຸນເກີດ ວົງໄຊຍາ