ປະທານສະພາແຫ່ງຊາດ  ພົບປະຢ້ຽມຢາມປະຊາຊົນຜູ້ປະສົບໄພນຳ້ຖ້ວມ          ຢູ່ແຂວງຊຽງຂວາງ ແລະ ຫົວພັນ
10/08/2018

(ສພຊ) ເພື່ອເປັນການຕິດຕາມສະພາບໄພນໍ້າຖ້ວມ ແລະ ພົບປະຢ້ຽມຢາມ ໃຫ້ກໍາລັງໃຈປະຊາຊົນຜູ້ປະສົບໄພ, ວັນຈັນ ທີ 06 ສິງຫາ 2018,​ ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ເດີນທາງດ້ວຍເຮືອບິນພິເສດ ຮອດເມືອງໜອງແຮດ ແຂວງຊຽງຂວາງ ໂດຍການຕ້ອນຮັບຂອງທ່ານ ຫນໍບີທາ ຕົ່ງປາວ ເຈົ້າເມືອງໆໜອງແຮດ ພ້ອມດ້ວຍຄະນະ.  ຈາກນັ້ນ ທ່ານ ປະທານສະພາແຫ່ງຊາດ ໄດ້ໄປເບິ່ງສະພາບນຳ້ຖ້ວມຢູ່ບ້ານຜາຫລັກ ເຊິ່ງເຮັດໃຫ້ເສັ້ນທາງຄົມມະນາຄົມ ຖືກຕັດຂາດ ແລະ ເຮືອນຊານຂອງປະຊາຊົນ ຖືກນໍ້າຖ້ວມ ຕ້ອງໄດ້ຍົກຍ້າຍໄປຢູ່ ສະຖານທີ່ຫລົບໄພຊົ່ວຄາວ.

ທ່ານ ຫນໍປີທາ ຕົ່ງປາວ ໄດ້ແຈ້ງໃຫ້ຊາບວ່າ: ເນື່ອງຈາກມີຝົນຕົກໜັກ ຕິດຕໍ່ກັນຫລາຍວັນ ໃນລະຫວ່າງທ້າຍເດືອນກໍລະກົດຜ່ານມາ ເຮັດໃຫ້ເກີດມີໄພນໍ້າຖ້ວມໜັກ ໃນບໍລິເວນບ້ານຜາຫລັກ ເມືອງໜອງແຮດ; ຈໍານວນປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມມີ 18 ຄອບຄົວ,​ ພົນລະເມືອງ 104 ຄົນ, ຍິງ 50 ຄົນ, ໄຮ່ນາຮົ້ວສວນຂອງປະຊາຊົນ ໄດ້ຮັບຄວາມເສຍຫາຍຫລາຍພໍສົມຄວນ.

ທ່ານ ນາງ ປານີ ຢາທໍ່ຕູ້ ໄດ້ມີຄໍາເຫັນໂອ້ລົມຕໍ່ອໍານາດການປົກຄອງ ແລະ ປະຊາຊົນ ໂດຍໃຫ້ເລັ່ງຫາວິທີ ລະບາຍນໍ້າອອກໃຫ້ໄວ, ຈັດສັນທີ່ຢູ່ອາໃສໃຫມ່ໃຫ້ປະຊາຊົນຢ່າງຮີບດ່ວນ ລວມທັງມີການວາງແຜນໃນໄລຍະຍາວ ໃຫ້ເປັນບ່ອນທີ່ປອດໄພ ບໍ່ສ່ຽງຕໍ່ໄພນໍ້າຖ້ວມ, ໃຫ້ຂະແໜງສາທາລະນະສຸກ ໂດຍສົມທົບກັບຂັ້ນແຂວງ ແລະ ຂັ້ນສູນກາງ ລົງກວດກາ ນໍ້າກິນນຳ້ໃຊ້ ຂອງປະຊາຊົນ ໃຫ້ຮັບປະກັນຄວາມສະອາດ ຮວມທັງປ້ອງກັນພະຍາດຕິດຕໍ່ ທີ່ອາດຈະເກີດຂຶ້ນ ແລະ ໃຫ້ເອົາໃຈໃສ່ດ້ານທີ່ຢູ່ອາໃສໃນສະຖານທີ່ຫລົບໄພຊົ່ວຄາວ ໃຫ້ມີຄວາມຮັບປະກັນ ຕະຫລອດຮອດເຄື່ອງນຸ່ງຫົ່ມໃຫ້ພຽງພໍ.

ໃນໂອກາດນີ້ ທ່ານ ປະທານສະພາແຫ່ງຊາດ ພ້ອມດ້ວຍຄະນະ ໄດ້ມອບເຄື່ອງອຸປະໂພກ-ບໍລິໂພກ ຈໍານວນໜຶ່່ງ ລວມມູນຄ່າ 14.615.000 ກີບ ໃຫ້ປະຊາຊົນຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມ ບ້ານຜາຫລັກ ເມືອງໜອງແຮດ ແຂວງຊຽງຂວາງ.

 

ໃນວັນດຽວກັນ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍຄະນະ ໄດ້ສືບຕໍ່ເດີນທາງດ້ວຍ ເຮືອບິນພິເສດ ໄປຮອດເມືອງຮ້ຽມ ແຂວງຫົວພັນ, ໂດຍການຕ້ອນຮັບຂອງທ່ານ ຄໍາວອນ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 8 ແຂວງຫົວພັນ, ທ່ານ ອານຸເລດ ສີຄັນໄຊ ເຈົ້າເມືອງໆຮ້ຽມ ພ້ອມດ້ວຍຄະນະ.

ຕາມການລາຍງານຂອງເຈົ້າເມືອງໆຮ້ຽມ; ສະພາບຜົນເສຍຫາຍຈາກໄພພິບັດໃນທົ່ວເມືອງ ແມ່ນມີບ້ານທີ່ໄດ້ຮັບຜົນກະທົບ 34 ບ້ານ (ໃນນັ້ນໜັກກວ່າໝູ່ ມີ 7 ບ້ານ), ມີ 865 ຄອບຄົວ, ພົນລະເມືອງ 5.487 ຄົນ, ຍິງ 2.672 ຄົນ; ມີເນື້ອທີ່ໄຮ່ເຂົ້າ 131,4 ເຮັກຕາ, ເສຍຫາຍ 52 ເຮັກຕາ, ເນື້ອທີ່ນາ 364,3​ ເຮັກຕາ, ເສຍຫາຍ 111,9 ເຮັກຕາ, ເນື້ອທີ່ໄຮ່ສາລີ 88,53​ ເຮັກຕາ, ເສຍຫາຍ 35,17 ເຮັກຕາ, ຄວາຍ 4​ ໂຕ, ງົວ 5 ໂຕ, ໝູ 19 ໂຕ, ແບ້ 4 ໂຕ, ເປັດ-ໄກ່ 328 ໂຕ, ເຮືອນເປ່ເພ 11 ຫລັງ, ເໝືອງຝາຍ ຈຳນວນ 96​ ຈຸດ ຍາວ 1.933 ແມັດ, ຝາຍນໍ້າລົ້ນ 3 ຈຸດ, ຝາຍໄມ້ 66 ຈຸດ, ທາງຂາດ 5​ ຈຸດ, ດິນເຈື່ອນ 7.215 ແມັດ, ໜອງປາ 159 ໜອງ ມີປາເສຍຫາຍ 2.984 ກິໂລກຣາມ, ລວມຜົນເສຍຫາຍທັງໝົດ 1.904.835.000 ກີບ.

ທ່ານ ປະທານສະພາແຫ່ງຊາດ ຍັງໄດ້ມີຄໍາເຫັນໂອ້ລົມ ອໍານາດການປົກຄອງ ແລະ ພໍ່ແມ່ປະຊາຊົນ ໂດຍທ່ານໄດ້ຮຽກຮ້ອງໃຫ້ ທຸກພາກສ່ວນທີ່ກ່ຽວຂ້ອງ ເລັ່ງເກັບກໍາຜົນເສຍຫາຍລະອຽດ ແລ້ວຮີບຮ້ອນຟື້ນຟູ ຊີວິດການເປັນຢູ່ຂອງປະຊາຊົນ,​ ໃຫ້ທາງແຂວງ ເມືອງ ແລະ ບ້ານ ຈັດສັນທີ່ຢູ່ປະຊາຊົນໃໝ່ ລວມທັງມີການວາງແຜນຈັດສັນຍາວນານ ເພື່ອຮັບປະກັນບໍ່ສ່ຽງຕໍ່ໄພພິບັດໃນຕໍ່ໜ້າ, ຕ້ອງມີແຜນການຟື້ນຟູ ການຜະລິດຂອງປະຊາຊົນ ໂດຍສະເພາະແມ່ນການປູກຝັງພືດທົດແທນຜົນລະປູກທີ່ເສຍຫາຍໄປ, ເລັ່ງຟື້ນຟູພື້ນຖານ ໂຄງລ່າງ ທາງດ້ານເສັ້ນທາງຄົມມະນາຄົມ, ເອົາໃຈໃສ່ວຽກງານສາທາລະນະສຸກ ກວດກາສຸຂະພາບປະຊາຊົນ ກວດການໍ້າກິນນໍ້າໃຊ້ ຮັບປະກັນໃຫ້ມີຄວາມສະອາດຖືກຫລັກອານາໄມ ແລະ ປ້ອງກັນພະຍາດຕິດຕໍ່ ທີ່ອາດຈະເກີດຂຶ້ນ ພ້ອມດຽວກັນນັ້ນ ກໍໃຫ້ກວດກາຄືນ ສະພາບຂອງບັນດາໂຮງຮຽນ ເພື່ອຮັບປະກັນໃຫ້ລູກຫລານ ມີບ່ອນຮໍ່າຮຽນສຶກສາ ໃນສົກຮຽນທີ່ຈະມາເຖິງ.

ທ່ານ ປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ມອບເຄື່ອງອຸປະໂພກ-ບໍລິໂພກ ມູນຄ່າ 15.600.000 ກີບ ໃຫ້ປະຊາຊົນຜູ້ປະສົບໄພພິບັດ ເມືອງຮ້ຽມ.

 

 

# ບຸນເກີດ ວົງໄຊຍາ