ສະພາແຫ່ງຊາດແຫ່ງ ສປປ ລາວ-ລາຍລະອຽດຂອງຂ່າວສານ
 

ປະທານສະພາແຫ່ງຊາດ ເຮັດວຽກຮ່ວມກັບ ສພຂ ແຂວງອັດຕະປື
06/08/2018

(ສພຊ) ໃນໂອກາດທີ່ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວນຳເຄື່ອງຊ່ວຍເຫລືອ, ເງິນສົດ ແລະ ໄປໂອ້ລົມໃຫ້ກຳລັງຢ່າງໃກ້ຊິດກັບປະຊາຊົນທີ່ໄດ້ຮັບຜົນກະທົບຈາກເຫດການອຸບັດຕິເຫດເຂື່ອນກັ້ນນໍ້າເຊປຽນ-ເຊນໍ້ານ້ອຍແຕກ; ຕອນເຊົ້າວັນເສົາທີ 28 ກໍລະກົດ 2018 ທ່ານປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ເຮັດວຽກຮ່ວມກັບສະພາປະຊາຊົນແຂວງ (ສພຂ) ໂດຍມີ​ທ່ານ ​ເພັດ​ແກ້ວ ​ເຮືອງ​ປັນຍາ ປະທານສະພາປະຊາຊົນແຂວງອັດຕະປື, ບັນດາທ່ານຄະນະເລຂາທິການສະພາປະຊາຊົນແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

          ທ່ານ ​ເພັດ​ແກ້ວ ​ເຮືອງ​ປັນຍາ ໄດ້ແຈ້ງໃຫ້ຊາບໂດຍຫຍໍ້ກ່ຽວກັບການຈັດຕັ້ງປະຕິວັດວຽກງານຂອງ ສພຂ ອັດຕະປື ໃນໄລຍະຜ່ານມາ, ການເຄື່ອນໄຫວພົບປະປະຊາຊົນທີ່ໄດ້ຮັບຜົນກະທົບຈາກອຸບັດຕິເຫດເຂື່ອນກັ້ນນໍ້າເຊປຽນ-ເຊນໍ້ານ້ອຍແຕກ ແລະ ການກະກຽມເນື້ອໃນກອງປະຊຸມສະໄໝສາມັນເທື່ອທີ 5 ຂອງ ສພຂ ອັດຕະປື ທີ່ຈະໄຂຂຶ້ນໃນມໍ່ໆນີ້.

          ໂອກາດດັ່ງກ່າວ,  ທ່ານ ນາງ ປານີ ຢາທໍ່ຕູ້ ໄດ້ໃຫ້ທິດຊີ້ນຳຫລາຍບັນຫາ ໂດຍສະເພາະການເຄື່ອນໄຫວວຽກງານຂອງ ສພຂ ທັງຂົງເຂດວັດທະນະທຳ, ເສດຖະກິດ-ສັງຄົມ ແລະ ວຽກງານທີ່ຮີບດ່ວນໃນການຊ່ວຍເຫລືອປະຊາຊົນຜູ້ທີ່ໄດ້ຮັບຜົນກະທົບຈາກເຫດການອຸບັດເຫດດັ່ງກ່າວ ເຊິ່ງທ່ານໄດ້ເນັ້ນໜັກວ່າ ສພຂ ຕ້ອງເປັນເຈົ້າການໃນການຕິດຕາມ ແລະ ຊອກຫາຊ່ອງທາງທີ່ເໝາະສົມໃນການຊ່ວຍເຫລືອປະຊາຊົນໃນຄັ້ງນີ້ ທັງຕ້ອງຄົ້ນຄວ້າພິຈາລະນາຊອກຫາວິທີທາງໃນການປ້ອງກັນ ແລະ ແກ້ໄຂບັນຫາທີ່ຈະເກີດຂຶ້ນໃນອະນາຄົດຕື່ມອີກ ຈຶ່ງຂໍໃຫ້ຫົວຂໍ້ນີ້ຖືກນຳເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 5 ຂອງ ສພຂ ອັດຕະປື ດ້ວຍ.

ໃນໂອກາດນີ້, ຍັງໄດ້ປຶກສາຫາລືກ່ຽວກັບໂຄງການກໍ່ສ້າງອາຄານຫໍສະພາປະຊາຊົນແຂວງອັດຕະປືຫລັງໃໝ່ ເຊິ່ງສະພາແຫ່ງຊາດໄດ້ເນັ້ນໜັກວ່າ: ການອອກແບບອາຄານຕ້ອງໃຫ້ມີຄວາມເໝາະສົມ ແລະ ໄດ້ມາດຕະຖານ ສາມາດຮັບປະກັນທາງດ້ານປະລິມານ ແລະ ຄຸນນະພາບ ໂດຍຕ້ອງນຳສົ່ງແບບອາຄານສົມບູນແລ້ວໃຫ້ສະພາແຫ່ງຊາດ ນຳເຂົ້າພິຈາລະນາໃນກອງປະຊຸມຂອງຄະນະປະຈຳສະພາແຫ່ງຊາດເພື່ອພິຈາລະນາ.

ຈາກນັ້ນ, ຄະນະຍັງໄດ້ໄປຢ້ຽມຢາມຂົວຂ້າມນ້ຳເຊຂະໝາມ, ໂຄງການກໍ່ສ້າງອະນຸສາວະລີ ພະເຈົ້າ ໄຊເສດຖາ ຢູ່ທີ່ເມືອງໄຊເສດຖາ ແລະ ເບິ່ງຈຸດເຊື່ອມຕໍ່ແມ່ນ້ຳເຊກອງ-ເຊຂະໝານ ຢູ່ທີ່ເມືອງສາມັກຄີ ແຂວງອັດຕະປື ອີກດ້ວຍ.

(ນາງ ປາກາລັກ ພົມມີໄຊ)