ສະພາແຫ່ງຊາດແຫ່ງ ສປປ ລາວ-ລາຍລະອຽດຂອງຂ່າວສານ
 

ປະທານສະພາແຫ່ງຊາດ ຕ້ອນຮັບການເຂົ້າຢ້ຽມຂໍ່ານັບ ຂອງຄະນະຜູ້ແທນສະພາແຫ່ງຊາດ ສສ ຫວຽດນາມ
02/08/2018

(ສພຊ) ວັນ​ທີ 26 ກໍລະກົດຜ່ານ​ມາ ທີ່​ຫ້ອງ​ຮັບ​ແຂກ​ສະພາ​ແຫ່ງ​ຊາດ ສະຫາຍ​ ນາງ​ ປານີ ຢາ​ທໍ່ຕູ້ ກຳມະການ​ກົມ​ການ​ເມືອງ​ສູນ​ກາງ​ພັກ, ປະທານ​ສະພາ​ແຫ່ງ​ຊາດ ​ໄດ້​ຕ້ອນຮັບ​ກາ​ນ​ເຂົ້າ​ຢ້ຽມຂໍ່ານັບ​ຂອງສະຫາຍ ຫງຽນ ດຶກ​ ຮາຍ ກຳມ​ະການ​​ສູນກາງ​ພັກ​ກອມ​ມູນິດ​ຫວຽດນາມ ປະທານ​ກຳມາ​ທິການ​ການ​ເງິນ-ງົບປະ​ມານ​ ສະພາ​ແຫ່ງ​ຊາດ ສສ ຫວຽດນາມ ພ້ອມ​ດ້ວຍ​ຄະນະ ​ໃນ​ໂອກາດ​ທີ່​ເດີນທາງ​ມາ​ຢ້ຽມ ​ແລະ ​​ເຮັດ​ວຽກຢູ່ ສປປລາວ ຢ່າງ​ເປັນ​ທາງ​ການ​ໃນ​ລະຫວ່າງ​ວັນ​ທີ 27-29 ກໍລະກົດ 2018.

       ສະຫາຍ​ ນາງ ປານີ ຢາ​ທໍ່​ຕູ້ ​ໄດ້​ສະ​ແດງ​ຄວາມ​ຍິນ​ດີ​ຕ້ອນຮັບ ​ແລະ ຕີ​ລາຄາ​ສູງ​ຕໍ່ການ​ມາ​ຢ້ຽມ​ຢາມເຮັດ​ວຽກ​ໃນ​ຄັ້ງ​ນີ້ ​ເພື່ອ​ເປັນ​ການ​ສືບຕໍ່ຈັດ​ຕັ້ງ​ຜັນ​ຂະຫຍາຍ​ການພົບປະ​ເຮັດ​ວຽກ ລະຫວ່າງສອງ​ກົມ​ການ​ເມືອງ ​ເວົ້າ​ລວມ, ​ເວົ້າ​ສະ​ເພາະ​ແມ່ນ​ການຈັດ​ຕັ້ງ​ຜັນ​ຂະຫຍາຍ​ບົດ​ບັນທຶກ​ຄວາມ​ຈຳການ​ຮ່ວມ​ມື​ ລະຫວ່າງ​ສະພາ​ແຫ່ງ​ຊາດ​ລາວ ກັບ​ສະພາ​ແຫ່ງ​ຊາດ​ ສສ ຫວຽດນາມ; ພ້ອມ​ນັ້ນ​ຍັງ​ສະ​ແດງ​ຄວາມຊົມ​ເຊີຍ​ຕໍ່ຜົນສຳ​ເລັດ​ໃນ​ການ​ພົບ​ປະ ​ແລະ ຈັດ​ກອງ​ປະຊຸ​ມສຳ​ມະ​ນາ​ດັ່ງກ່າວ ເຊິ່ງໃນສະພາແຫ່ງຊາດຊຸດທີ VIII ນີ້​ໄດ້​ເອົາ​ໃຈ​ໃສ່​ເລື່ອງ​ງົບປະມານ ສະ​ນັ້ນ, ຖື​ວ່າ​ເປັນ​ການ​ກະ​ຕຸ້ນ​ໃຫ້​ກະຊວງ​ການ​ເງິນ ຕ້ອງ​ໄດ້​ເຮັດ​ວຽກ​ເຂັ້ມ​ງວດ​ຂຶ້ນ ​ແລະ ວາງ​ແຜນ​ລະອຽດກວ່າ​​ເກົ່າ ຫັນ​ເຂົ້າ​ສູ່​ລະບຽບກົດໝາຍ​ໃຫ້​ດີ​ຂຶ້ນ​ກວ່າ​ເກົ່າ ​ເຊິ່ງ​ເຮັດ​ໃຫ້​ລາຍ​ຮັບ​ງົບປະມານ​ເພີ່ມ​ຂຶ້ນ; ພ້ອມ​ທັງ​ສະ​ແດງ​ຄວາມ​ຂອບ​ໃຈ​ຕໍ່ການ​ໃຫ້​ຄວາມ​ຊ່ວຍ​ເຫລືອ​ຂອງ ສສ ຫວຽດນາມ ​ໃນ​ການ​ນຳ​​ເອົາ​ບົດຮຽນ ​ແລະ ຜົນສຳ​ເລັດຕ່າງໆ​ມາ​ເຜີຍ​ແຜ່​ໃຫ້​ແກ່​ສະພາ​ແຫ່ງ​ຊາດ​ລາວ ​ແລະ ຄວາມ​ເປັນ​ຫ່ວງ​ເປັນ​ໄຍຕໍ່​ປະຊາຊົນ​ລາວ​ທີ່​ປະສົບ​ອຸ​ທົກ​ກະ​ໄພ​ຢູ່​ແຂວງ​ອັດ​ຕະປື.

       ​ໂອກາດ​ດຽວກັນ, ສະຫາຍ  ຫງຽນ ດຶກ​ ຮາຍ ​ໄດ້​ສະ​ແດງ​ຄວາມ​ຂອບ​ໃຈ​ຕໍ່ການ​ຕ້ອນຮັບ​ອັນ​ອົບ​ອຸ່ນ ​ພ້ອມ​ທັງ​ລາຍ​ງານ​ຜົນ​ຂອງ​ການ​ພົບ​ປະ​ສອງ​ຝ່າຍ​ລະຫວ່າງ​ກຳມາ​ທິການ​ແຜນການ ການ​ເງິນ ​ແລະ ການກວດ​ສອບ ສະພາ​ແຫ່ງ​ຊາດ​ລາວ ກັບ​ກຳມາ​ທິການ​ການ​ເງິນ-ງົບ​ປະມານ ຂອງ​ສະພາ​ແຫ່ງ​ຊາດ ສສ.ຫວຽດນາມ ​ແລະ ການ​ກະກຽມ​ເນື້ອ​ໃຫ້​ແກ່ກອງ​ປະຊຸມ​ສຳ​ມະ​ນາ​ໃຫ້​ແກ່​ສະມາຊິ​ກສະພາ​ແຫ່ງ​ຊາດ ​ແລະ ສະພາ​ປະຊາ​ຊົນ​ແຂວງ ເພື່ອເປັນການ​ແລກປ່ຽນບາງ​ບັນຫາ​ທີ່​ທາງ​ກຳມາ​ທິການ​ການ​​ແຜນການ​ ການ​ເງິນ ​ແລະ ການກວດ​ສອບ ສະພາ​ແຫ່ງ​ຊາດ​ລາວມີ​ຄວາມ​ສົນ​ໃຈ ​ເປັນ​ຕົ້ນ​ແມ່ນ​ການ​ປັບປຸງ​ບັນດາ​ກົດໝາຍຕ່າງໆທີ່​ກ່ຽວຂ້ອງ​ເຖິງ​ພາສີ​ອາກອນ​, ບາງ​ບັນຫາ​ທີ່​ກ່ຽວຂ້ອງ​ເຖິງ​ການ​ນຳ​ໃຊ້​ຄັງ​ເງິນ​ແຮ​, ​ເງິນ​ສຳຮອງແຫ່ງ​ຊາດ ​ແລະ ບາງ​ເນື້ອ​ໃນ​ທີ່​ກ່ຽວຂ້ອງ​ກັບ​ສະພາ​ປະຊາຊົນ​ແຂວງ​ໃນ​ການ​ຄຸ້ມ​ຄອງ​ບໍລິຫານ​ງົບປະມານ​ແຫ່ງ​ລັດ; ພ້ອມ​ທັງ​ສະ​ແດງ​ຄວາມ​ເປັນ​ຫ່ວງ​ເປັນ​ໄຍ​ຕໍ່ປະຊາຊົນ​ທີ່​ປະສົບອຸ​ທົກ​ກະ​ໄພ​ທີ່​ເກີດ​ຂຶ້ນ​ຢູ່​ແຂວງ​ອັດ​ຕະປື ​ແລະ ​​ໃຫ້​ຄຳ​ໝັ້ນ​ສັນຍາ​ວ່າ​ຈະ​ໃຫ້ການ​ຊ່ວຍ​ເຫລືອ ສປປລາວ​ ຢ່າງ​ເຕັມທີ່.

                              (ນາງ ອາ​ລິນ ສຸ​ພິມ​ມະ​ປະດິດ)