ສພຊ ຈັດກອງປະຊຸມສໍາມະນາຮ່ວມກັບ ສພຊ ສສ ຫວຽດນາມ
02/08/2018

(ສພຊ) ໃນວັນທີ 27 ກໍລະກົດ 2018 ຜ່ານມາທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6); ກໍາມາທິການແຜນການ, ການເງິນ ແລະ ການກວດສອບ (ກຜງສ) ສະພາແຫ່ງຊາດ (ສພຊ) ສປປລາວ ໄດ້ຈັດກອງປະຊຸມສໍາມະນາຮ່ວມກັບກໍາມາທິການການເງິນ-ງົບປະມານສະພາແຫ່ງຊາດ ສສ.ຫວຽດນາມ ພາຍໃຕ້ຫົວຂໍ້ “ການຄຸ້ມຄອງງົບປະມານ ແລະ ການຂຶ້ນແຜນງົບປະມານແຫ່ງລັດປະຈໍາປີ, ການຄຸ້ມຄອງໂຄງການລົງທຶນຂອງລັດບ້ວງ ອື່ນໆໃນການຈົດຮັບ-ຈົດຈ່າຍ” ໂດຍການເປັນປະທານຮ່ວມຂອງທ່ານ ວິໄລວົງ ບຸດດາຄໍາ ປະທານ ກຜງສ ແລະ ທ່ານ ຫງວຽນ ດຶກ ຫາຍ ປະທານກໍາມາທິການການເງິນ ແລະ ງົບປະມານ ສະພາແຫ່ງຊາດ ສສ.ຫວຽດນາມ; ເຂົ້າຮ່ວມມີບັນດາທ່ານປະທານ-ຮອງປະທານກໍາມາທິການຂອງ ສພຊ, ປະທານ-ຮອງປະທານສະພາປະຊາຊົນແຂວງ, ນະຄອນຫລວງ, ຮອງລັດຖະມົນຕີ, ສສຊ, ຫົວໜ້າ-ຮອງຫົວໜ້າກົມ, ບັນດາແຂກທີ່ຖືກເຊີນ ແລະ ຄະນະຜູ້ແທນຈາກ ສສ.ຫວຽດນາມ.

       ທັງນີ້ ກໍເພື່ອກໍານົດເອົາເນື້ອໃນຫົວຂໍ້ທີ່ກ່ຽວພັນກັບການສ້າງ, ການຂຶ້ນແຜນການຈັດແບ່ງງົບປະມານຂອງຂະແໜງການສູນກາງ ແລະ ທ້ອງຖິ່ນ, ກົນໄກການພິຈາລະນາຮັບຮອງ ແລະ ການຕິດຕາມກວດກາການຄຸ້ມຄອງການໃຊ້ຈ່າຍງົບປະມານແຫ່ງລັດ ເຊິ່ງແມ່ນພາລະບົດບາດຂອງສະພາໃນການພິຈາລະນະຮັບຮອງເອົາແຜນງົບປະມານແຫ່ງລັດປະຈໍາປີ ແລະ ພິຈາລະນາຮັບຮອງເອົາການຈັດສັນແບ່ງງົບປະມານຂອງພະແນກການອ້ອມຂ້າງແຂວງ ແລະ ເມືອງຢູ່ທ້ອງຖິ່ນ. ພ້ອມກັນນັ້ນ ກໍເພື່ອເປັນການແລກປ່ຽນບົດຮຽນຈາກຜົນການກວດສອບ ເຊິ່ງຖືວ່າເປັນການພິຈາລະນາບັນຫາສໍາຄັນຂອງຊາດ ກ່ຽວກັບວຽກງານກວດສອບ ແລະ ການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃນການກວດກາການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ ແລະ ງົບປະມານແຫ່ງລັດ.

       ກອງປະຊຸມ ໄດ້ຮັບຟັງການສະເໜີກົນໄກການແບ່ງຂັ້ນຄຸ້ມຄອງ ແລະ ວິທີການສ້າງແຜນງົບປະມານແຫ່ງລັດຢູ່ຂັ້ນສູນກາງ ແລະ ທ້ອງຖິ່ນຂອງ ສສ.ຫວຽດນາມ; ບົດຮຽນກ່ຽວກັບການຄຸ້ມຄອງ ແລະ ການຂຶ້ນແຜນງົບປະມານແຫ່ງລັດປະຈໍາປີຈາກກະຊວງການເງິນ ສປປລາວ; ບົດກ່ຽວກັບປະສົບການໃນການຄຸ້ມຄອງກນເງິນ-ງົບປະມານ ແຫ່ງລັດຂອງ ສສ.ຫວຽດນາມ; ການຄຸ້ມຄອງການລົງທຶນຂອງລັດບ້ວງອື່ນໆໃນການຈົດຮັບ-ຈົດຈ່າຍຜ່ານງົບປະມານກະຊວງການເງິນ ສປປລາວ; ສະພາບຕົວຈິງຂອງໂຄງການ BT ແລະ BOT ຜ່ານຜົນການກວດສອບ ແຫ່ງລັດ ເຂດ 1 ສສ.ຫວຽດນາມ ແລະ ບົດກ່ຽວກັບການຕົກລົງ ແລະ ຕິດຕາມການກວດກາການໃຊ້ຈ່າຍງົບປະມານຂອງ ສພຊ ແຂວງນິງບິງ. ຈາກນັ້ນ,  ຜູ້ແທນກອງປະຊຸມທັງສອງຝ່າຍກໍໄດ້ສຸມກໍາລັງສະຕິປັນຍາຄົ້ນຄວ້າແລກປ່ຽນ ຄໍາຄິດຄໍາເຫັນໃສ່ບັນຫາທີ່ຕ່າງຝ່າຍໄດ້ໃຫ້ຄວາມສົນໃຈ.

       ໂອກາດັ່ງກ່າວ ທ່ານ ວິໄລວົງ ບຸດດາຄໍາ ໄດ້ມີຄໍາເຫັນຕໍ່ກອງປະຊຸມວ່າ ກອງ​ປະ​ຊຸມ​​ຄັ້ງ​ນີ້ ​ມີ​ຄວາມ​ໝາຍ​ຄວາມ​ສໍາເປັນ​ພິ​ເສດ​ ເພາະ​ວ່າ​ພວກ​ເຮົາ​ໄດ້​ຕ້ອນ​ຮັບ ແລະ ໄດ້​ຮັບ​ຟັງ​ການ​ລາ​ຍບົດ​ຮຽນ ແລະ​ປະ​ສົບ​ການ​ກ່​ຽວ​ກັບກ​ານ​ຄຸ້ມ​ຄອງ ແລະ​ ການ​ຂື້ນ​ແຜນ​ງົບ​ປະ​ມາ​ນ, ການຄຸ້​ມ​ຄອງ​ໂຄງ​ການ​ລົງ​ທຶນ​ຂອງ​ລັດ​ບ້ວງ​ອື່ນໆ​ ໃນ​ການ​ຈົດ​ຮັບ​-ຈົດ​ຈ່າຍ ຜ່ານ​ງົບ​ປະ​ມານ ແລະ​ ກ​ານ​ຄຸ້ມ​ຄອງ​ບັນ​ດາ​ກອງ​ທຶນ​ຕ່າງໆ ແລະ ​ການກວດ​ສອບ​ໂຄງ​ການ ສ້າງ ແລະ​ມອບ​ໂອນ (BT) ແລະ​ໂຄງ​ການ​ສ້າງ, ດໍາເນີນ​ການ ແລະ​ມອບ​ໂອນ (BOT) ຈາກ ກຳມ​າ​ທິ​ການ​ການ​ເງິນ-ງົບ​ປະ​ມານ, ອົງ​ການ ກວດ​ສອບ​ແຫ່ງ​ລັດ ແລະ​ກະ​ຊວງ​ການ​ເງິນ ສ​ສ ຫວຽດ​ນາມ ແລະ ກະ​ຊວງ​ການ​ເງິນ ສ​ປ​ປ ລາວ.

    ກອງ​ປະ​ຊຸມ​ໄດ້​ດຳ​ເນີນ​ໄປ​ດ້ວຍ​ບັນ​ຍາ​ກາດ​ຟົດ​ຟື້​ນ ສະ​ໜິດ​ສະ​ໜົມ​ຖານ​ອ້າຍ​ນ້ອງ ໂດຍ​ຜູ້​ເຂົ້າ​ຮ່ວມກອງ​ປະ​ຊຸມ​ ໄດ້​ສຸມ​ໃສ່​ການ​ປະ​ກອບ​ຄວາມ​ຄິດ​ຄວາມ​ເຫັນ​ຢ່າງ​ຈິງ​ໃຈ ແລະ ດ້ວຍ​ຄວາມ​ຮັບ​ຜິດ​ຊອບ​ສູງ ໂດຍ​ໄດ້ຍົກ​ໃຫ້​ເຫັນ​ບົດ​ຮຽນ ແລະ ​ສ​ະ​ພາບ​ການ​ຕົວ​ຈິງ​ຂອງ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ ມາ​ນຳ​ສະ​ເໜີ​ຕໍ່​ກອງ​ປະ​ຊຸມ​ໃນ​ຄັ້ງ​ນີ້ ເພຶ່​ອ​ພ້ອມ​ກັນ​ຊອກ​ຫາ​ວິ​ທີ​ການ​ໃນ​ການ​ປັບ​ປຸງ ແລະ ​ແກ້​ໄຂ​ບັນ​ຫາ ແລະ ​ສິ່ງ​ທ້າ​ທາຍ​ເຫລົ່າ​ນັ້​ນ ແລະເຮັດ​ວຽກ​ງານ​ມີ​ປະ​ສິດ​ທິ​ພາບ​ປະ​ສິດ​ທິ​ຜົນ​ຂື້ນກວ່າ​ເກົ່​າ.

                                    (ສອນສັກ ວັນວິໄຊ)