ພົບປະສອງຝ່າຍກໍາມາທິການແຜນການ, ການເງິນ ແລະ ການກວດສອບ ລາວ-ຫວຽດນາມ
30/07/2018

(ສພຊ) ວັນພະຫັດທີ 26 ກໍລະກົດ 2018 ທີ່ໂຮງແຮມເມືອງແທ໋ງ ນະຄອນຫລວງວຽງຈັນ, ໄດ້ມີການພົບປະສອງຝ່າຍລາວ-ຫຽດນາມ ເຊິ່ງຝ່າຍລາວນໍາໂດຍ ທ່ານ ວິ​ໄລ​ວົງ ບຸດ​ດາ​ຄຳ ກຳມະ ການສູນກາງພັກ, ປະທານກໍາມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ ສ​ປ​ປລາວ, ​ຝ່າຍຫວຽດນາມນໍາໂດຍທ່ານ ຫງຽນ ດຶກ ຫາຍ ກຳ​ມະ​ການ​ສູນ​ກາງ​ພັກກອມມູນິດ ຫວຽດນາມ, ປະ​ທານ​ກຳ​ມາ​ທິ​ການການ​ເງິນ-ງົບ​ປະ​ມານ ສະ​ພາ​ແຫ່ງ​ຊາດ ແຫ່ງ ສ​ສ.ຫວຽດ​ນາມ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ລະຫວ່າງວັນທີ 26-28 ສິງຫາ 2018.

        ໃນການພົບປະສອງຝ່າຍຄັ້ງນີ້, ເພື່ອເປັນການປະກອບສ່ວນເສີມຂະຫຍາຍສາຍພົວພັນມິດ ຕະພາບ ແລະ ການຮ່ວມມືຮອບດ້ານລະຫວ່າງສອງພັກສອງລັດ ແລະ ປະຊາຊົນສອງຊາດ ລາວ- ຫວຽດນາມ ​ເວົ້າ​ລວມ, ​ເວົ້າ​ສະ​ເພາະ​​ລະຫວ່າງ​ສອງສະພາ​ແຫ່ງ​ຊາດ​ ພິ​ເສດ​ແມ່ນສອງລະຫວ່າງກໍາ ມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ ສປປລາວ ແລະ ​ກຳ​ມາ​ທິ​ການການ​ເງິນ-ງົບ​ປະ​ມານ ສະ​ພາ​ແຫ່ງ​ຊາດ ສ​ສ.ຫວຽດ​ນາມ; ເພື່ອສືບຕໍ່ການຈັດຕັ້ງຜັນຂະຫຍາຍ ເນື້ອໃນຈິດໃຈ ຂອງຄວາມເຂົ້າໃຈ ແລະ ການພົວພັນຮ່ວມມືສອງຝ່າຍທີ່ມີມູນເຊື້ອອັນດີງາມມາ ເປັນເວລາດົນນານ ລະຫວ່າງສະພາແຫ່ງຊາດ ສປປລາວ ແລະ ສສ.ຫວຽດນາມ ໂດຍສະເພາະການ ຮ່ວມມືດ້ານວິຊາການ, ລະຫວ່າງສອງກໍາມາທິການ; ພ້ອມກັນນັ້ນ, ກໍເປັນ​ການ​ຜັນ​ຂະ​ຫ​ຍາຍ ແລະ​ ສືບຕໍ່​ຜົນສຳ​ເລັດ​ຂອງ​ການ​ຢ້ຽມ​ຢາມ ແລະ​ ກ​ອງ​ປະ​ຊຸມ​ຮ່ວມລະ​ຫວ່າງ​ສອງ​ກຳ​ມາ​ທິ​ການ​ ທີ່​​ແຂວງ ກວາງ​ນາມ, ນະ​ຄອນ​ດາ​ນັງ ໃນກາງ​ປີ 2017; ເພື່ອເປັນການຍາດແຍ່ງເອົາບົດຮຽນ ແລະ ປະສົບ ການຈາກ ສສ.ຫວຽດນາມ ໂດຍສະເພາະບົດຮຽນກ່ຽວກັບການສ້າງ ແລະ ການຕິດຕາມກວດກາ ແຜນງົບປະມານແຫ່ງລັດຂັ້ນສູນກາງ ແລະ ທ້ອງຖິ່ນ, ອາກອນສິ່ງແວດລ້ອມ, ກົດໝາຍວ່າດ້ວຍ ການຄຸ້ມຄອງໜີ້ສາທາລະນະ ເພື່ອເປັນຂໍ້ມູນຖານໃຫ້ແກ່ການປະກອບຄໍາຄິດຄໍາເຫັນຂອງສະມາ ຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ໃນກອງປະຊຸມສະໄໝສາມັນຂອງສະ ພາແຫ່ງຊາດ ແລະ ສະພາປະຊາຊົນຂັ້ນແຂວງ.

   ໃນການພົບປະ, ທັງສອງຝ່າຍໄດ້ແຈ້ງສະພາບການພົ້ນເດັ່ນການພັດທະນາເສດຖະກິດ-ສັງ ຄົມ, ການເຄື່ອນໄຫວຂອງສະພາແຫ່ງຊາດ ໂດຍສະເພາະການປະຕິບັດຕາມພາລະບົດບາດຂອງ ກໍາ ມາທິການຕົນໃຫ້ກັນ ແລະ ກັນຊາບໂດບສັງເຂບ; ພ້ອມກັນນັ້ນ, ຝ່າຍລາວຍັງໄດ້ສະເໜີແລກ ປ່ຽນຖອດຖອນບົດຮຽນ ແລະ ຊອກຮູ້ຮໍ່າຮຽນນໍາ ສສ.ຫວຽດນາມ ເຊິ່ງມີບາງບັນຫາດັ່ງນີ້: ສະ​ເໜີ​ວິ​ຊາ​ການຂອງ​ກຳ​ມາ​ທິ​ການ​ການ​ເງິ​ນ-ງົບ​ປະ​ມານ ສະພາ​ແຫ່ງ​ຊາດ​ຫວຽດນາມ ​ມາ​ແນະ​ນຳບົດ    ​ຮຽ​ນກ່ຽວ​ກັບກົດ​ໝາຍຄື: ກົດ​ໝາຍວ່າດ້ວຍອາ​ກອນ​ລາຍ​ໄດ້, ​ກົດ​ໝາ​ຍ​ວ່າ​ດ້ວຍ​ອາ​ກອນ​ຊົມ​ໃຊ້, ກົດ​ໝາຍ​ວ່າ​ດ້ວຍ​ສ່ວຍ​ສາ​ອາ​ກອນ ແລະ ກົດ​ວ່າ​ດ້ວ​ຍ​ທະ​ນາ​ຄານ​ທຸ​ລະ​ກິດ, ບົດຮຽນ​ຂອງ ສສ ຫວຽດນາມ ການສ້າງ ແລະ ປັບປຸງກົດໝາຍ; ແລກ​ປ່ຽນ​ບົດ​ຮຽ​ນໃນການຄຸ້ມ​ຄອງ​ການ​ເກັບ​ລາຍ​ຮັບ-ລາຍ​ຈ່າຍ; ບົດຮຽນ​ໃນ​ການ​ຄົ້ນ​ຄວ້າ​ພິ​ຈາ​ລະ​ນາ​ບົດ​ລາຍ​ງານ​ການກວດ​ສອບບົດ​ສະ​ຫຼຸບ​ຂາດ​ຕົວ​ການ​ຈັດ​ຕັ້ງ​ປະ​ຕິ​ບັດ​ງົບ​ປະ​ມານ​ແຫ່ງ​ລັດ​ປະ​ຈຳປີ ເປັນ​ຕົ້ນ​ແມ່ນ​ຂັ້​ນ​ຕອນການ​ລາຍ​ງານ ແລະ ​ເນື້ອ​ໃນ​ທີ່​ຄວນ​ເອົາ​ໃຈ​ໃສ່​ໃນ​ຄວາມ​ຮັບ​ຜິດ​ຊອບ​ຂອງ​ກຳມາທິການແຜນການ, ການເງິນ ແລະ ການ ກວດສອບ ກໍຄືສະ​ພາ​ແຫ່ງ​ຊາດ; ໃນ​ຕົ້ນ​ປີ 2019 ລະ​ຫວ່າງ​ເດືອນກຸມ​ພາ-ມີ​ນາ ກຳ​ມາ​ທິ​ການ​ແຜນ​ການ, ການ​ເງິນ ແລະ​ການກວດ​ສອບ ສະພາແຫ່ງຊາດລາວ ຈະ​ໄດ້​ເປັນ​ເຈົ້າ​ພາບ​ຈັດ​ກອງ​ປະ​ຊຸມ​ສາ​ກົນ​ກ່ຽວ​ກັບ​ວຽກ​ງານກວດ​ສອບ​ຮ່ວມ​ກັບ​ກຳ​ມາ​ທິ​ການ​ການ​ເງິນ-ງົບ​ປະ​ມານ ​ຂອງ 4 ປະ​ເທດ (ລາວ, ຫວ​ຽດ​ນາມ, ກຳ​ປູ​ເຈຍ ແລະ ​ມຽນມ້າ) ສືບ​ຕໍ່​ກອງ​ປະ​ຊຸມ​ໃນ​ປີ 2017 ທີ່​ ສະພາແຫ່ງຊາດ ກໍາປູເຈຍ​ເປັນ​ເຈົ້າ​ພາບ.

        ໃນໂອກາດມາເຮັດວຽກຢູ່ ສປປລາວ ໃນຄັ້ງນີ້, ຄະນະຜູ້ແທນກໍາມາທິການການ​ເງິນ-ງົບ​ປະ​ມານ ສະ​ພາ​ແຫ່ງ​ຊາດ ສ​ສ.ຫວຽດ​ນາມ ໄດ້ເຂົ້າຢ້ຽມຂໍ່ານັບທ່ານ ນາງ ປານີ ຢາທໍ່ຕູ້ ກໍາມະການກົມ ການເມືອງສູນກາງພັກ, ປະທານສະພາແຫ່ງຊາດ; ແລະ ໃນວັນ​ທີ 27 ກໍລະກົດ 2018 ສອງ​ກໍາມາ​ທິການ​ຈະ​ໄດ້​ພ້ອມ​ກັນ​ຈັດ​ກອງ​ປະຊຸມ​ສໍາ​ມະ​ນາ​ດ້ານ​ວິຊາ​ການ​ໃນ​ຫົວ​ຂໍ້: ກົນໄກການແບ່ງຂັ້ນຄຸ້ມ ຄອງ ແລະ ວິທີການ​ສ້າງ​ແຜນ​ງົບປະມານແຫ່ງລັດ, ​ການຕິດຕາມກວດກາແຜນງົບປະມານແຫ່ງລັດ ຢູ່ຂັ້ນສູນກາງ ແລະ ທ້ອງຖິ່ນ ຂອງ ສສ.ຫວຽດນາມ; ບົດຮຽນກ່ຽວກັບປະສົບການໃນການຄຸ້ມ ຄອງການເງິນ-ງົບປະມານແຫ່ງລັດ ຂອງ ສສ.ຫວຽດນາມ; ສະພາບຕົວຈິ່ງຂອງໂຄງການ BT ແລະ BOT ຜ່ານຜົນການກວດສອບ ແລະ ບັນຫາທີ່ສະເໜີຂຶ້ນມາ ​ເຊິ່ງຜູ້​ເຂົ້າຮ່ວມ​ມາ​ຈາກກະຊວງ-ອົງ ການ ​ແລະ ສະພາ​ປະຊາຊົນ​ທັງ 18 ​ແຂວງ​ທົ່ວ​ປະ​ເທດ​ເຂົ້າ​; ພ້ອມທັງເຄື່ອນໄຫວຢ້ຽມຢາມພື້ນ ຖານເສດຖະກິດ ແລະ ວັດທະນະທໍາຢູ່ໃນນະຄອນຫລວງວຽງຈັນ.

(ສົມນຶກ ແກ້ວໄຊຍະຈັກ)