ສະພາແຫ່ງຊາດແຫ່ງ ສປປ ລາວ-ລາຍລະອຽດຂອງຂ່າວສານ
 

ສພຊ ເປີດຊຸດເຝິກອົບຮົມທິດສະດີການເມືອງ-ການປົກຄອງໄລຍະສັ້ນ 45 ວັນ ຊຸດທີ IV
26/07/2018

(ສພຊ) ວັນທີ 23 ກໍລະກົດຜ່ານມາ, ທີ່ຫ້ອງປະຊຸມຄະນະເລຂາທິການສະພາ ແຫ່ງຊາດ (ຫລັກ 6) ໄດ້ເປີດຊຸດເຝິກອົບຮົມທິດສະດີການເມືອງ-ການປົກຄອງ ໄລຍະ ສັ້ນ 45 ວັນ ຊຸດທີ IV ໃຫ້ແກ່ສະມາຊິກພັກ-ພະນັກງານສະພາແຫ່ງຊາດ (ສພຊ)  ແລະ ອົງການກວດສອບແຫ່ງລັດ (ອກລ) ທັງໝົດ 34 ສະຫາຍ; ໂດຍການເປັນປະທານ ຂອງສະຫາຍ ນາງ ສີໃສ ລືເດດມູນສອນ ກໍາມະການສູນກາງພັກ, ຮອງເລຂາຄະນະພັກ, ຮອງປະທານສະພາແຫ່ງຊາດ; ເຂົ້າຮ່ວມມີສະຫາຍ ສະໝຸດທອງ ສົມພານິດ ຮອງຫົວ ໜ້າສະຖາບັນການເມືອງ-ການປົກຄອງແຫ່ງຊາດ, ຕາງໜ້າຈາກອົງການກວດສອບ ແຫ່ງລັດ, ເລຂາ-ຮອງເລຂາຂອງບັນດາຮາກຖານພັກພາຍໃນສະພາແຫ່ງຊາດ.

       ຈຸດປະສົງຂອງການເປີດຊຸດເຝິກອົບຮົມຄັ້ງນີ້ ເພື່ອຍົກສູງຄວາມຮູ້ພື້ນຖານທາງ ດ້ານທິດສະດີການເມືອງ-ການປົກຄອງ ເປັນຕົ້ນແມ່ນຫລັກມູນພື້ນຖານທິດສະດີມາກ-ເລນິນ ໃຫ້ແກ່ສະມາຊິກພັກ-ພະນັກງານ, ເຊື່ອມຊຶມກໍາແໜ້ນແນວທາງນະໂຍບາຍ ຂອງພັກ ທັງເປັນການປັບປຸງ ແລະ ຍົກລະດັບທາງດ້ານແນວຄິດການເມືອງ, ທັດສະນະ ຊົນຊັ້ນກໍາມະກອນ,  ເຊື່ອໝັ້ນຕໍ່ການນໍາພາຂອງພັກ; ແນໃສ່ສ້າງສະມາຊິກພັກ-ພະນັກ ງານຫລັກແຫລ່ງນໍາພາລຸ້ນສືບທອດປ່ຽນແທນ ໃຫ້ມີທັດສະນະຫລັກໝັ້ນການເມືອງ ທີ່ໜັກແໜ້ນ, ມີຄຸນສົມບັດສິນທໍາປະຕິວັດ, ສ້າງແບບແຜນດໍາລົງຊີວິດທີ່ປອດໃສ, ມີຄວາມຮັບຜິດຊອບສູງຕໍ່ໜ້າທີ່ວິຊາສະເພາະ, ມີຄວາມຮູ້ຄວາມສາມາດ ປະກອບສ່ວນ ເຂົ້າໃນການເຄື່ອນໄຫວ ແລະ ປະຕິບັດໜ້າທີ່ວຽກງານໃຫ້ມີຄຸນນະພາບ ແລະ ປະສິດ ທິຜົນດີ.

       ເນື້ອໃນການເຝິກອົບຮົມຄັ້ງນີ້ ປະກອບດ້ວຍ: ພາກວິຊາປັດຊະຍາ, ພາກວິຊາວິ ທະຍາສາດການເມືອງ, ພາກວິຊາລັດທິສັງຄົມນິຍົມວິທະຍາສາດ, ພາກວິຊາບໍລິຫານ ສາດ ແລະ ພາກວິຊາກໍ່ສ້າງພັກ ລວມມີວິຊາທັງໝົດ 39 ບົດ.

ພ້ອມດຽວກັນນັ້ນ, ກອງປະຊຸມຍັງໄດ້ຮັບຟັງການໂອ້ລົມ ແລະ ໃຫ້ທິດຊີ້ນໍາຂອງ ສະຫາຍຮອງເລຂາຄະນະພັກສະພາແຫ່ງຊາດ ເຊິ່ງສະຫາຍໄດ້ມີຄໍາເຫັນບາງຕອນສໍາຄັນ ວ່າ: ການເຝິກອົບຮົມຄັ້ງນີ້ ເປັນການຍົກລະດັບຫລັກໝັ້ນຄຸນທາດການເມືອງໃຫ້ໜັກ ແໜ້ນ, ຄຸນສົມບັດສິນທໍາປະຕິວັດ ກໍຄືຈັນຍາບັນຈັນຍາທໍາຂອງພະນັກງານ ທີ່ຖືກ ມອບໝາຍຈາກພັກ-ລັດ ກໍຄືປະຊາຊົນ; ພ້ອມທັງສະເໜີໃຫ້ຄະນະຮັບຜິດຊອບ ນໍາເອົາ ເອກະສານທີ່ເປັນມະຕິຄະນະປະຈໍາສະພາແຫ່ງຊາດ ວ່າດ້ວຍມາດຖານເງື່ອນໄຂຂອງພະ ນັກງານ ໃຫ້ບັນດານັກເຝິກອົບຮົມຕີບັນຫາໃຫ້ອອກ; ແລະ ເປັນການແລກປ່ຽນຖອດ ຖອນບົດຮຽນເຊິ່ງກັນ ແລະ ກັນ; ສະເໜີໃຫ້ນັກເຝິກອົບຮົມປະຕິບັດລະບຽບວິໄນໃນ ການເຝິກອົບຮົມຢ່າງເຄັ່ງຄັດ, ຕັ້ງໃຈຮໍ່າຮຽນໃຫ້ໄດ້ຄຸນນະພາບຢ່າງແທ້ຈິງ; ສະເໜີໃຫ້ ຄະນະຮັບຜິດຊອບລາຍງານຜົນເກັບກ່ຽວການເຝິກອົບຮົມໃຫ້ໄດ້ຄຸນນະພາບຕົວຈິງ ພ້ອມດຽວກັນນີ້, ສະເໜີໃຫ້ຄະນະຮັບຜິດຊອບເອົາໃຈໃສ່ຕິດຕາມຮອບດ້ານແຕ່ລະວັນ ຂອງການເຝິກອົບຮົມ, ພ້ອມທັງເຮັດແບບຟອມການຕິດຕາມຂອງແຕ່ລະວັນຄັກແນ່ ເພື່ອລາຍງານໃຫ້ສະຫາຍເລຂາຄະນະພັກສະພາແຫ່ງຊາດ.

(ສົມນຶກ ແກ້ວໄຊຍະຈັກ)