ຄະນະຜູ້ແທນສະພາແຫ່ງຊາດລາວ ເຂົ້າຮ່ວມກອງປະຊຸມສະມັດຊາລັດຖະສະພາຝຣັ່ງໂກໂຟນີ  ຄັ້ງທີ 44 ທີ່ ນະຄອນເກເບັກ, ປະເທດການາດາ
19/07/2018

(ສພຊ)ຄະນະຜູ້ແທນສະພາແຫ່ງຊາດລາວ ນຳໂດຍ ທ່ານ ເອກະສະຫວ່າງ ວົງວິຈິດ ປະທານກຳມາທິການການຕ່າງປະເທດ ສະພາແຫ່ງຊາດລາວ, ຮອງປະທານສະມັດຊາ ລັດຖະສະພາຝຣັ່ງໂກໂຟນີ, ປະທານຄະນະລັດຖະສະພາຝຣັ່ງໂກໂຟນີຂອງສະພາແຫ່ງຊາດລາວ ພ້ອມດ້ວຍຄະນະ ​ໄດ້ເຂົ້າຮ່ວມກອງປະຊຸມສະມັດຊາລັດຖະສະພາຝຣັ່ງໂກໂຟນີ ຄັ້ງທີ 44 ພາຍ​ໃຕ້ຫົວ​ຂໍ້ “ການດໍາເນີນງານທີ່ດີຂອງລັດຖະສະພາໃນຍຸກດີຈິຕອນ” ຊຶ່ງ​ໄດ້ມີ​ຂື້ນ ໃນລະຫວ່າງວັນທີ 5-10 ກໍລະກົດ 2018 ທີ່ ນະຄອນ ເກເບັກ, ປະເທດ ການາດາ. ເຂົ້າຮ່ວມກອງ​ປະຊຸມ​ຄັ້ງ​ນີ້ ມີ​ປະທານ​-ຮອງ​ປະທານ​ສະພາແຫ່ງຊາດ ​ແລະ ສະມາຊິກສະພາແຫ່ງຊາດ ຈາກປະເທດສະມາຊິກ ທີ່ໃຊ້ພາສາຝຣັ່ງທັງໝົດ 83 ປະ​ເທດ ​ໃນ​ນີ້​ມີສະມາຊິກສົມບູນ 51 ປະເທດ, ສະມາຊິກສຳຮອງ 15 ປະເທດ ແລະ ຜູ້ສັງເກດການ 17 ປະເທດ  ເຂົ້າຮ່ວມທັງໝົດ ມີ 370 ທ່ານ.

          ໃນກອງປະຊຸມຄັ້ງ​ນີ້ ທ່ານ ​ເອກ​ສະຫວ່າງ ​ວົງວິຈິດ, ຫົວໜ້າຄະນະຜູ້ແທນ ສະພາແຫ່ງຊາດລາວ ກໍໄດ້ຂື້ນສະ​ເໜີ​ບົດ​ກ່ຽວກັບການດໍາເນີນງານ ທີ່ດີຂອງສະພາ​ແຫ່ງ​ຊາດ​ລາວໃນຍຸກດີຈິຕອນ (Les Bonnes Pratiques des Parlements a l’ Ere du numérique)” ຕາມກອບເນື້ອໃນກອງປະຊຸມ, ​ໂດຍ ທ່ານ​ໄດ້​ຍົກ​ໃຫ້ເຫັນບົດບາດ ​ແລະ​ ຄວາມ​ສຳຄັນ​ຂອງ​ລະບົບ​ດີ​ຈີຕອນ ທີ່​ນຳ​ໃຊ້​ເຂົ້າໃນ​ການ​ອຳນວຍ​ຄວາມ​ສະດວກ​ໃຫ້​ແກ່​ການ​ປະຕິບັດ​ໜ້າ​ທີ່​ຂອງ​ສະພາ​ແຫ່ງ​ຊາດ​ລາວ ​ໂດຍສະເພາະແມ່ນການນໍາໃຊ້ລະບົບ​ດີຈີຕອນ ເພື່ອລົງ​ຄະ​ແນນ​ສຽງ​ຮັບຮອງເອົາ ການພິຈາລະນາບັນຫາສຳຄັນຂອງຊາດ ໃນກອງປະຊຸມສະໄໝສາມັນໃນແຕ່ລະຄັ້ງ ລວມທັງ ການຄວບຄຸມການດໍາ​ເນີນກອງປະຊຸມ, ການປະກອບຄໍາເຫັນ ແລະ ການສະໜອງຂໍ້ມູນ ໃຫ້ແກ່ກອງປະຊຸມດ້ວຍລະບົບດີຈີຕອນ. ພ້ອມດຽວກັນ, ຄະນະຜູ້ແທນລາວ ຍັງໄດ້ເຂົ້າຮ່ວມກອງປະຊຸມກໍາມາທິການຕ່າງໆ ຂອງສະມັດຊາລັດຖະສະພາຂອງບັນດາປະເທດ ທີ່ໃຊ້ພາສາຝຣັ່ງ.

ບຸນເກີດ ວົງໄຊຍາ