ສະພາແຫ່ງຊາດແຫ່ງ ສປປ ລາວ-ລາຍລະອຽດຂອງຂ່າວສານ
 

ບົດຖະແຫຼງຂ່າວ
02/07/2018

ບົດຖະແຫຼງຂ່າວ

ຂອງທ່ານ ນາງ ສວນສະຫວັນ ວິຍະເກດ, ກໍາມະການສໍາຮອງສູນກາງພັກ,

ຄະນະປະຈໍາສະພາແຫ່ງຊາດ, ເລຂາທິການສະພາແຫ່ງຊາດ ກ່ຽວກັບຜົນສໍາເລັດກອງປະຊຸມສະໄໝສາມັນ

ເທື່ອທີ 5 ຂອງສະພາແຫ່ງຊາດ ຊຸດທີ VIII

ວັນທີ 28 ມິຖຸນາ 2018 ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫຼັກ 6)                                                                                                                                 

                                                        ------------------                        

ບັນດາທ່ານທີ່ນັບຖື ແລະຮັກແພງ!

ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII ໄດ້ດໍາເນີນມາເປັນເວລາ 18 ວັນ ໂດຍພາຍໃຕ້ການຊີ້ນໍາ-ນໍາພາ ຂອງຄະນະປະຈໍາສະພາແຫ່ງຊາດ ແລະການສຸມເຫື່ອເທແຮງສະຕິປັນຍາ ຂອງບັນດາທ່ານສະມາຊິກສະພາແຫ່ງຊາດ, ການປະກອບສ່ວນຂອງລັດຖະບານ, ອົງການຈັດຕັ້ງພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນ ແລະທຸກພາກສ່ວນທີ່ກ່ຽວຂ້ອງ ຕາມພາລະບົດບາດຂອງຕົນ ເຂົ້າໃນການດຳເນີນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII ເພື່ອເຮັດໃຫ້ການພິຈາລະນາ ແລະຮັບຮອງເອົາບັນຫາສໍາຄັນຂອງຊາດ ຕາມສິດ ແລະໜ້າທີ່ຂອງສະພາແຫ່ງຊາດ ທີ່ໄດ້ກໍານົດໄວ້ໃນລັດຖະທໍາມະນູນ ແລະກົດໝາຍ ໄດ້ຮັບຜົນສໍາເລັດຕາມຄາດໝາຍທີ່ວາງໄວ້.

ຂ້າພະເຈົ້າ, ຕາງໜ້າຄະນະປະຈໍາສະພາແຫ່ງຊາດ ມີຄວາມຍິນດີ ແລະຖືເປັນກຽດແຈ້ງມາຍັງບັນ ດາທ່ານ ພະນັກງານ-ລັດຖະກອນ, ທະຫານ, ຕໍາຫຼວດ ພີ່ນ້ອງປະຊາຊົນລາວບັນດາເຜົ່າໃນທົ່ວປະເທດ ແລະພີ່ນ້ອງຊາວລາວທີ່ອາໄສຢູ່ຕ່າງປະເທດຮັບຊາບ ກ່ຽວກັບຜົນສໍາເລັດຂອງກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII ດັ່ງນີ້:

          I. ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII ໄດ້ເລີ່ມໄຂຂຶ້ນໃນຕອນເຊົ້າຂອງວັນອັງຄານ,​ ວັນທີ 5 ມິຖຸນາ 2018 ແລະໄດ້ດໍາເນີນເຖິງຕອນບ່າຍວັນພະຫັດ, ວັນທີ 28 ມິຖຸນາ 2018 ຊຶ່ງໄດ້ໃຊ້ເວລາດໍາເນີນກອງປະຊຸມທັງໝົດ 18 ວັນ (ບໍ່ລວມວັນພັກລັດຖະການ). ໃນກອງປະຊຸມຄັ້ງນີ້ ນອກຈາກການເຂົ້າຮ່ວມຂອງສະມາຊິກສະພາແຫ່ງຊາດ ຊຸດທີ VIII ຍັງມີການນໍາຂັ້ນສູງຂອງພັກ-ລັດ, ສະມາຊິກລັດຖະບານ, ພະນັກງານອາວຸໂສ-ບໍານານ ແລະແຂກຖືກເຊີນອີກຈຳນວນໜຶ່ງ ເຂົ້າຮ່ວມ.

          II. ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII ໄດ້ຮັບຟັງລາຍງານ, ຊີ້ແຈງ, ພິຈາລະນາ ແລະຮັບຮອງເອົາບັນຫາສໍາຄັນຕ່າງໆ ຄື:

1. ພິຈາລະນາຮັບຮອງເອົາ ມະຕິຂອງສະພາແຫ່ງຊາດ ວ່າດ້ວຍການຈັດ​ຕັ້ງ​ປະຕິບັດ​ແຜນ​ພັດທະນາ​ເສດຖະກິດ​-ສັງຄົມ, ​ແຜນ​ງົບປະມານ​ແຫ່ງ​ລັດ ປະຈໍາ 4 ເດືອນ, ຄາດຄະເນການປະຕິບັດແຜນ 6 ເດືອນຕົ້ນ​ປິີ 2018​ ແລະ​ທິດ​ທາງ​ວຽກ​ງານ​ຈຸດ​ສຸມ ປະ​ຈໍາ 6 ​ເດືອນ​ທ້າຍ​ປີ 2018 ຂອງລັດຖະບານ.

2. ພິຈາລະນາຮັບຮອງເອົາ ມະຕິຂອງສະພາແຫ່ງຊາດ ວ່າດ້ວຍການຊີ້ແຈງຂອງລັດຖະບານ ຕໍ່ຄໍໍາຊັກຖາມຂອງສະພາແຫ່ງຊາດ ຊຶ່ງປະກອບມີ 4 ບັນຫາສໍາຄັນ ໄດ້ແກ່ບັນຫາໂຄງປະກອບລາຄານໍ້າມັນຢູ່ປະເທດເຮົາ, ການຈັດຕັ້ງປະຕິບັດວຽກງານ 3 ສ້າງ ຕິດພັນກັບການພັດທະນາຊົນນະບົດ ແລະລຶບລ້າງຄວາມທຸກຍາກ, ມາດຕະການ ແລະວິທີການແກ້ໄຂປະກົດການຫຍໍ້ທໍ້ໃນສັງຄົມ, ການແກ້ໄຂຜົນກະທົບຈາກໂຄງການລົງທຶນຂອງລັດ ໂດຍສະເພາະການກໍ່ສ້າງເສັ້ນທາງລົດໄຟ.

3. ພິຈາລະນາຮັບຮອງເອົາ ມະຕິຂອງສະພາແຫ່ງຊາດ ວ່າດ້ວຍແຜນແມ່ບົດຈັດສັນທີ່ດິນແຫ່ງຊາດ ຮອດປີ 2030.

4. ພິຈາລະນາຮັບຮອງເອົາ ມະຕິຂອງສະພາແຫ່ງຊາດ ວ່າດ້ວຍການແຕ່ງຕັ້ງສະມາຊິກສະພາຜູ້ພິພາກສາ  ຂອງສານປະຊາຊົນສູງສຸດ.

5. ຮັບຟັງລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດມະຕິ ຂອງກອງປະຊຸມສະພາແຫ່ງຊາດ ສະບັບເລກທີ 018/ສພຊ, ລົງວັນທີ 28 ພະຈິກ 2016 ວ່າດ້ວຍການອອກນິຕິກໍາລຸ່ມກົດໝາຍ  ແລະຜົນກະທົບຈາກການນໍາໃຊ້ເຄມີອັນຕະລາຍເກີນຄ່າມາດຕະຖານ ຕໍ່ສິ່ງແວດລ້ອມສັງຄົມ ແລະທໍາມະຊາດ.

6. ຮັບຟັງລາຍງານກ່ຽວກັບການເຄື່ອນໄຫວວຽກງານ6ເດືອນຕົ້ນປີ ແລະທິດທາງວຽກງານ

ຈຸດສຸມ 6 ເດືອນທ້າຍປີ 2018 ຂອງສະພາແຫ່ງຊາດ ຊຶ່ງເຫັນວ່າໃນໄລຍະຜ່ານມາສະພາແຫ່ງຊາດ ກໍໄດ້ເອົາໃຈໃສ່ປະຕິບັດພາລະບົດບາດຂອງຕົນຢ່າງຮອບດ້ານ ຕາມທີ່ໄດ້ກຳນົດໄວ້ໃນລັດຖະທຳມະນູນ ແລະກົດໝາຍ. ແຕ່ຄຽງຄູ່ກັນນັ້ນ, ໃນ 6 ເດືອນທ້າຍ ປີ 2018 ສະພາແຫ່ງຊາດ ກໍຈະຕ້ອງໄດ້ເພີ່ມທະວີການປະຕິບັດພາລະບົດບາດຂອງຕົນໃຫ້ສູງຂຶ້ນຕື່ມ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່.

ຕິດພັນກັບການພິຈາລະນາຮັບຮອງເອົາບັນຫາສຳຄັນຕ່າງໆເທິງນັ້ນ, ກອງປະຊຸມໄດ້ຮັບຟັງການຊີ້ແຈງ ຂອງທ່ານນາຍົກລັດຖະມົນຕີ ແລະສະມາຊິກລັດຖະບານຈຳນວນໜຶ່ງ ເຊັ່ນ: ທ່ານ ນາຍົກລັດຖະ ມົນຕີ ໄດ້ຊີ້ແຈງກ່ຽວກັບການພັດທະນາຊົນນະບົດ ແລະລຶບລ້າງຄວາມທຸກຍາກ ເພື່ອສູ້ຊົນນຳພາປະເທດຊາດ ຫຼຸດພົ້ນອອກຈາກສະຖານະພາບປະເທດດ້ອຍພັດທະນາ, ບັນຫາປະກົດການຫຍໍ້ທໍ້ໃນສັງຄົມ ເປັນ ຕົ້ນ: ບັນຫາຢາເສບຕິດ, ອຸປະຕິເຫດຕາມທ້ອງຖະໜົນ ແລະການແກ້ໄຂບັນຫາການລະເມີດກົດຈະລາ ຈອນ; ມາດຕະການຄຸ້ມຄອງ ແລະການເກັບລາຍຮັບງົບປະມານ,ການສົ່ງເສີມການຜະລິດເປັນສິນຄ້າ, ການລົງທຶນຂອງລັດ ແລະການຊຸກຍູ້ທຸລະກິດຂະໜາດນ້ອຍ-ຂະໜາດກາງ, ກອງປະຊຸມໄດ້ຮັບຟັງການຊີ້ແຈງຂອງ 4 ກະຊວງ ຕໍ່ກັບສະພາບພົ້ນເດັ່ນ ທີ່ສະມາຊິກສະພາແຫ່ງຊາດຍົກຂຶ້ນໃນກອງປະຊຸມສະພາແຫ່ງຊາດ ຄື:

- ທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ຊີ້ແຈງກ່ຽວກັບການແກ້ໄຂບັນ ຫາໜີ້ 3 ແຈ ທີ່ພົວພັນກັບໂຄງການລົງທຶນຂອງລັດ.

- ທ່ານ ລັດຖະມົນຕີກະຊວງແຜນການ ແລະການລົງທຶນ ຊີ້ແຈງ 3 ບັນຫາ ຄື: ການຄິດໄລ່ລາຍGNI) ແລະການຄິດໄລ່ລວມຍອດຜະລິດຕະພັນພາຍໃນແຫ່ງຊາດ (GDP) ຂອງປະເທດເຮົາ, ກົນໄກການສ້າງແຜນໂຄງການລົງທຶນຂອງລັດ ແລະກົນໄກການປະສານງານ ໃນການຄຸ້ມຄອງໂຄງການລົງທຶນຂອງລັດ ຕາມຂະແໜງການ.

- ທ່ານ ລັດຖະມົນຕີກະຊວງຖະແຫຼງຂ່າວ-ວັດທະນະທໍາ ແລະທ່ອງທ່ຽວ ຊີ້ແຈງກ່ຽວກັບວິທີການ, ມາດຕະການແກ້ໄຂສິ່ງກີດຂວາງຕໍ່ວຽກງານທ່ອງທ່ຽວ ເພື່ອຮັບປະກັນການຈັດຕັ້ງຜັນຂະຫຍາຍປີທ່ອງທ່ຽວລາວ ປີ 2018.

- ທ່ານ ລັດຖະມົນຕີກະຊວງສຶກສາທິການ ແລະກີລາ ຊີ້ແຈງ 2 ບັນຫາ ຄື: ການປະຕິບັດນະໂຍ ບາຍຕໍ່ນັກຮຽນໂຮງຮຽນຊົນເຜົ່າ ແລະການຈັດແບ່ງໂກຕາລັດຖະກອນຄູ ປີ 2018.

   7. ພິຈາລະນາຮັບຮອງເອົາການສ້າງ ແລະປັບປຸງກົດໝາຍ ຈໍານວນ 13 ສະບັບ ຄື:

+ ກົດໝາຍສ້າງໃໝ່ ຈໍານວນ 5 ສະບັບ ຄື: ກົດໝາຍວ່າດ້ວຍການໃຫ້ວັກຊີນກັນພະຍາດ, ກົດໝາຍວ່າດ້ວຍການຈັດສັນພູມລໍາເນົາ ແລະອາຊີບ, ກົດໝາຍວ່າດ້ວຍປ້າຍ, ກົດໝາຍວ່າດ້ວຍການຄຸ້ມຄອງໜີ້ສິນສາທາລະນະ ແລະກົດໝາຍວ່າດ້ວຍສະຫະພັນນັກຮົບເກົ່າ.

 + ກົດໝາຍປັບປຸງ ຈໍານວນ 8 ສະບັບຄື: ກົດໝາຍວ່າດ້ວຍການ​ແກ້​ໄຂຂໍ້ຂັດແຍ່ງທາງດ້ານເສດຖະກິດ, ກົດໝາຍວ່າດ້ວຍອາກອນມູນຄ່າເພີ່ມ, ກົດໝາຍວ່າດ້ວຍທະນາຄານແຫ່ງ ສປປ ລາວ, ກົດໝາຍວ່າດ້ວຍປະກັນສັງຄົມ, ກົດໝາຍວ່າດ້ວຍທະບຽນຄອບຄົວ, ກົດໝາຍວ່າດ້ວຍການບິນພົນລະເຮືອນ, ກົດໝາຍວ່າດ້ວຍນາຍທະຫານກອງທັບປະຊາຊົນລາວ ແລະກົດໝາຍວ່າດ້ວຍແນວລາວສ້າງຊາດ.ການພິຈາລະນາຮັບຮອງເອົາການສ້າງ ແລະປັບປຸງກົດໝາຍ ດັ່ງກ່າວມາຂ້າງເທິງນັ້ນ ໄດ້ເຮັດໃຫ້ກົດໝາຍຂອງປະເທດເຮົາເປັນລະບົບຄົບຊຸດ, ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ມີບ່ອນອີງດ້ານນິຕິກຳ ທີ່ໜັກແໜ້ນ.

     ຄຽງຄູ່ກັບການພິຈາລະນາ ແລະຮັບຮອງເອົາບັນຫາສໍາຄັນ ດັ່ງທີ່ກ່າວມາຂ້າງເທິງນັ້ນ, ໃນໄລຍະການດໍາເນີນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດ​ທີ VIII ມີປະຊາຊົນສົ່ງ ຄໍາຄິດຄໍາເຫັນຜ່ານໂທລະສັບສາຍດ່ວນ ທັງໝົດ 1.599 ສາຍ ມາຍັງກອງປະຊຸມສະພາແຫ່ງຊາດ ຊຶ່ງພົວພັນເຖິງການຄຸ້ມຄອງບໍລິຫານລັດ, ການຄຸ້ມຄອງເສດຖະກິດ-ສັງຄົມ, ໃນນີ້ບັນຫາທີ່ພົ້ນເດັ່ນ ແມ່ນພົວພັນເຖິງການກໍ່ສ້າງເສັ້ນທາງຄົມມະນາຄົມ, ບັນຫາການປ່ອຍສິນເຊື່ອຂອງສະຖາບັນການເງິນເອກະຊົນ, ບັນຫາທີ່ດິນ, ບັນຫາຢາເສບຕິດ ແລະບັນຫາການສອບເສັງຄັດເລືອກລັດຖະກອນ ຕໍ່ກັບບັນຫາທີ່ສົ່ງມາທາງໂທລະສັບສາຍດ່ວນດັ່ງກ່າວ ສະພາແຫ່ງຊາດ ໄດ້ສັງລວມມອບໃຫ້ກໍາມາທິການທີ່ກ່ຽວຂ້ອງ ແລະອົງການປົກຄອງທ້ອງຖິ່ນ ເພື່ອສົມທົບພາກສ່ວນກ່ຽວຂ້ອງ ໃນການພິຈາລະນາແກ້ໄຂ ໃຫ້ຖືກຕ້ອງສອດຄ່ອງຕາມກົດໝາຍ ແລະລະບຽບການ.

ໃນນາມຄະນະປະຈໍາສະພາແຫ່ງຊາດ, ຂ້າພະເຈົ້າ ຂໍຂອບໃຈມາຍັງບັນດາທ່ານພະນັກງານ-ລັດຖະ ກອນ, ທະຫານ, ຕໍາຫຼວດ, ນັກຮຽນ, ນັກສຶກສາ, ປັນຍາຊົນ, ກໍາມະກອນ, ຊາວຜູ້ອອກແຮງງານ, ພໍ່ຄ້າຊາວຂາຍ, ພໍ່ແມ່ພີ່ນ້ອງປະຊາຊົນລາວບັນດາເຜົ່າໃນທົ່ວປະເທດ ແລະພີ່ນ້ອງຊາວລາວທີ່ອາໄສຢູ່ຕ່າງປະ ເທດ ທີ່ໄດ້ຕິດຕາມການດໍາເນີນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດ​ທີ VIII ຄັ້ງນີ້.

     ຂໍສະແດງຄວາມຂອບໃຈ ແລະຊົມເຊີຍຢ່າງຈິງໃຈມາຍັງໂທລະພາບແຫ່ງຊາດ ແລະວິທະຍຸກະຈາຍສຽງແຫ່ງຊາດ, ສື່ສິ່ງພິມທຸກປະເພດ ທັງພາກລັດ ແລະເອກະຊົນ ທີ່ໄດ້ຕິດຕາມຢ່າງໃກ້ ຊິດ ເພື່ອເກັບກໍາຂ່າວ ແລະເຜີຍແຜ່ຢ່າງທັນການ ກ່ຽວກັບການດໍາເນີນກອງປະຊຸມໃນຄັ້ງນີ້ ໃຫ້ແກ່ສັງຄົມໄດ້ຮັບຊາບຢ່າງທົ່ວເຖິງ