20/03/2019 00:00 -

(ສພຊ) ວັນຈັນທີ 11 ມີນາ ຜ່ານມາ, ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6) ນະຄອນຫລວງວຽງຈັນ, ກໍາມາທິການແຜນການ​ ການເງິນ ແລະ ການກວດສອບ (ກຜງສ) ໄດ້ຈັດກອງປະຊຸມຖອດຖອນບົດຮຽນການເຄື່ອນໄຫວວຽກງານປະຈໍາປີ 2018 ແລະ ທິດທາງປີ 2019 ໂດຍການເປັນປະທານຂອງທ່ານ ວິ​ໄລ​ວົງ ບຸດ​ດາ​ຄຳ ປະທານ​ ກຜງສ; ເຂົ້າຮ່ວມ ມີທ່ານ ທອງສະລິດ ມັງໜໍ່ເມກ ຫົວໜ້າສະຖາບັນການເມືອງການປົກຄອງແຫ່ງຊາດ, ບັນດາທ່ານ ຮອງປະທານກໍາມາທິການ, ຮອງລັດຖະມົນຕີກະຊວງແຜນການແຜນການ ແລະ ການລົງທຶນ, ກະ ຊວງການເງິນ ແລະ ອົງການກວດສອບແຫ່ງລັດ ພ້ອມດ້ວຍພາກສ່ວນທີ່ກ່ຽວຂ້ອງ.

​ກອງປະຊຸມໃນຄັ້ງນີ້, ໄດ້ພ້ອມກັນສະຫລຸບຕີ​ລາຄາ ​ແລະ​ ຖອດ​ຖອນ​ບົດຮຽນ​ໃນ​ການຈັດຕັ້ງ ປະຕິບັດ​ວຽກ​ງານການເຄື່ອນໄຫວປະຈຳປີ 2018 ທີ່​ຜ່ານ​ມາ ​ແລະ ປຶກສາ​ຫາລື​ກ່ຽວ​ກັບ​ທິດ​ທາງວຽກ​ງານ​ຈຸດ​ສຸມ​ໃນ​ປີ 2019 ຂອງ​ ກຜງສ ເພື່ອຄວາມເປັນເອກະພາບກັນໃນການຈັດຕັ້ງປະຕິບັດ ເຊິ່ງ ກຜງສ ​ຈະ​ໄດ້​ປະ​ເມີນ​ຜົນ​ການຈັດຕັ້ງປະຕິບັດ​ວຽກ​ງານ​ການ​ເປັນ​ເສນາ​ທິການ​ໃຫ້​ແກ່​ຄະນະ​ປະຈຳ​ສະພາ​ແ​ຫ່ງຊາດ, ການ​ປະສານ​ສົມທົບ ​ແລະ​ ການ​ປະຕິບັດ​ໜ້າ​ທີ່​ວິຊາ​ສະ​ເພາະຮ່ວມກັບ​ບັນດາ​ກຳມາ​ທິການ, ກົງຈັກທີ່ຄະນະປະຈຳສ້າງຕັ້ງ, ບັນດາກະຊວງ, ອົງການ ແລະ ພາກສ່ວນທີ່ກ່ຽວຂ້ອງ ທີ່ໄດ້ພ້ອມກັນປະຕິບັດໜ້າທີ່ຕາມພາລະບົດບາດ ​ເປັນຕົ້ນແມ່ນການ​ພົວພັນ​ປະສານ​ງານກັບ​ບັນດາກະຊວງ ​ແລະ ​ອົງການທີ່​ກ່ຽວຂ້ອງ​ຂອງ​ລັດຖະບານ.

ກອງປະຊຸມ, ໄດ້ຮັບຟັງການລາຍງານ ແລະ  ປະກອບຄຳຄິດຄຳເຫັນໃສ່ເນື້ອໃນສໍາຄັນ ຄື: ລາຍງານຫຍໍ້ກ່ຽວກັບການຜັນຂະຫຍາຍມະຕິຂອງກອງປະຊຸມສະໄໝສາມັນເທື່ືອທີ 6 ຂອງສະພາ ແຫ່ງຊາດຊຸດທີ VIII ແລະ ດໍາລັດວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດປະຈຳປີ 2019; ລາຍງານກ່ຽວກັບການປະເມີນຜົນການຈັດຕັ້ງປະຕິບັດບັນດາມະຕິກອງ ປະຊຸມສະພາແຫ່ງຊາດ ແລະ ມະຕິຂອງຄະນະປະຈຳສະພາແຫ່ງຊາດ ກ່ຽວກັບແຜນງົບປະມານແຫ່ງລັດ ໂດຍສະເພາະການຈັດຕັ້ງປະຕິບັດກົດໝາຍ ແລະ ນິຕິກຳໃຕ້ກົດໝາຍ ໃນຂົງເຂດການ ຈັດຕັ້ງປະຕິບັດການຈັດເກັບລາຍຮັບເຂົ້າງົບປະມານແຫ່ງລັດໃນປີທີ່ຜ່ານມາ ແລະ ໃນຕໍ່ໜ້າ; ລາຍງານ ການປະເມີນຜົນການຈັດຕັ້ງປະຕິບັດມະຕິຂອງກອງປະຊຸມສະພາແຫ່ງຊາດ ແລະ ມະຕິຂອງຄະນະປະຈຳ ສະພາແຫ່ງຊາດ ກ່ຽວກັບວຽກງານການກວດສອບແຫ່ງລັດໃນໄລຍະຜ່ານມາ, ການລາຍງານຮ່າງວິໄສ ທັດ ແລະ ຍຸດທະສາດການພັດທະນາວຽກງານກວດສອບແຫ່ງລັດ; ລາຍງານຫຍໍ້ກ່ຽວກັບການພິຈາ ລະນາຮັບຮອງເອົາກົດໝາຍໃນໄລຍະຜ່ານມາ ແລະ ການກະກຽມເນື້ອໃນຮ່າງກົດໝາຍ 3 ສະບັບ ທີ່ ຈະນຳເຂົ້າຜ່ານກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII. ນອກຈາກ​ນັ້ນ, ຜູ້ແທນກອງປະຊຸມຍັງໄດ້ພ້ອມກັນ​ປະກອບ​ຄໍາ​ຄິດ​ຄໍາເຫັນ​ໃສ່​ບັນ​ດາ​ເອກະສານ​ດັ່ງກ່າວ ເພື່ອ​ໃຫ້​ມີເນື້ອໃນ​ອຸດົມ​ສົມບູນ, ​ຄົບຖ້ວນ, ສາມາດ​ຈັດຕັ້ງປະ​ຕິ​ບັ​ດ​ໄດ້ ​ແລະ ເພື່ອນໍາ​ສະ​ເໜີ​ລາຍ​ງານ​ຕໍ່ກອງປະຊຸມຄະນະ​ປະ​ຈໍາ​ສະພາ​ແຫ່ງ​ຊາດ.  ຜູ້ແທນກອງປະຊຸມຍັງໄດ້ແລກປ່ຽນຄໍາຄິດຄິດຄໍາເຫັນ ຕໍ່ການປະສານງານໃນການເຄື່ອນໄຫວວຽກງານຮ່ວມກັນໃນໄລຍະ 1 ປີທີ່ຜ່ານມາ ວ່າມີຄວາມສະດວກ ແລະ ຫຍຸ້ງຍາກແນວໃດ ເພື່ອຊອກຫາວິທີການແກ້ໄຂໃນຕໍ່ໜ້າ; ຖ້າຫາກມີຄຳເຫັນໃຫ້ປັບປຸງອາດກ້າວໄປເຖິງການປັບປຸງບາງຈຸດ, ບາງມາດຕາ ແລະ ເຊັນບົດບັນທຶກການປະສານງານ ລະຫວ່າງ ກຜງສ ກັບບັນດາກະຊວງ ແລະ ອົງການກ່ຽວຂ້ອງ ເພື່ອເຮັດໃຫ້ການປະຕິບັດໜ້າທີ່ເປັນເສນາທິການໃຫ້ວ່ອງໄວ, ໂປ່ງໃສ ແລະ ເຂັ້ມແຂງ.

(ສົມນຶກ ແກ້ວໄຊຍະຈັກ)