10/07/2018 00:00 -

ໃນລະຫວ່າງວັນທີ 2-4 ກໍລະກົດ​ຜ່ານ​ມາ ທີ່ ຫ້ອງ​ປະ​ຊຸມ​ເຮືອນ​ພັກ​ແຄມ​ງື່ມ ທ່າ​ລາດ, ​ເມືອງ​ແກ້ວ​ອຸດົມ​, ແຂວງ​ວຽງ​ຈັນ ກໍາມາທິການກົດໝາຍ ​ແລະ ກໍາມາ​ທິການ​ເສດຖະກິດ, ​ເຕັກ​ໂນ​ໂລ​ຊີ ​ແລະ ສິ່ງ​ແວດ​ລ້ອມ ຮ່ວມ​ກັບ ກະຊວງ​ກະສິກໍາ ​ແລະ ປ່າ​ໄມ້ ໄດ້ຈັດກອງປະຊຸມຮຽບຮຽງຮ່າງ​ກົດໝາຍວ່າ​ດ້ວຍ ການຈັດ​ສັນພູ​ມລໍາ​ເນົາ ​ແລະ ອາຊີບ ທີ່​ໄດ້​ຜ່ານ​ການ​ຮັບຮອງ​ເອົາ​ ໃນ​ກອງ​ປະຊຸມ​ສະ​ໄໝ​ສາມັນ ​​ເທື່ອ​ທີ 5 ຂອງ​ສະພາ​ແຫ່ງ​ຊາດ ຊຸດ​ທີ VIII, ໂດຍການເປັນປະທານຮ່ວມຂອງ ທ່ານ ສາຍທອງ ​ແກ້ວ​ດວງ​ດີ ກໍາມະການ​ຄະນະ​ປະ​ຈໍາ​ສະພາ​ແຫ່ງ​ຊາດ, ປະທານ​ກຳມາ​ທິການ​ກົດໝາຍ, ທ່ານ ບຸນປອນ ສີ​ສຸລາ​ດ ກໍາມະການ​ຄະນະ​ປະ​ຈໍາ​ສະພາ​ແຫ່ງ​ຊາດ, ປະທານ​ກໍາມາ​ທິການ​ເສດຖະກິດ, ​ເຕັກ​ໂນ​ໂລ​ຊີ ແລະ ສິ່ງ​ແວດ​ລ້ອມ ​ແລະ ທ່ານ ຄໍາ​ບຸນນັດ ​ໄຊ​ຍະ​ນົນ ຮອງ​ລັດຖະມົນຕີ ກະຊວງ​ກະສິກໍາ ​ແລະ ປ່າ​ໄມ້; ໂດຍມີບັນດາທ່ານ​ຮອງປະທານກໍາມາທິການ, ພະນັກງານບໍານານອາວຸໂສ, ຜູ້​ຕາງໜ້າ​ຫ້ອງ​ວ່າການ​ປະທານ​ປະ​ເທດ, ຫ້ອງ​ວ່າການ​ສໍານັກງານ​ນາຍົກລັດຖະມົນຕີ, ກະຊວງ​ຍຸຕິ​ທໍາ, ບັນດາ​ຫົວໜ້າ-ຮອງ​ຫົວໜ້າກົມ, ລັດຖະກອນທີ່ກ່ຽວຂ້ອງ ຈາກ​ສະພາ​ແຫ່ງ​ຊາດ ​ແລະ ກະຊວງ​ກະສິກໍາ ​ແລະ ປ່າ​ໄມ້ ຈຳນວນໜຶ່ງເຂົ້າຮ່ວມ.

ກອງ​ປະຊຸມ​ໃນຄັ້ງນີ້ ແມ່ນໄດ້ນຳເອົາຄຳຄິດຄຳເຫັນຂອງບັນດາທ່ານສະມາຊິກສະພາແຫ່ງຊາດ ມາຄົ້ນຄວ້າ ຮຽບຮຽງເຂົ້າໃນເນື້ອໃນຂອງຮ່າງກົດໝາຍ ໃຫ້ມີຄວາມກະຈ່າງແຈ້ງ, ຮັດກຸມ ລວມທັງບັນຫາທີ່ກອງປະຊຸມ ມີຄວາມສົນໃຈ ເປັນຫ່ວງໃນແງ່ປະຕິບັດ, ຊຶ່ງຫລັງຈາກນັ້ນ ຈະລາຍງານຕໍ່ຄະນະປະຈຳສະພາແຫ່ງຊາດ ໃຫ້ທິດຊີ້ນຳ ຫຼື ຕົກລົງ ເປັນຕົ້ນແມ່ນ ມາດຕາທີ່​ຕິດ​ພັນ​ກັບ ການແບ່ງຂັ້ນ​ຄຸ້ມ​ຄອງ​, ການ​ພິຈາລະນາ ຕົກລົງ ແລະ ຮັບຮອງ ​ເອົາໂຄງການຈັດສັນພູລຳເນົາໃນແຕ່ລະຂັ້ນ ກ່ອນຈະສະເໜີໃຫ້ປະທານສະພາແຫ່ງຊາດ ລົງນາມໃນກົດໝາຍດັ່ງກ່າວ ແລ້ວສົ່ງໃຫ້ປະທານປະເທດພິຈາລະນາອອກດຳລັດປະກາດໃຊ້ ຕາມກົດໝາຍວ່າດ້ວຍການສ້າງນິຕິກຳ.

                                                                     (ກົມ​ໂຄ​ສະນາ ​ແລະ ຕີີ​ຄວາມ​ໝາຍ​ກົດໝາຍ)