27/03/2018 00:00 -

(ສພຊ) ວັນທີ 19 ມີນາຜ່ານມາ, ທີ່ຫ້ອງປະຊຸມສະພາແຫ່ງຊາດ (ຫລັກ 6) ນະຄອນຫລວງວຽງຈັນ ໜ່ວຍ ພັກຮາກຖານກໍາມາທິການແຜນການ, ການເງິນ ແລະ ການກວດສອບ (ກຜງສ) ສະພາແຫ່ງຊາດ ໄດ້ຈັດກອງປະຊຸມ ໃຫຍ່ຄັ້ງທີ I ຂອງຕົນ ໂດຍການເປັນປະທານຂອງສະຫາຍ ວິໄລວົງ ບຸດດາຄໍາ ກໍາມະການສູນກາງພັກ, ເລຂາໜ່ວຍ ພັກຮາກຖານ, ປະທານກໍາມາທິການ ກຜງສ; ເຂົ້າຮ່ວມມີສະຫາຍ ແສງນວນ ໄຊຍະລາດ ເລຂາທິການສູນກາງພັກ, ເລຂາຄະນະບໍລິຫານງານພັກສະພາແຫ່ງຊາດ, ຮອງປະທານສະພາແຫ່ງຊາດ; ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ; ມີບັນດາຮອງເລຂາໜ່ວຍພັກກໍາມາທິການ ແລະ ສະມາຊິກພາຍໃນ ໜ່ວຍ.

ກອງ​ປະ​ຊຸມ​ໄດ້​ພິ​ຈາ​ລະ​ນາ ແລະ ຮັບ​ຮອງ​ເອົາ​ບົດ​ລາຍ​ງານ​ການ​ເມືອງ ໂດຍ​ການ​ຕີ​ລາ​ຄາການ​ຈັດ​ຕັ້ງ​ປະ​ຕິ​ບັດ​ວຽກງານ ສົກ​ປີ 2016-2017 ແລະ ​ກໍາ​ນົດ​ທິດ​ທາງ​ແຜນ​ການ​ສົກ​ປີ 2018-2020 ເຊິ່ງ​ໄດ້​ກໍານົດ 7 ວຽກ​ຈຸດ​ສຸມ ເພື່ອ​ສືບ​ຕໍ່​ຊີ້​ນໍາ-ນໍາ​ພາການ​ເຄື່ອນ​ໄຫວ​ວຽກ​ງານ​ຂອງ​ ກຜງສ ​ໃຫ້ບັນ​ລຸ​ຕາມ​ຄາດ​ໝາຍ​ທີ່​ວາງ​ໄວ້.

          ກອງ​ປະ​ຊຸມ​ໄດ້​ຮັບ​ຟັງ​ການ​ຜ່ານ​ບົດ​ສໍາຫລວດ ຂອງ​ຄະ​ນະ​ໜ່ວຍ​ພັກ​ຮາກ​ຖານຕໍ່​ການ​ຊີ້​ນໍາ-ນໍາພາວຽກ​ງານ​ໃນ​ໄລ​ຍະ​ຜ່ານ​ມາ, ຄະ​ນະ​ໜ່ວຍ​ພັກ​ໄດ້​ມີ​ຄວາມ​ຮັບ​ຜິດ​ຊອບ​ສູງ ໃນ​ການ​ຊີ້​ນໍາ-ນໍາ​ພາຕໍ່​ການ​ເຄື່ອນ​ໄຫວ​ວຽກ​ງານ​ຕ່າງໆຕາມ​ພາ​ລະ​ບົດ​ບາດ ທີ່​ໄດ້​ກໍາ​ນົດ​ໄວ້​ໃນ​ກົດ​ລະ​ບຽບ​ຂອງ​ພັກ. ແຕ່​ຍັງ​ມີ​ບາງ​ດ້ານ​ຄວນ​ເອົາ​ໃຈ​ໃສ່ ເປັນ​ຕົ້ນການ​ກໍານົດ​ແຜນ​ການ​ຊີ້​ນໍາ-ນໍາພາ ໃນ​ແຕ່​ລະ​ໄລ​ຍະ​ບໍ່​ທັນ​ລະ​ອຽດ, ລະ​ບອບ​ປະ​ຊຸມ​ສ່ອງ​ແສງ ຍັງ​ບໍ່​ທັນ​ໄດ້​ເປັນ​ປົກ​ກະ​ຕິ ແລະ ກົນ​ໄກ​ປະ​ສານ​ງານ ກັບ​ບັນ​ດາ​ໜ່ວຍ​ພັກ​ອ້ອມ​ຂ້າງ​ຄະ​ນະ​ພັກສະ​ພາ​ແຫ່ງ​ຊາດ ຍັງ​ບໍ່​ທັນ​ຄ່ອງ​ຕົວ​ເທົ່າ​ທີ່​ຄວນ.

          ກອງ​ປະ​ຊຸມ​ໄດ້​ເລືອກ​ຕັ້ງ​ເອົາ​ຄະ​ນະ​ໜ່ວຍ​ພັກ​ຮາກ​ຖານຂອງ​ກໍາມາ​ທິ​ການ​ແຜນ​ການ, ການ​ເງິນ ແລະ ການ ກວດ​ສອບຊຸດ​ໃໝ່ ເຊິ່ງມີສະມາຊິກພັກເຂົ້າຮ່ວມ 13 ສະຫາຍ, ມີຜູ້ສະໝັກຮັບເລືອກຕັ້ງ 5 ສະຫາຍ; ກອງປະຊຸມຄັ້ງ ປະຖົມມະລືກຂອງຄະນະໜ່ວຍພັກຮາກຖານ ກຜງສ ໄດ້ເປັນເອກະສັນ ເລືອກເອົາຄະນະບໍລິຫານງານໜ່ວຍພັກ ຮາກຖານຊຸດໃໝ່ ຈໍານວນ 3 ສະຫາຍຄື: ສະຫາຍ ວິໄລວົງ ບຸດດາຄໍາ ເປັນເລຂາໜ່ວຍພັກ, ສະຫາຍ ທັນຕາ ກອງ ຜາລີ ເປັນຮອງເລຂາໜ່ວຍພັກ ແລະ ສະຫາຍ ເກດແກ້ວ ສີຫາລາດ ເປັນຄະນະໜ່ວຍພັກ ທັງເປັນປະທານກວດກາ ໜ່ວຍພັກຮາກຖານ; ເພື່ອ​ສືບ​ຕໍ່​ຊີ້​ນໍາ-ນໍາ​ພາການ​ຈັດ​ຕັ້ງ​ປະ​ຕິ​ບັດ​ມະ​ຕິກອງ​ປະ​ຊຸມ​ໃຫ​ຍ່​ຄັ້ງ​ທີ III ຂອງ​ຄະ​ນະ​ພັກ​ສະ​ພາ​ແຫ່ງ​ຊາດເວົ້າ​ລວມ, ເວົ້າ​ສະ​ເພາະມະ​ຕິ​ກອງ​ປະ​ຊຸມ​ໃຫ​ຍ່ຄັ້ງ​ທີ I ຂອງ​ໜ່ວຍ​ພັກ​ຮາກ​ຖານ​ກໍາ​ມາ​ທິ​ການ​ແຜນ​ການ, ການ​ເງິນ ແລະ ການກວດ​ສອບ ເພື່ອ​ເຮັດ​ໃຫ້​ການ​ຈັດ​ຕັ້ງ​ປະ​ຕິ​ບັດ​ມະ​ຕິ​ດັ່ງ​ກ່າວມີ​ປະ​ສິດ​ທິ​ຜົນ.

          ​ສະຫາຍເລຂາຄະນະບໍລິຫານງານພັກສະພາແຫ່ງຊາດ ໄດ້ມີຄໍາເຫັນໂອລົ້ມຕໍ່ກອງປະຊຸມ ເຊິ່ງ​ສະ​ຫາຍ​ໄດ້​ເນັ້ນ​ໃຫ້​ຄະ​ນະ​ໜ່ວຍ​ພັກ​ຮາກ​ຖານ ແລະ ບັນ​ດາ​ສະ​ຫາຍ​ສະ​ມາ​ຊິກ​ພັກ​ພາຍ​ໃນ​ໜ່ວຍ​ຂອງ​ກໍາ​ມາ​ທິ​ການ ຍົກ​ສູງ​ຄວາມ​ຮັບ​ຜີດ​ຊອບ​ໜ້າ​ທີ່​ການ​ເມືອງ​ໃຫ້​ສູງ​ຂຶ້ນ ໂດຍ​ການ​ເອົາ​ໃຈ​ໃສ່​ສຶກສາ​ອົບ​ຮົມ​ການ​ເມືອງ-​ແນວ​ຄິດ​ຢ່າ​ງ​ມີ​ຈຸດ​ສຸມ ເພື່ອເຜີຍແຜ່ແນວທາງນະໂຍບາຍຂອງພັກ, ກົດໝາຍຂອງລັດ, ນໍາພາສ້າງສະມາຊິກພັກໃຫ້ມີຄຸນທາດການເມືອງໜັກ ແໜ້ນ, ສ້າງໜ່ວຍພັກ, ສະມາຊິກພັກ ໃຫ້ເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນໃນການປະຕິບັດໜ້າ ທີ່ທີ່ໄດ້ຮັບມອບໝາຍ ໃຫ້ຖືກຕ້ອງສໍາເລັດທັນເວລາ ແລະ ຊຸກຍູ້ການຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາ; ສືບຕໍ່ຊີ້ນໍາ-ນໍາພາພະນັກງານພາຍໃນກໍາມາທິການໃຫ້ປະຕິບັດໜ້າທີ່ໃນການເປັນເສນາທິການໃຫ້ແກ່ກໍາມາທິການ ຮັບໃຊ້ໜ້າທີ່ການເມືອງຕາມພາລະບົດບາດຂອງສະພາແຫ່ງຊາດ ໃນຂອບເຂດທີ່ຕົນຮັບຜິດຊອບ; ຮັບ​ປະ​ກັນ​ໃຫ້​ການ​ຜັນ​ຂະ​ຫ​ຍາຍ ແລະ ຈັດ​ຕັ້ງ​ປະ​ຕິ​ບັດ​ມະ​ຕິ​ຂອງ​ພັກ ກໍ​ຄື​ວຽກ​ງານ​ວິ​ຊາ​ສະ​ເພາະ​ຂອງ​ກໍາ​ມາ​ທິ​ການ ແລະ ສະ​ພາ​ແຫ່ງ​ຊາດ ໃຫ້​ມີ​ປະ​ສິດ​ທິ​ຜົນ ແລະ ບັນ​ລຸ​ຄາດ​ໝາຍ​ທີ່​ວາງ​ໄວ້.

(ສົນນຶກ ແກ້ວໄຊຍະຈັກ)