ສພຊ ຮັບເຄື່ອງຊ່ວຍເຫລືອປ້ອງກັນໂຄວິດ-19

19/07/2021 00:00 -

        (ສພຊ) ວັນທີ 2 ກໍລະກົດ 2021 ທີ່ສະພາແຫ່ງຊາດ ໄດ້ມີພິທີມອບ-ຮັບເຄື່ອງຊ່ວຍເຫລືອປ້ອງກັນໂຄວິດ-19 ຈາກບໍລິສັດວີພີເອັນພີ ທີ່ປຶກສາການຄ້າ ຈໍາກັດຜູ້ດຽວ ຕາງໜ້າຮ້ານລາວຊອງເກໂບເຊັນ 1239, ກາເຟອາຫານຕາເວັນຕົກ ຈໍາກັດຜູ້ດຽວ ລວມມູນຄ່າ 175.200.000ກີບ ເພື່ອນໍາໃຊ້ເຂົ້າໃນການຕ້ານ ແລະ ສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ຢູ່ສປປລາວ.

          ໃນພິທີຄັ້ງນີ້, ຕາງໜ້າຄະນະປະຈໍາສະພາແຫ່ງຊາດ ກ່າວຮັບໂດຍທ່ານ ນາງ ທຸມມາລີ ວົງພະຈັນ ປະທານກໍາມາທິການວັດທະນະທໍາ-ສັງຄົມ ແລະ ຕາງໜ້າບັນດາບໍລິສັດມອບໂດຍທ່ານ ນາງ ນໍ້າທິບ ຜາມະນີວົງ ຜູ້ອໍານວຍການ ບໍລິສັດວີພີເອັນພີ ທີ່ປຶກສາການຄ້າ ຈໍາກັດຜູ້ດຽວ ມີບັນດາຄະນະນໍາທັງສອງຝ່າຍເຂົ້າຮ່ວມເປັນສັກຂີພະຍານ.

ເຄື່ອງທີ່ນໍາມາຊ່ວຍເຫລືອໃນຄັ້ງນີ້, ປະກອບມີຜ້າອັດປາກ-ອັດດັງ ຈໍານວນ 165.000 ອັນ ແລະ ເຄື່ອງວັດແທກອຸນຫະພູມ 270 ເຄື່ອງ.

                                                  ແຫຼ່ງຂ່າວທີ່ມາ: ສະພາແຫ່ງຊາດ