ປະທານ ກວທສ ສະພາແຫ່ງຊາດ ພົບປະເຮັດວຽກກັບຜູ້ຕາງໜ້າ UNPFA

22/06/2021 00:00 -

         (ສ​ພ​ຊ) ຕອນ​ເຊົ້າ​ວັນ​ທີ 22 ມິ​ຖຸ​ນານີ້, ທ່ານ ນາງ ທຸ​ມ​ມາ​ລີ ວົງ​ພະ​ຈັນ ປະ​ທານ​ກຳ​ມາ​ທິ​ການ​ວັດ​ທະ​ນະ​ທຳ-ສັງ​ຄົ​ມ (ກວ​ທ​ສ) ສະ​ພາ​ແຫ່ງ​ຊາດ ໄດ້​ພົບ​ປະ​ເຮັດ​ວຽກ​ຮ່ວມ​ກັບ​ທ່ານ ນາງ ມາຣຽມ ເອ ຄານ ຜູ້​ຕາງ​ໜ້າຂອງ​ອົງ​ການ​ສະ​ຫະ​ປະ​ຊາ​ຊົນ​ກອງ​ທຶນ​ປະ​ຊາ​ກອນ (UNPFA) ໂດຍ​ມີ​ຄະ​ນະ ແລະ​ ຜູ້​ກ່ຽວ​ຂ້ອງ​ຂອງ​ທັງ​ສອງ​ຝ່າຍ​ເຂົ້າ​ຮ່ວມ.

          ໂອ​ກາດ​ດັ່ງ​ກ່າວ, ທ່ານ ນາງ ທຸ​ມ​ມາ​ລີ ວົງ​ພະ​ຈັນ ໄດ້ສະ​ແດງ​ຄວາມ​ຍິນ​ດີ​ຕ້ອນ​ຮັບ​ຕໍ່​ການ​ມ​າ​ພົບ​ປະ​ເຮັດ​ວຽກ​ຂອງ​ຄະ​ນະ​ໃນ​ຄັ້ງ​ນີ້ ທັງຕີລາຄາສູງ ແລະ ສະແດງຂອບໃຈຕໍ່ UNPFA ທີ່ໄດ້ປະກອບສ່ວນຢ່າງຕັ້ງໜ້າໃນການຊ່ວຍເຫຼືອ ສປປລາວ ໃນໄລຍະຜ່ານມາ ແລະ ໄດ້​ແຈ້ງ​ໃຫ​້​ຊາບ​ໂດຍ​ຫຍໍ້​ ກ່ຽວ​ກັບ​ກົງ​ຈັກ​ຂອງ​ສະ​ເພາະ​ແຫ່ງ​ຊາດ ຊຸດ​ທີ IX, ການ​ເລືອກ​ຕັ້ງສະ​ມາ​ຊິກ​ສະ​ພາ​ແຫ່ງ​ຊາດ (ສ​ສ​ຊ) ຊຸດ​ທີ IX ແລະ ສະ​ພາ​ປະ​ຊາ​ຊົນ​ຂັ້ນ​ແຂວງ (ສ​ສ​ຂ) ຊຸດ​ທີ II ທີ່​ຫາ​ກໍ​ສຳ​ເລັດ​ລົງ, ແຈ​້ງ​ໃຫ້​ຮູ້ກ່ຽວ​ກັບ​ແຜນ​ການ​ເຄື່ອນ​ໄຫວ​ 5 ປີ ຂອງ​ສະ​ພາ​ແຫ່ງ​ຊາດ​ນັບ​ແຕ່​ປັດ​ຈຸ​ບັນ​ຮອດ 2025 ​ເປັນ​ຕົ້ນ​ແມ່ນສູ້ຊົນ ສ້າງ ແລະ ປັບປຸງກົດໝາຍໃຫ້ໄດ້ທັງໝົດ 96 ສະບັບ (ສ້າງໃໝ່ 38 ສະບັບ, ປັບປຸງ 58 ສະບັບ), ໃນນີ້ ຂົງເຂດວັດທະນະທຳ-ສັງຄົມມີ 27 ສະບັບ (ສ້າງໃໝ່ 11 ສະບັບ ແລະ ປັບປຸງ 17 ສະບັບ); ຮັບປະກັນການຕົກລົງບັນຫາສຳຄັນພື້ນຖານຂອງຊາດ, ຍົກສູງຄຸນນະພາບການຕິດຕາມກວດກາຂອງສະພາແຫ່ງຊາດ, ຄະນະປະຈຳສະພາແຫ່ງຊາດ, ບັນດາກຳມາທິການ ແລະ ສ​ສ​ຊ ສ້າງຄວາມເຂັ້ມແຂງທາງດ້ານການຈັດຕັ້ງ ແລະ ບຸກຄະລາກອນ, ເພີ່ມທະວີການພົວພັນຮ່ວມມືກັບລັດຖະສະພາໃນພາກພື້ນ ແລະ ໃນໂລກ. ພ້ອມນີ້, ຍັງ​ໄດ້​ແຈ​້ງແຜນ​ການ​ເຄື່ອນ​ໄຫວຂອງກຳມາທິການວັດທະນະທຳ-ສັງຄົມ 5 ປີ (2021-2025) ເຊິ່ງມີ 5 ແຜນງານ, 28 ໂຄງການ, ການຕິດຕາມກວດກາ ແລະ ຊຸກຍູ້ການຈັດຕັ້ງປະຕບັດບັນດາຄາດໝາຍຂອງ 4 ຂະແໜງການໃນຂົງເຂດວັດ ທະນະທຳ-ສັງຄົມ ໃນ 5 ປີ (2021-2025) ໃນແຜນພັດທະນະເສດຖະກິດ-ສັງຄົມແຫ່ງຊາດ ແລະ ສ​ະ​ພາບ​ການ​ອື່​ນໆ​ຈຳ​ນວນ​ໜຶ່ງ.

         ໂອ​ກາດ​ດຽວ​ກັນນີ້, ທ່ານ ນາງ ມາຣຽມ ເອ ຄານ ກໍ​ໄດ້​ລາຍ​ງານ​ຫຍໍ​້​ກ່ຽວ​ກັບ​ການ​ເຮັດ​ວຽກ, ຈຸດ​ປະ​ສົງ ແລະ ເປົ້າ​ໝາຍ​ຕ່າງໆ​ຂອງ UNPFA ເຊິ່ງ​ໄດ​້​ເລັ່ງ​ໃສ່​​ການ​ພັດ​ທະ​ນາ​ຊັບ​ພະ​ຍາ​ກອນ​ມ​ະ​ນຸດ ເປັນ​ຕົ້ນ​ແມ່ນຊາວ​ໜຸ່ມ​ ໃນ​ການສ້າງ​ພັດ​ທະ​ນາ​ແຮງ​ງານ​ທີ່​ມີ​ຄຸນ​ນະ​ພາບ, ​ມີສຸ​ຂະ​ພາບ​ຈິດ​ໃຈ ແລະ ສຸ​ຂະ​ພາບ​ກາຍ​ທີ່​ແຂງ​ແຮງ​ດີ. ຈາກນັ້ນ, ທັງ​ສອງ​ຝ່າຍກໍ​ໄດ້​ປຶກ​ສາ​ຫາ​ລື​ກັນຢ່າງ​ກົງ​ໄປ​ກົງ​ມາ ​ກ່ຽວ​ກັບ​ແຜນ​ການ​​ຮ່ວມ​ມື​ໃນ​​ຕໍ່​ໜ້າ ໂດຍ​ສະ​ເພາະ​ແມ່ນ​ໃນ​ຂະ​ແໜງ​ສ​ຶກ​ສາ, ສາ​ທາ​ລະ​ນະ​ສຸກ, ແຮງ​ງານ​ສະ​ຫວັດ​ການ-ສັງ​ຄົມ ເຊັ່ນ: ຫຼຸ​ດ​ອັດ​ຕາ​ການ​ປະ​ລະ​ຮຽນ​ຂອງ​ເດັກ, ການ​ໃຊ້​ແຮງ​ງານ​ເດັກ, ການ​ຖື​ພາ​ກ່ອນ​ໄວ, ສຸ​ຂະ​ພາບ​ຈະ​ເລ​ີນ​ພັນ, ຄວາມ​ສະ​ເໝີ​ພາ​ບ-ຍິງ​ຊາຍ ແລະ ອື່ນໆ.

                                                                    ແຫຼ່ງຂ່າວທີ່ມາ: ສະພາແຫ່ງຊາດ