ປະທານ ກຕທ ຕ້ອນຮັບການເຂົ້າຢ້ຽມຂ່ຳນັບແຂກຕ່າງປະເທດ

22/06/2021 00:00 -

          (ສພຊ) ວັນທີ 18 ມິຖຸນາ 2021 ທີ່ຫ້ອງຮັບແຂກສະພາແຫ່ງຊາດ, ທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ ໄດ້ຕ້ອນຮັບການເຂົ້າຢ້ຽມຂ່ຳນັບທ່ານ ນາງ ອີນາ ມາຈູລໍນິແຕ (Ina MARCIULIONYTE) ເອກອັກຄະລັດຖະທູດ ແຫ່ງສະຫະພາບເອີລົບ ປະຈຳ ສປປລາວ.

          ທ່ານ ນາງ Ina MARCIULIONYTE ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສະແດງຄວາມຍິນດີໃນໂອກາດທ່ານ ສັນຍາ ປຣະເສີດ ເຂົ້າຮັບໜ້າເປັນປະທານ ກຕທ ຄົນໃໝ່; ພ້ອມທັງ, ລາຍງານການປະຕິບັດໜ້າທີ່ວຽກງານຂອງຕົນໃນໄລຍະຜ່ານມາ ແລະ  ຈະສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສປປລາວ ແລະ ສະຫະພາບເອີຣົບ ກໍຄືການປະຕິບັດໜ້າທີ່ຂອງຕົນໃນຖານະເປັນເອກອັກຄະລັດຖະທູດ ແຫ່ງສະຫະພາບເອີຣົບ ປະຈຳ ສປປລາວ ໃຫ້ໄດ້ຮັບໝາກຜົນຍິ່ງຂຶ້ນເລື້ອຍໆ.

          ທ່ານປະທານ ກຕທ ໄດ້ສະແດງຄວາມຂອບໃຈ ແລະ ຕີລາຄາສູງຕໍ່ການປະຕິບັດຫນ້າທີ່ການທູດຢູ່ ສປປລາວ ໃນນາມເປັນຕົວແທນຂອງສະຫະພາບເອີຣົບ ທີ່ໄດ້ປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີລະຫວ່າງ ສປປລາວ ແລະ ສະຫະພາບເອີຣົບ ກໍຄື ລະຫວ່າງ ສອງອົງການນິຕິບັນຍັດ ໃຫ້ໄດ້ຮັບການພັດທະນາຍິ່ງໆຂຶ້ນ ເຊິ່ງໃນໄລຍະຜ່ານມາ ສະຫະພາບເອີຣົບ ໄດ້ໃຫ້ການສະໜັບສະໜູນ ແລະ ໃຫ້ການຊ່ວຍເຫລືອຫລາຍໂຄງການໃນການພັດທະນາເສດຖະກິດ-ສັງຄົມ ຢູ່ ສປປລາວ ເປັນຕົ້ນດ້ານການສຶກສາ, ສາທາລະນະສຸກ, ຍຸຕິທຳ, ການຄ້າ, ການລົງທຶນ, ກະສິກຳ ແລະ ຂະແໜງການອື່ນໆ; ພ້ອມນັ້ນ, ທ່ານຍັງແຈ້ງໃຫ້ຊາບກ່ຽວກັບການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II, ການສ້າງຕັ້ງຄະນະມິດຕະພາບລັດຖະສະພາລາວ-ສະຫະພາບເອີລົບ ຕື່ມອີກ.

          ໃນວັນດຽວກັນ, ປະທານ ກຕທ ຍັງໄດ້ຕ້ອນຮັບການເຂົ້າຢ້ຽມຂ່ຳນັບຂອງສະຫາຍ Pablo Antonio Rodriguez Vidal ເອກອັກຄະລັດຖະທູດ  ແຫ່ງສາທາລະນະລັດ ກູບາ ປະຈຳ ສປປລາວ ເຊິ່ງທ່ານ Pablo Antonio Rodriguez Vidal ໄດ້ສະແດງຄວາມຊົມເຊີຍຕໍ່ທ່ານ ສັນຍາ ປຣະເສີດ ທີ່ໄດ້ຮັບແຕ່ງຕັ້ງເປັນປະທານ ກຕທ ຄົນໃໝ່ ແລະ ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ເຖິງວ່າຈະຢູ່ໃນຊ່ວງໄລຍະການຄວມຄຸມການແຜ່ລະບາດຂອງພະຍາດໂຄວິດ-19 ກໍຕາມ; ພ້ອມນັ້ນ, ທ່ານເອກອັກຄະລັດທູດ ຍັງໄດ້ລາຍງານການພົວພັນຮ່ວມມື ລະຫວ່າງ ສປປລາວ ແລະ ສ.ກູບາ ເຊິ່ງຜົນສຳເລັດການຮ່ວມມືຫລາຍດ້ານ  ເປັນຕົ້ນ: ການຮ່ວມມືທາງດ້ານ ການສຶກສາ, ສາທາລະນະສຸກ, ດ້ານການສຶກສາ, ການດ້ານກິລາ ແລະ ການແລກປ່ຽນຄະນະຜູ້ແທນຂັ້ນສູງລະຫວ່າງສອງປະເທດ ໂດຍສະເພາະການໄປຢ້ຽມຢາມປະເທດກູບາຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ຊຸດທີ VIII ພ້ອມທັງໄດ້ເຊື້ອເຊີນປະທານສະພາອຳນາດປະຊາຊົນແຫ່ງກູບາມາຢ້ຽມຢາມ ສປປລາວ; ພ້ອມນັ້ນ, ທ່ານຍັງໄດ້ສະເໜີໃຫ້ສະພາແຫ່ງຊາດລາວ ຊ່ວຍຊຸກຍູ້ລັດຖະບານ ນຳສົ່ງເຂົ້າສານໄປຂາຍຢູ່ ສ.ກູບາ.

ທ່ານ ສັນຍາ ປຣະເສີດ ກໍໄດ້ສະແດງຄວາມຍິນດີຕ້ອນຮັບທ່ານເອກອັກຄະລັດຖະທູດ ແລະ ສະແດງຄວາມຊົມເຊີຍທີ່ໄດ້ປະຕິບັດໜ້າທີ່ຢູ່ ສປປລາວ ແລະ ສາມາດຍາດໄດ້ຜົນສຳເລັດຫລາຍດ້ານ ເຊິ່ງເປັນການປະກອບສ່ວນເສີມສ້າງສາຍພົວພັນທີ່ເປັນມູນເຊື້ອອັນດີງາມລະຫວ່າງສອງພັກ, ລັດ ແລະ ປະຊາຊົນສອງຊາດມາແຕ່ດົນນານ; ທັງເຫັນດີໃຫ້ມີການສືບຕໍ່ການແລກປ່ຽນການຢ້ຽມຢາມຄະນະຜູ້ແທນຂັ້ນຕ່າງໆ ຂອງສອງອົງການນິຕິບັນຍັດເປັນປົກກະຕິ ແລະ ການຮ່ວມມືໃນຂະແໜງການຕ່າງໆທີ່ສອງຝ່າຍໄດ້ມີການຕົກລົງຮ່ວມກັນ ໃຫ້ມີປະສິດທິຜົນຫລາຍຂຶ້ນກວ່າເກົ່າ ເປັນ ຕົ້ນດ້ານການສຶກສາ, ສາທາລະນະສຸກ, ກິລາ ແລະ ຂະຫຍາຍການຮ່ວມມືໃນຂົງເຂດອື່ນໆ ເພື່ອເສີມຂະຫຍາຍສາຍພົວພັນ ແລະ ການຮ່ວມມືທີ່ເປັນມູນເຊື້ອດີງາມມາແຕ່ດົນນານ ໃຫ້ແຕກດອກອອກຜົນຍິ່ງໆຂຶ້ນເພື່ອຜົນປະໂຫຍດຂອງປະຊາຊົນທັງສອງຊາດ. 

                                                                    ແຫຼ່ງຂ່າວທີ່ມາ: ສະພາແຫ່ງຊາດ