ຄະນະຜູ້ແທນສະພາແຫ່ງຊາດ ສຳເລັດການເຂົ້າຮ່ວມກອງປະຊຸມຄະນະປະສານງານສະມັດຊາລັດຖະສະພາລະຫວ່າງຊາດອາຊຽນ ຫລື AIPA Caucus ຄັ້ງທີ 12

17/06/2021 00:00 -

            (ສພຊ) ໃນວັນທີ 16 ມິຖຸນາ 2020, ຄະນະຜູ້ແທນສະພາແຫ່ງຊາດລາວ ນໍາໂດຍທ່ານ ສັນຍາ ປຣະເສີດປະທານກຳມາທິການການຕ່າງປະເທດ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມຄະນະປະສານງານສະມັດຊາລັດຖະສະພາລະຫວ່າງຊາດອາຊຽນ ຫລື AIPA Caucus ຄັ້ງທີ 12 ແບບທາງໄກ ພາຍໃຕ້ຫົວຂໍ້ “ສ້າງຄວາມເຂັ້ມແຂງໃຫ້ແກ່ຕ່ອງໂສ້ການຕອບສະ     ໜອງທີ່ໜຽວແໜ້ນ ແລະ ເສີມຂະຫຍາຍການເຊື່ອມຈອດທາງດ້ານການຄ້າ (Strengthening Supply Chain Resilience and Enhancing Trade Connectivity)” ໂດຍການເປັນເຈົ້າພາບຂອງລັດຖະສະພາສິງກະໂປ ແລະ ພາຍໃຕ້ການເປັນປະທານກອງປະຊຸມຂອງທ່ານ ລິມ ບ່ຽວ ຊວນ (Lim Biow Chuan) ສະມາຊິກສະພາແຫ່ງຊາດສິງກະໂປ ພ້ອມດ້ວຍສະມາຊິກລັດຖະສະພາຈາກບັນດາປະເທດສະມາຊິກອາຊຽນ, ເລຂາທິການໃຫຍ່ໄອປາ ແລະ ຜູ້ຕາງໜ້າເລຂາທິການໃຫຍ່ອາຊຽນ ເຂົ້າຮ່ວມໃນກອງປະຊຸມຄັ້ງນີ້.

            ກອງປະຊຸມຄັ້ງນີ້, ຄະນະຜູ້ແທນສະພາແຫ່ງຊາດລາວ ໄດ້ສະເໜີບົດພາຍໃຕ້ຫົວຂໍ້ “ສ້າງຄວາມເຂັ້ມແຂງໃຫ້ແກ່ຕ່ອງໂສ້ການຕອບສະໜອງທີ່ໜຽວແໜ້ນ ແລະ ເສີມຂະຫຍາຍການເຊື່ອມຈອດທາງດ້ານການຄ້າ” ໂດຍໄດ້ຍົກໃຫ້ເຫັນສະພາບການແຜ່ລະບາດ ຂອງພະຍາດໂຄວິດ-19 ເຊິ່ງຜົນກະທົບຕໍ່ການພັດທະນາເສດຖະກິດ-ສັງຄົມ ແລະ ຊີວິດການເປັນຢູ່ຂອງປະຊາຊົນລາວ ພ້ອມທັງໄດ້ແລກປ່ຽນບາງມາດຕະການ ແລະ ນະໂຍບາຍທາງດ້ານເສດ ຖະກິດ-ສັງຄົມ ຂອງ ສປປລາວ ເພື່ອຫລຸດຜ່ອນຜົນກະທົບ ແລະ ຟື້ນຟູເສດຖະກິດຈາກວິກິດການຂອງການແຜ່ລະບາດຂອງພະຍາດດັ່ງກ່າວ ເປັນຕົ້ນແມ່ນມາດຕະການກະຕຸ້ນເສດຖະກິດມະຫາພາກ ແລະ ສ້າງສະພາບແວດລ້ອມທຸລະກິດເພື່ອໃຫ້ສາມາດເຊື່ອມໂຍງເຂົ້າກັບລະບົບເສດຖະກິດໃນພາກພື້ນ ແລະ ສາກົນ; ພ້ອມນັ້ນ, ໄດ້ນຳສະເໜີບົດລາຍງານກ່ຽວກັບຄວາມຄືບໜ້າຂອງສະພາແຫ່ງຊາດລາວ ຕໍ່ການຈັດຕັ້ງປະຕິບັດບັນດາມະຕິຂອງກອງປະຊຸມສະມັດ ຊາໄອປາ ຄັ້ງທີ 41 ທີ່ໄດ້ຮັບຮອງເອົາ ຢູ່ທີ່ຮ່າໂນຍ ສສ.ຫວຽດນາມ ໃນວັນທີ 20 ກັນຍາ 2020 ໂດຍສະເພາະແມ່ນການຈັດຕັ້ງປະຕິບັດມະຕິວ່າດ້ວຍການສົ່ງເສີມການພັດທະນາເສດຖະກິດແບບກວມລວມໃນອາຊຽນ ໂດຍການສົ່ງ ເສີມເສດຖະກິດຂະໜາດນ້ອຍ, ຂະໜາດກາງ ແລະ ການເຂົ້າເຖິງແຫ່ລງທຶນຂອງຜູ້ປະກອບການ ເພື່ອໃຫ້ສາມາດເຊື່ອມໂຍງເຂົ້າກັບພາກພື້ນ ແລະ ສາກົນ; ມະຕິວ່າດ້ວຍການເສີມຂະຫຍາຍບົດບາດຂອງໄອປາ ໃນການສະໜັບສະ ໜູນປະຊາຄົມວັດທະນະທຳ-ສັງຄົມ ອາຊຽນ ເພື່ອຮັບມືກັບການແຜ່ລະບາດຂອງພະຍາດໂຄວິດ-19 ແລະ ມະຕິວ່າດ້ວຍບົດບາດຂອງສະມາຊິກລັດຖະສະພາເພດຍິງ ໃນການຮັບປະກັນໃຫ້ແກ່ການສ້າງວຽກເຮັດງານທຳ ແລະ ລາຍຮັບຂອງແຮງງານເພດຍິງ ເຊິ່ງທັງໝົດນັ້ນໄດ້ກຳນົດຢູ່ໃນແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ 9 ທີ່ໄດ້ຮັບຮອງເອົາໃນກອງປະຊຸມຄັ້ງປະຖົມມະລືກ ຂອງສະພາແຫ່ງຊາດຊຸດທີ IX ທີ່ຜ່ານມາ.

                                                                      ແຫຼ່ງຂ່າວທີ່ມາ: ສະພາແຫ່ງຊາດ