ມອບ-ຮັບໜ້າທີ່ ປະທານ ກປຊສ

11/05/2021 00:00 -

         (ສພຊ) ວັນທີ 6 ເມສາ 2021 ທີ່ສະພາແຫ່ງຊາດ (ທາດຫລວງ) ໄດ້ມີພິທີມອບ-ຮັບໜ້າທີ່ ລະຫວ່າງທ່ານ ພົຈວ. ຄຳສຸກ ວີອິນທະວົງ ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ (ກປຊສ) ສະພາແຫ່ງຊາດ ຊຸດທີ VIII ຜູ້ເກົ່າ ແລະ ທ່ານ ພົຈວ. ວົງສັກ ພັນທະວົງ ປະທານ ກປຊສ ສະພາແຫ່ງຊາດ ຊຸດທີ IX ຜູ້ໃໝ່ ໂດຍການເຂົ້າຮ່ວມຂອງທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ຊຸດທີ IX ພ້ອມດ້ວຍບັນດາທ່ານຮອງປະທານກຳມາທິການ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ແລະ ພະນັກງານ-ວິຊາການພາຍໃນກຳມາທິການດັ່ງກ່າວເຂົ້າຮ່ວມເປັນສັກຂີພິຍານ.

         ໂອກາດນີ້, ທ່ານ ພົຈວ. ຄຳສຸກ ວີອິນທະວົງ ໄດ້ສະຫລຸບລາຍງານການເຄື່ອນໄຫວວຽກງານຂອງກຳມາທິການໃນໄລຍະ 5 ປີຜ່ານມາວ່າ: ກຳມາທິການໄດ້ເອົາໃຈໃສ່ຮ່ຳຮຽນ, ເຊື່ອມຊຶມແນວທາງ, ແຜນນະໂຍບາຍ, ມະຕິ, ຄຳສັ່ງ, ກົດລະບຽບຂອງພັກ, ກົດໝາຍຂອງລັດ, ກຳແໜ້ນສະພາວະຄວາມເປັນຈິງຂອງກຳມາທິການຕົນ ເພື່ອຫັນແນວທາງ, ແຜນນະໂຍບາຍຂອງພັກ-ລັດ ໃຫ້ສອດຄ່ອງກັບຈຸດພິເສດຄວາມຮັບຜິດຊອບຂອງຕົນ, ຖືສຳຄັນໃນການສ້າງພະນັກ ງານ-ສະມາຊິກພັກ ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີຄວາມຈົງຮັກພັກດີຕໍ່ອຸດົມການຂອງພັກ, ມີສະຕິຕໍ່ການຈັດຕັ້ງ, ມີລະບຽບວິໄນ, ເຄົາລົບລະບຽບກົດໝາຍ, ມີຄວາມບຸກໜ້າບືນຕົວເຮັດສຳເລັດ   ໜ້າທີ່ຂອງຕົນ; ພະນັກງານ-ສະມາຊິກພັກ ຢຶດໝັ້ນປະຕິບັດຫລັກການລວມສູນປະຊາທິປະໄຕຢ່າງເຂັ້ມງວດ, ນຳພາເປັນໝູ່ຄະນະແບ່ງງານໃຫ້ບຸກຄົນຮັບຜິດຊອບ, ສຽງສ່ວນໜ້ອຍຂື້ນກັບສຽງສ່ວນຫລາຍ, ຂັ້ນລຸ່ມປະຕິບັດຕາມຂັ້ນເທິງ, ບຸກ ຄົນຂື້ນກັບການຈັດຕັ້ງ, ເຮັດວຽກມີແຜນການ ມີໂຄງການ, ມີການຊຸກຍູ້, ຕິດຕາມກວດກາ ແລະ ສະຫລຸບປະເມີນຜົນ, ປະຕິບັດລະບຽບປະຊຸມ ແລະ ລາຍງານສ່ອງແສງວຽກງານພັກ, ວິຊາສະເພາະຂັ້ນກຳມາທິການ, ຂັ້ນກົມ ເປັນປົກກະຕິ. ກປຊສ ໄດ້ເຂົ້າຮ່ວມໃນການສ້າງ ແລະ ປັບປຸງກົດໝາຍ ຕາມແຜນລວມຂອງສະພາແຫ່ງຊາດ ໂດຍສະເພາະຂົງເຂດ ປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ລວມທັງໝົດ 4 ສະບັບ: ສ້າງໃໝ່ 2 ສະບັບຄື: ກົດໝາຍ ວ່າດ້ວຍການຕ້ານການຄ້າມະນຸດ ແລະ ກົດໝາຍ ວ່າດ້ວຍການຮ່ວມມືລະຫວ່າງປະເທດທາງອາຍາ; ປັບປຸງ 2 ສະບັບຄື: ກົດໝາຍ ວ່າດ້ວຍກໍາລັງປ້ອງກັນຄວາມສະຫງົບປະຊາຊົນ ແລະ ກົດໝາຍ ວ່າດ້ວຍນາຍທະຫານກອງທັບປະຊາຊົນລາວ. ນອກນັ້ນ, ຍັງໄດ້ເຮັດສຳເລັດວຽກງານຫລາຍດ້ານ ແລະ ຍັງມີບາງບັນຫາທີ່ຍັງຄົງຄ້າງຈຳນວນໜຶ່ງທີ່ຄະນະກຳມາທິການຊຸດໃໝ່ ຈະຕ້ອງໄດ້ສືບຕໍ່ຈັດຕັ້ງປະຕິບັດໃຫ້ສຳເລັດເປັນກ້າວໆ.

         ທ່ານ ພົຈວ. ວົງສັກ ພັນທະວົງ ໄດ້ມີຄຳເຫັນກ່າວຮັບໜ້າທີ່ວ່າ: ພາລະບົດບາດ, ສິດ ແລະ ໜ້າທີ່ ຂອງ ກປຊສ ສະພາແຫ່ງຊາດ ມີຂອບເຂດວຽກງານທີ່ກວ້າງຂວາງ ຕິດພັນກັບການເຄື່ອນໄຫວລວມຂອງສະພາແຫ່ງຊາດ ຈາກນີ້, ຄະນະກຳມາທິການຊຸດໃໝ່ ຈະໄດ້ສຸມທຸກເຫື່ອແຮງ, ສະຕິປັນຍາ, ບົດຮຽນ ແລະ ປະສົບປະການທີ່ໄດ້ນໍາພາວຽກງານ ຢູ່ກົມໃຫຍ່ພະລາທິການກອງທັບ ກະຊວງປ້ອງກັນປະເທດ ເພື່ອເຮັດໃຫ້ການເຄື່ອນໄຫວວຽກງານຂອງ ກປຊສ ໃນການເປັນເສນາທິການໃຫ້ແກ່ສະພາແຫ່ງຊາດ, ຄະນະປະຈໍາສະພາແຫ່ງຊາດ ໄດ້ຮັບຜົນສໍາເລັດເປັນຢ່າງດີ ໂດຍສະເພາະການເປັນເສນາທິການ ໃນຂົງເຂດປ້ອງກັນຊາດ-ປ້ອງກັນຄວາມສະຫງົບ ແລະ ຂົງເຂດອື່ນ ທີ່ຕິດພັນກັບການເຄື່ອນໄຫວວຽກງານ ຂອງທຸກພາກສ່ວນພາຍໃນສະພາແຫ່ງຊາດ ເຊິ່ງຈະຕ້ອງໄດ້ສືບຕໍ່ເພີ່ມທະວີຄວາມເອົາໃຈໃສ່ຊີ້ນຳ-ນໍາພາ; ສະເໜີມາຍັງບັນດາກົມທີ່ເປັນກົງຈັກເສນາທິການ ໃຫ້ແກ່ກຳມາທິການ ຈົ່ງໄດ້ເພີ່ມທະວີຄວາມບຸກບືນຫ້າວຫັນປະຕິບັດໜ້າທີ່ວຽກງານ ຕາມຂອບເຂດຄວາມຮັບຜິດຊອບຂອງແຕ່ລະພາກສ່ວນໃຫ້ມີຜົນສໍາເລັດດ້ວຍຄຸນນະພາບທີ່ດີ ແລະ ທັນເວລາ.

           ໃນພິທີອັນມີຄວາມໝາຍສຳຄັນດັ່ງກ່າວ, ທ່ານ ສຸວອນ ເລືອງບຸນມີ ໄດ້ສະແດງຄວາມຍ້ອງຍໍຊົມເຊີຍຜົນງານຕະຫລອດໄລຍະເວລາ 5 ປີຜ່ານມາທີ່ກຳມາທິການຍາດມາໄດ້ ພ້ອມຍັງໄດ້ມີຄຳເຫັນຊີ້ນຳວ່າ: ສະເໜີໃຫ້ກຳມາທິການ ສືບຕໍ່ຄົ້ນຄວ້າປັບປຸງກົງຈັກການຈັດຕັ້ງຂອງຕົນ ທີ່ເຫັນວ່າການປະຕິບັດໜ້າທີ່ວຽກງານຍັງມີຄວາມຫຍຸ້ງຍາກ, ກົງຈັກຍັງບໍ່ທັນສົມຄູ່ກັບວຽກງານ ເພື່ອແນໃສ່ຮັບປະກັບການເຄື່ອນໄຫວວຽກງານໃຫ້ມີປະສິດທິພາບ, ວ່ອງໄວ, ທັນເວລາ ລວມທັງການຄົ້ນຄວ້າຊັບຊ້ອນບຸກຄະລາກອນຂັ້ນກົມ, ຂັ້ນພະແນກ ໃຫ້ສອດຄ່ອງກັບວຽກງານຕົວຈິງ; ເປັນໃຈກາງຮີບຮ້ອນປະສານສົມທົບກັບກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບ ຄົ້ນຄວ້າການປັບປຸງບັນດານິຕິກໍາ ກ່ຽວກັບບົດບັນທຶກວ່າດ້ວຍລະບອບປະສານງານຮ່ວມ ໃຫ້ມີຄວາມສອດຄ່ອງກັບໜ້າທີ່ວຽກງານໄລຍະໃໝ່ ແລະ ນິຕິກໍາກ່ຽວກັບການເຄື່ອນໄຫວຂອງ ກປຊສ ຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວວຽກງານຂອງກົມປ້ອງກັນຊາດ, ກົມປ້ອງກັນຄວາມສະຫງົບ ແລະ ນິຕິກໍາອື່ນ ເພື່ອເປັນບ່ອນອີງໃນການເຄື່ອນໄຫວວຽກງານໃຫ້ມີປະສິດທິພາບ; ຄົ້ນຄວ້າຜັນຂະຫຍາຍແຜນການເຄື່ອນໄຫວວຽກງານຂອງສະພາແຫ່ງຊາດ ແລະ ຄະນະປະຈຳສະພາແຫ່ງຊາດ ເປັນແຜນການເຄື່ອນໄຫວລະອຽດແຕ່ລະໄລຍະຂອງກຳມາທິການ ເພື່ອເປັນບ່ອນອີງໃຫ້ແກ່ກົງຈັກເສນາທິການ ໄດ້ນໍາໄປຜັນຂະຫຍາຍເປັນແຜນການເຄື່ອນໄຫວວຽກງານຂອງແຕ່ລະກົມ ແລະ ພ້ອມກັນສູ້ຊົນຈັດຕັ້ງປະຕິບັດ ໃຫ້ໄດ້ຮັບຜົນສໍາເລັດ; ເປັນໃຈກາງປະສານສົມທົບ ແລະ ຕິດຕາມຊຸກຍູ້ ບັນດາກໍາມະການຂອງກຳມາທິການ ກະກຽມດ້ານເນື້ອໃນ ແລະ ຂໍ້ມູນ ທີ່ພົວພັນເຖິງຂົງເຂດວຽກງານ ປກຊ-ປກສ ໃຫ້ແກ່ການດໍາເນີນກອງປະຊຸມຄະນະປະຈໍາສະພາແຫ່ງຊາດ ເພື່ອພິຈາລະນາຮັບຮອງເອົາບັນຫາສໍໍາຄັນຕ່າງໆ ຕາມຂອບເຂດສິດ ແລະ  ໜ້າທີ່ ທີ່ກົດໝາຍກໍານົດ; ເອົາໃຈໃສ່ການບໍາລຸງຍົກລະດັບວິຊາການດ້ານຕ່າງໆ ໃຫ້ແກ່ພະນັກງານ-ສະມາຊິກພັກ ຂອງກຳມາທິການຕົນຢ່າງເປັນປົກກະຕໍ່ເນື່ອງ ເພື່ອເຮັດໃຫ້ການປະຕິບັດໜ້າທີ່ວຽກງານຂອງກຳມາທິ ມີປະສິດທິຜົນ, ຕອບສະໜອງກັບຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່; ສະເໜີໃຫ້ບັນດາກົມ ກໍຄືພະນັກງານ-ສະມາຊິກພັກ ພາຍໃນກຳມາທິການ ຈົ່ງເພີ່ມທະວີີຄວາມຄວາມສາມັກຄີເປັນຈິດໜຶ່ງໃຈດຽວ ພ້ອມກັບປະທານກຳມາທິການຜູ້ໃໝ່ ໃນການບຸກບືນສູ້ຊົນຈັດຕັ້ງປະຕິບັດໜ້າທີ່ວຽກງານ ທີ່ຢູ່ໃນຂອບເຂດຄວາມຮັບຜິດຊອບຂອງຕົນ ໃຫ້ມີຜົນສໍາເລັດອັນໃໝ່ ແລະ ມີຄຸນນະພາບສູງຍິ່ງໆຂຶ້ນ.

                                                          ແຫຼ່ງຂ່າວທີ່ມາ: ສະພາແຫ່ງຊາດ