ປະທານ ກວທສ ຊຸດທີ VIII ແລະຊຸດທີ IX ມອບ-ຮັບໜ້າທີ່

11/05/2021 00:00 -

        (ສພຊ) ວັນທີ 2 ເມສາ 2021 ທີ່ສະພາແຫ່ງຊາດ (ທາດຫລວງ) ໄດ້ມີພິທີມອບ-ຮັບໜ້າທີ່ ລະຫວ່າງທ່ານ ສົມພູ ດວງສະຫວັນ ປະທານກຳມາທິການວັດທະນະທຳ-ສັງຄົມ (ກວທສ) ຊຸດທີ VIII ແລະ ທ່ານ ນາງ ທຸມມາລີ ວົງພະຈັນ ປະທານ ກວທສ ຊຸດທີ IX ຜູ້ໃໝ່ ໂດຍການເຂົ້າຮ່ວມຂອງທ່ານ ຄຳໃບ ດຳລັດ ຮອງປະທານສະພາແຫ່ງຊາດ ພ້ອມດ້ວຍບັນດາຮອງປະທານກຳມາທິການ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ແລະ ພະນັກງານ-ວິຊາການພາຍໃນກຳມາທິການດັ່ງກ່າວ.

        ໂອກາດນີ້, ທ່ານ ສົມພູ ດວງສະຫວັນ ໄດ້ລາຍງານຜົນງານການຊີ້ນຳ-ນຳພາວຽກງານ ໃນໄລຍະ 5 ປີຜ່ານມາ ເຖິງວ່າຈະຢູ່ໃນສະພາບແວດລ້ອມພາຍໃນ ແລະ ຕ່າງປະເທດ ມີທັງຂໍ້ຫຍຸ້ງຍາກ ແລະ ສິ່ງທ້າທາຍຫລາຍປະການກໍຕາມ ແຕ່ດ້ວຍຄວາມເອົາໃຈໃສ່ຊີ້ນໍາ-ນໍາພາຂອງອົງຄະນະພັກສະພາແຫ່ງຊາດ, ຄະນະປະຈຳສະພາແຫ່ງຊາດ, ຄະນະໜ່ວຍພັກຮາກຖານ, ຄະນະນໍາຂອງ ກວທສ, ຄວາມເປັນເຈົ້າການຂອງບັນດາກົງຈັກ ແລະ ເສນາທິການ ເຂົ້າໃນການປະຕິບັດໜ້າທີ່ວຽກງານຂອງຕົນ ຕາມພາລະບົດບາດ, ຄວາມຮັບຜິດຊອບ ແລະ ການມອບໝາຍຂອງຂັ້ນເທິງ ເຊິ່ງສາມາດມີຜົນສໍາເລັດໃນຫລາຍດ້ານ ປະກອບສ່ວນເຂົ້າໃນຜົນງານລວມຂອງສະພາແຫ່ງຊາດ ຊຸດທີ VIII ເປັນຕົ້ນແມ່ນດ້ານນິຕິບັນຍັດ: ກຳມາທິການ ໄດ້ປະສານສົມທົບກັບບັນດາກຳມາທິການ ພາຍໃນສະພາແຫ່ງຊາດ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມແຕ່ຫົວທີໃນການສ້າງແຜນການ, ການຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍ 5 ປີ (2016-2020) ຂົງເຂດວັດທະນະທຳ-ສັງຄົມ ໄດ້ຈໍານວນ 15 ສະບັບ, ໃນນີ້ ກົດໝາຍສ້າງໃໝ່ 10 ສະບັບ, ປັບປຸງ 5 ສະບັບ; ທຽບໃສ່ແຜນການ 5 ປີ ປະຕິບັດໄດ້ 77%, ຜັນຂະຫຍາຍເປັນນິຕິກຳໃຕ້ກົດໝາຍໄດ້ 47 ມາດຕາ; ເຂົ້າຮ່ວມໂຄສະນາເຜີຍແຜ່ກົດໝາຍໄດ້ຈໍານວນໜຶ່ງ ແລະ ຈັດກອງປະຊຸມປະເມີນຜົນການຈັດຕັ້ງປະຕິບັດກົດໝາຍໄດ້ 2 ຄັ້ງ; ດ້ານການສ້າງນິຕິກໍາ: ເພື່ອເປັນບ່ອນອີງໃນການເຄື່ອນໄຫວໜ້າທີ່ວຽກງານຂອງກໍາມາທິການ ເປັນຕົ້ນ: ມະຕິ​ຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ ​ວ່າ​ດ້ວຍ​ການຈັດຕັ້ງ ​ແລະ ການ​ເຄື່ອນ​ໄຫວ​ຂອງ ​ກວທສ ສະບັບເລກທີ 0127/ຄປຈ, ລົງ​ວັນ​ທີ 1 ກັນຍາ 2016; ມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງສະມາຄົມສະມາຊິກສະພາແຫ່ງຊາດ ເພື່ອສົ່ງເສີມວຽກງານປະຊາກອນ ແລະ ການພັດທະນາ ສະບັບເລກທີ 0147/ຄປຈ, ລົງວັນທີ 10 ຕຸລາ 2017; ຂໍ້ຕົກລົງ ວ່າດ້ວຍການພົວພັນ ແລະ ປະສານງານ ລະຫວ່າງ ກວທສ ກັບພາກສ່ວນທີ່ກ່ຽວຂ້ອງ ສະບັບເລກທີ 189/ກວທສ, ລົງວັນທີ 05 ມິຖຸນາ 2017; ຂໍ້ຕົກລົງ ວ່າດ້ວຍລະບອບແບບແຜນວິທີເຮັດວຽກ ຂອງ ກວທສ ສະບັບເລກທີ 197/ກວທສ, ລົງວັນທີ 28/12/2018; ນອກນັ້ນ, ຍັງມີດ້ານການຕົກລົງບັນຫາສຳຄັນຂອງປະເທດຊາດ; ດ້ານການຕິດຕາມກວດກາ; ວຽກງານພົວພັນຕ່າງປະເທດ ແລະ ການສ້າງຄວາມເຂັ້ມແຂງໃຫ້ກໍາມາທິການ.

          ຈາກນັ້ນ, ທ່ານ ຄຳໃບ ດຳລັດ ໄດ້ມີຄຳເຫັນໂອ້ລົມຕໍ່ພິທີ ມີບາງຕອນສຳຄັນວ່າ: ຕະຫລອດໄລຍະເວລາ 5 ປີຜ່ານມາ, ກວທສ ຂອງສະພາແຫ່ງຊາດ ຊຸດທີ VIII ໂດຍມີການຊີ້ນຳ-ນຳພາຂອງທ່ານ ສົມພູ ດວງສະຫວັນ ພ້ອມດ້ວຍບັນດາຮອງປະທານກຳມາທິການ ເຕົ້າໂຮມຄວາມສາມັກຄີພະນັກງານ-ລັດຖະກອນ ພາຍໃນກຳມາທິການ ໄດ້ເປັນຢ່າງດີ ທັງຊີ້ນຳ-ນຳພາປະຕິບັດໜ້າທີ່ເປັນເສນາທິການໃຫ້ຄະນະປະຈຳສະພາແຫ່ງຊາດ; ຮຽກຮ້ອງມາຍັງຄະນະປະທານກຳມາທິການຊຸດໃໝ່ ສືບຕໍ່ນຳພາແນວຄິດພະນັກງານ-ສະມາຊິກພັກ ໃຫ້ເຂົ້້າໃຈຢ່າງເລິກເຊິ່ງ ແລະ ກຳໄດ້ແນວທາງນະໂຍບາຍຂອງພັກ, ສືບຕໍ່ມີສະຖຽນລະພາບດ້ານການເມືອງຢ່າງໜັກແໜ້ນ, ຮັກສາມູນເຊື້ອຄວາມສາມັກຄີເປັນເອກະພາບພາຍໃນ ເພື່ອຮ່ວມມືໃນການພັດທະນາວຽກງານຂອງຕົນໃຫ້ມີຄວາມໜັກແໜ້ນ ປະຕິບັດແບບແຜນວິທີການເຮັດວຽກໃຫ້ ກວທສ ມີຄວາມແຂງແຮງຂຶ້ນເປັນກ້າວໆ. 

                                                         ແຫຼ່ງຂ່າວທີ່ມາ: ສະພາແຫ່ງຊາດ