ສູນກາງສະຫະພັນ ກຳມະບານລາວ ຊຸກຍູ້ສະຫະພັນກຳມະບານສະພາແຫ່ງຊາດ

16/09/2019 00:00 -

(ສພຊ) ໃນວັນທີ 3 ກັນຍາ 2019, ທີ່ຫ້ອງປະຊຸມນ້ອຍຄະນະເລຂາທິການສະພາແຫ່ງຊາດ (ຫລັກ 6) ນະຄອນຫລວງວຽງຈັນ ຄະນະສະຫະພັນກໍາມະບານສະພາແຫ່ງຊາດ ນໍາໂດຍສະຫາຍ ສຸບັນ ສະວະບຸດ ປະທານຄະນະບໍລິຫານງານສະຫະພັນກໍາມະບານສະພາແຫ່ງຊາດ ພ້ອມດ້ວຍຄະນະ ໄດ້ຕ້ອນຮັບຄະນະສູນກາງສະຫະພັນກໍາມະບານລາວ ນໍາໂດຍ ສະຫາຍ ປ້ານ ນ້ອຍມະນີ ປະທານຄະນະບໍລິຫານງານສູນກາງສະຫະພັນກໍາມະບານລາວ ພ້ອມດ້ວຍຄະນະ ລົງຕິດຕາມກວດກາ ແລະ ຊຸກຍູ້ວຽກງານກໍາມະບານຮອບດ້ານຢູ່ສະຫະພັນກໍາມະບານສະພາແຫ່ງຊາດ ມີບັນດາຄະນະບໍລິຫານງານສະຫະພັນກໍາມະບານສະພາແຫ່ງຊາດເຂົ້າຮ່ວມ.

          ຈຸດປະສົງຂອງການລົງຊຸກຍູ້ໃນຄັ້ງນີ້ ກໍເພື່ອເຮັດໃຫ້ວຽກງານສະຫະພັນກໍາມະບານລາວໄດ້ຮັບປະສິດທິຜົນສູງ.

ກອງປະຊຸມ ໄດ້ຮັບຟັງການລາຍງານການຊີ້ນໍາ-ນໍາພາລວມສະພາບການຈັດຕັ້ງປະ ຕິບັດມະຕິກອງປະຊຸມໃຫຍ່ຜູ້ແທນສະຫະພັນກໍາມະບານລາວທົ່ວປະເທດ ຄັ້ງທີ 7  ຕິດພັນກັບມະຕິກອງປະຊຸມໃຫຍ່ຄັ້ງທີ V ຂອງສະຫະພັນກໍາມະບານສະພາແຫ່ງຊາດ ແລະ ສະພາບການກະກຽມການຈັດກອງປະຊຸມໃຫຍ່ 3 ຂັ້ນ ຢູ່ພາຍໃນສະຫະພັນກໍາມະບານສະພາແຫ່ງຊາດ ຈາກປະທານຄະນະບໍລິຫານງານສະຫະພັນກໍາມະບານສະພາແຫ່ງຊາດ ຈາກນັ້ນ ຜູ້ເຂົ້າຮ່ວມກໍໄດ້ສົນທະນາແລກປ່ຽນບາງບັນຫາທີ່ຍັງມີຄວາມສົນໃຈໃນການຈັດຕັ້ງປະຕິບັດສິດ, ພາລະບົດບາດຂອງກໍາມະບານ.

ໂອກາດດັ່ງກ່າວ ສະຫາຍປະທານສູນກາງສະຫະພັນກໍາມະບານລາວ ໄດ້ໂອ້ລົມຕໍ່ກອງປະຊຸມ ໂດຍສະຫາຍໄດ້ຍ້ອງຍໍຊົມເຊີຍຜົນງານທີ່ສະຫະພັນກໍາມະບານສະພາແຫ່ງຊາດຍາດມາໄດ້, ແນະນໍາໃຫ້ປະຕິບັດຕາມການຈັດຕັ້ງຂອງພັກໃຫ້ທິດຊີ້ນໍາໃນການປະຕິບັດໜ້າທີ່ໃນການຊີ້ນໍາ-ນໍາພາ ໃຫ້ຖືເອົາຄະນະພັກສະພາແຫ່ງຊາດເປັນທີ່ປຶກສາ, ເອົາໃຈໃສ່ສຶກສາອົບຮົມກ່ຽວກັບດ້ານແນວຄິດການເມືອງໃຫ້ແກ່ບັນດາສະມາຊິກກໍາມະບານພາຍໃນຂອງຕົນ ແລະ ສະຫາຍຍັງໄດ້ເນັ້ນໃຫ້ປະຕິບັດຂໍ້ແຂ່ງຂັນກໍາມະບານ 5 ເປັນເຈົ້າ ແລະ ມະຕິຂອງກອງປະຊຸມໃຫຍ່ຂອງພັກ ແລະ ຂອງສູນກາງສະຫະພັນກໍາມະບານລາວວາງອອກ.