ປະທານ ກກໝ ປາຖະກະຖາ 3 ວັນສຳຄັນຂອງຊາດ ຢູ່ກະຊວງຊັບພະຍາກອນທຳມະຊາດ ແລະ ສິ່ງແວດລ້ວມ

16/09/2019 00:00 -

(ສພຊ) ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ປາຖະກະຖາ ວັນສ້າງຕັ້ງແນວລາວສ້າງຊາດ ຄົບຮອບ 69 ປີ, ວັນລັດຖະທໍາມະນູນ ແຫ່ງ ສປປລາວ ຄົບຮອບ 28 ປີ ແລະ ວັນຍຶດອໍານາດ ຄົບຮອບ 44 ປີ ໂດຍການປາຖະກະຖາຂອງ ທ່ານ  ສາຍທອງ ແກ້ວດວງດີ ປະທານກໍາມາທິການກົດໝາຍສະພາແຫ່ງຊາດ, ເຂົ້າຮ່ວມມີທ່ານ ສົມມາດ ພົນເສນາ ລັດຖະມົນຕີກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ, ມີຄະນະປະຈໍາພັກກະຊວງ, ຄະນະພັກກະຊວງ, ຫົວໜ້າ-ຮອງຫົວໜ້າກົມ, ພະແນກ ແລະ ພະນັກງານ-ລັດຖະກອນພາຍໃນກະຊວງເຂົ້າຮ່ວມ.

          ທ່ານ ສາຍທອງ ແກ້ວດວງດີ ໄດ້ຍົກໃຫ້ເຫັນເຖິງການເຕີບໃຫຍ່ຂະຫຍາຍຕົວ ແລະ ມູນເຊື້ອອັນສະຫງ່າລາສີຂອງແນວລາວສ້າງຊາດ ໃນແຕ່ລະໄລຍະ ອົງການແນວລາວສ້າງຊາດ ແຕ່ລະຂັ້ນໄດ້ຕັ້ງຫນ້າສຶກສາອົບຮົມ, ເຕົ້າໂຮມຄວາມສາມັກຄີປະຊາຊົນບັນດາເຜົ່າ, ຊັ້ນຄົນ, ສາສະຫນາ ແລະ ເພດໄວ ໃນວົງຄະນາຍາດແຫ່ງຊາດ ບົນພື້ນຖານພັດທະນາກຳມະກອນ-ຊາວນາ ພາຍໃຕ້ການຊີ້ນຳຂອງພັກ, ເຕົ້າໂຮມທຸກກຳລັງ, ການຈັດຕັ້ງສັງຄົມຢ່າງກວ້າງຂວາງ, ເຂົ້າຮ່ວມປະຕິບັດສອງໜ້າທີ່ຍຸດທະສາດຂອງພັກ, ເສີມຂະຫຍາຍສິດເສລີພາບ ປະຊາທິປະໄຕ ຂອງພົນລະເມືອງ, ແກ້ໄຂແນວຄິດລະຫວ່າງເຜົ່າ ດ້ວຍການປະສານສົມທົບກັບອົງການຈັດຕັ້ງພັກ-ລັດ, ການຈັດຕັ້ງພາຄີໃນການສຶກສາອົບຮົມມູນເຊື້ອຂອງຊາດ-ຂອງພັກ, ສູນກາງແນວລາວສ້າງຊາດ ໄດ້ມີການພົວພັນຮ່ວມມືກັບອົງການຈັດຕັ້ງແນວໂຮມ ແລະ ອົງການຈັດຕັ້ງທີ່ກ່ຽວຂ້ອງ ຂອງບັນດາປະເທດເພື່ອນມິດຍຸດທະສາດ, ປະເທດເພື່ອນມິດ, ປະກອບສ່ວນຢ່າງຕັ້ງຫນ້າໃນການປະຕິບັດນະໂຍບາຍການຕ່າງປະເທດຂອງພັກ, ພົວພັນຮ່ວມມືແລກປ່ຽນຄະນະຜູ້ແທນຂັ້ນສູງ, ແລກປ່ຽນດ້ານວິຊາການ, ວຽກງານບຳລຸງສ້າງພະນັກງານ ນັບແຕ່ຂັ້ນສູນກາງລົງຮອດທ້ອງຖິ່ນ. ສັງລວມແລ້ວ ພາຍຫລັງປະເທດຊາດ ໄດ້ຮັບການປົດປ່ອຍສົມບູນ ພັກເຄື່ອນໄຫວເປີດເຜີຍ ມີອົງການລັດປະຕິບັດບົດບາດຄຸ້ມຄອງບໍລິຫານ, ສຳລັບອົງການແນວລາວສ້າງຊາດ ໄດ້ເຕີບໃຫຍ່ຂະຫຍາຍຕົວທາງດ້ານການຈັດຕັ້ງ, ແນວລາວສ້າງຊາດ ຮ່ວມກັບອົງການຈັດຕັ້ງມະຫາຊົນ ແລະ ອົງການຈັດຕັ້ງສັງຄົມຕ່າງໆ ໄດ້ຍົກສູງບົດບາດໃນການເຕົ້າໂຮມກ້ອນກຳລັງສາມັກຄີປອງດອງທົ່ວປວງຊົນ, ໂຄສະນາສຶກສາອົບຮົມປະຊາຊົນຢ່າງກວ້າງ ຂວາງ, ເສີມຂະຫຍາຍສິດເປັນເຈົ້າຂອງປະຊາຊົນ, ສືບຕໍ່ປະຕິບັດ 2 ຫນ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ. ນອກນັ້ນ, ທ່ານຍັງໄດ້ໃຫ້ຮູ້ເຖິງວັນລັດຖະທໍາມະນູນ ແຫ່ງ ສປປລາວ ຄົບຮອບ 28 ປີ ແລະ ວັນຍຶດອໍານາດ ຄົບຮອບ 44 ປີ ຕື່ມອີກ.