02/09/2019 00:00 -

(ສພຊ) ໃນວັນທີ 16 ສິງຫາຜ່ານມາ, ໜ່ວຍກໍາມະບານຮາກຖານຄະນະສະມາຊິກສະພາແຫ່ງຊາດ (ສສຊ) ເພດຍິງ ໄດ້ຈັດກອງປະຊຸມໃຫຍ່ຄັ້ງທີ I, ທີ່ຫ້ອງປະຊຸມນ້ອຍຄະນະເລຂາທິການສະພາແຫ່ງຊາດ (ຫລັກ 6 ) ນະຄອນຫລວງວຽງຈັນ ໂດຍການເປັນປະທານຂອງສະຫາຍ ບຸນເຮືອງ ພຸດຈັນທອນທະວົງ ຫົວໜ້າໜ່ວຍກໍາມະບານຮາກຖານຄະນະ ສສຊ ເພດຍິງ ໂດຍການເຂົ້າຮ່ວມຂອງສະຫາຍ ນາງ ທັດສະດາພອນ ແສງສຸລິຍາ ເລຂາໜ່ວຍພັກຮາກຖານຄະນະ ສສຊ ເພດຍິງ, ສະຫາຍ ພອນແກ້ວ ຕົ້ນວໍລະຈິດ ຮອງປະທານກໍາມະບານສະພາແຫ່ງຊາດ, ບັນດາສະມາຊິກໜ່ວຍພັກກໍາມະບານ ສສຊ ແລະ ບັນດາຜູ້ຕາງໜ້າຈາກໜ່ວຍພັກແຕ່ລະໜ່ວຍພາຍໃນສະພາແຫ່ງຊາດເຂົ້າຮ່ວມ.

        ທັງນີ້ ກໍເພື່ອເປັນການລາຍງານຄືນການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າຂອງກໍາມະບານຮາກຖານຄະນະສະມາຊິກສະພາແຫ່ງຊາດເພດຍິງ ແລະ ຄັດເລືອກເອົາບຸກຄະລາກອນທີ່ດີເດັ່ນຄົບມາດຖານເຂົ້າໂຄງປະກອບບຸກຄະລາກອນອອກຮັບສະໝັກຄະນະກໍາມະບານຮາກຖານຄະນະ ສສຊ ເພດຍິງ ແລະ ເພື່ອຜັນຂະຫຍາຍຕາມຄໍາແນະນໍາຂອງຄະນະບໍລິຫານງານສະຫະພັນກໍາມະບານສະພາແຫ່ງຊາດ.

        ກອງປະຊຸມໄດ້ຮັບຟັງບົດລາຍງານການເມືອງ, ການຜ່ານບົດສໍາຫລວດການນໍາພາຂອງກໍາມະບານຮາກຖານຄະນະ ສສຊ ເພດຍິງ, ສະເໜີມາດຖານເງື່ອນໄຂ ແລະ ສະເໜີລາຍຊື່ຜູ້ລົງສະໝັກ, ດໍາເນີນການປ່ອນບັດເລືອກຕັ້ງເອົາຄະນະກໍາມະບານຮາກຖານຄະນະ ສສຊ ເພດຍິງຊຸດໃໝ່, ຮັບຟັງການໂອ້ລົມຂອງສະຫາຍເລຂາໜ່ວຍພັກຮາກຖານຄະນະ ສສຊ ເພດຍິງ ແລະ ຜ່ານຮ່າງມະຕິກອງປະຊຸມ ເຊິ່ງໄດ້ປ່ອນບັດເລືອກຕັ້ງເອົາຄະນະໜ່ວຍກໍາມະບານຊຸດໃໝ່ປະກອບມີ ສະຫາຍ ນາງ ຫວັນໄຊ ຈັນທະ

ລາ ເປັນຫົວໜ້າໜ່ວຍ; ສະຫາຍ ສຸບັນ ໄຊດວງຕາ ເປັນຮອງ, ທັງເປັນປະທານກວດກາ ແລະ ສະຫາຍ ມຸຍ ບຸນທອງມາ ເປັນຄະນະກໍາມະການ. ນອກຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ຜັດປ່ຽນກັນປະກອບຄໍາຄິດຄໍາເຫັນຢ່າງກົງໄປກົງມາໃສ່ຮ່າງມະຕິ ເພື່ອໃຫ້ມີເນື້ອໃນສົມບູນຄົບຖ້ວນ ສາມາດນໍາໄປເປັນຂໍ້ອ້າງອີງໃນການປະຕິບັດ.

(ສອນສັກ ວັນວິໄຊ)