ກອງປະຊຸມ ຝຶກອົບຮົມສ້າງຂີດຄວາມສາມາດ ໃນການແກ້ໄຂຄຳຮ້ອງຂໍຄວາມເປັນທຳ

23/08/2019 00:00 -

 (ສພຊ) ລະຫວ່າງວັນທີ 17-18 ສິງຫາ 2019, ທີ່ຮີສອດນາປ່າກວາງ ເມືອງແກ້ວອຸດົມ ແຂວງວຽງຈັນ, ກໍາມາທິການຍຸຕິທຳ (ກມຍທ) ສະພາແຫ່ງຊາດ ໄດ້ເປີດຊຸດເຝິກອົບຮົມສ້າງຂີດຄວາມສາມາດ ໃນການແກ້ໄຂຄຳຮ້ອງຂໍຄວາມເປັນທຳ ໃຫ້ແກ່ພະນັກງານທີ່ສັງກັດຢູ່ກຳມາທິການຍຸຕິທຳ ໂດຍການເປັນປະທານຂອງທ່ານ ຄຳແພງ ວິລະພັນ ຮອງປະທານ ກມຍທ; ເຂົ້າຮ່ວມມີທ່ານ ນາງ ບົວຄຳ ທິບພະວົງ ປະທານ ກມຍທ, ທ່ານ ດາວອນ ຫວ່າງວິຈິດ ອະດີດຄະນະປະຈຳສະພາແຫ່ງຊາດ,  ຫົວໜ້າ-ຮອງຫົວໜ້າຂະແໜງການຍຸຕິທຳ ຂອງສະພາປະຊາຊົນແຂວງວຽງຈັນ ແລະ ພະນັກງານທີ່ກ່ຽວຂ້ອງຈາກສະພາແຫ່ງຊາດ ເຂົ້າຮ່ວມຢ່າງພ້ອມພຽງ.

          ຈຸດປະສົງຂອງການເຝິກອົບຮົມຄັ້ງນີ້ ເພື່ອເປັນການຍົກລະດັບຄວາມຮູ້ຄວາມສາມາດ ໃຫ້ແກ່ພະນັກງານ-ລັດຖະກອນ ຂອງກໍາມາທິການຍຸຕິທໍາ ໃນການຄົ້ນຄວ້າພິຈາລະນາຄໍາຮ້ອງຂໍຄວາມເປັນທໍາ; ເພື່ອສ້າງຄວາມເປັນເອກະພາບ ໃນການສະຫລຸບລາຍງານການຄົ້ນຄວ້າຄໍາຮ້ອງຂໍຄວາມເປັນທໍາ ໃຫ້ມີຄວາມຖືກຕ້ອງ, ທັນກໍານົດເວລາ ຕາມກົດໝາຍ ກໍານົດໄວ້.

ກອງປະຊຸມຄັ້ງນີ້ ໄດ້ຄົ້ນຄວ້າ, ປະກອບຄຳເຫັນ ແລະ ເຊື່ອມຊຶມເອກະສານຈຳນວນໜຶ່ງ  ເປັນຕົ້ນ: ການຄົ້ນຄວ້າ, ວິເຄາະ, ວິໄຈ ແລະ ສັງລວມເນື້ອໃນຄຳຮ້ອງຂໍຄວາມເປັນທຳ; ການຂຽນຮ່າງບົດລາຍງານຕໍ່ກົມ, ກຳມາທິການ ແລະ ຄະນະປະຈຳສະພາແຫ່ງຊາດ; ສະເໜີແບບຟອມ ແຈ້ງຜົນການຕົກລົງຂອງຄະນະປະຈຳສະພາແຫ່ງຊາດ ກ່ຽວກັບການກວດກາ, ຄົ້ນຄວ້າ, ພິຈາລະນາຄຳຮ້ອງຂໍຄວາມເປັນທຳຂອງປະຊາຊົນ, ແຈ້ງຜົນ ຫລື ແຈ້ງການຂອງກຳມາທິການຍຸຕິທຳ; ບົດຮຽນການຄົ້ນຄວ້າ ແລະ ພິຈາລະນາຄຳຮ້ອງຂອງຊ່ຽວຊານ ຈາກປະເທດອິນໂດເນເຊຍ; ນອກນັ້ນ, ຍັງໄດ້ຈັດກຸ່ມເຝິກຂຽນບົດລາຍງານ ແລະ ນຳສະເໜີບົດໃນກອງປະຊຸມດັ່ງກ່າວ.

ທ່ານ ຄຳແພງ ວິລະພັນ ໄດ້ມີຄຳເຫັນຕໍ່ກອງປະຊຸມວ່າ: ການຄົ້ນຄວ້າ, ວິເຄາະ, ວິໄຈ ແລະ ການຂຽນບົດລາຍງານ ກ່ຽວກັບການຄົ້ນຄວ້າ, ພິຈາລະນາ ຄຳຮ້ອງຂໍຄວາມເປັນທຳ ເຊິ່ງເປັນພາລະບົດບາດຄວາມຮັບຜິດຊອບຂອງກໍາມາທິການ ເພື່ອຮັບປະກັນໃຫ້ກອງປະຊຸມມີປະສິດທິຜົນ ມີເນື້ອໃນຄົບຖ້ວນ-ເລິກເຊິ່ງ ແທດເໝາະກັບສະພາບຕົວຈິງ, ເປັນເອກະພາບກັນດ້ານຫລັກການ, ກົນໄກ ແລະ ວິທີການຄົ້ນຄວ້າ, ການຂຽນບົດລາຍງານຂອງວິຊາການຕໍ່ກົມ, ກຳມາທິການຍຸຕິທຳ ແລະ ຄະນະປະຈໍາສະພາແຫ່ງຊາດ ໃຫ້ມີເນື້ອໃນຮັດກຸມ, ຈະແຈ້ງຖືກຕ້ອງຕາມກົດໝາຍ ແລະ ທັນກໍານົດເວລາ ໄດ້ຮັບໝາກຜົນທີ່ດີນັ້ນ ຈົ່ງພ້ອມກັນແລກປ່ຽນປະສົບການ ແລະ ບົດຮຽນຮ່ວມກັນ ຢ່າງກົງໄປກົງມາ, ຊອກໃຫ້ໄດ້ວິທີການຄົ້ນຄວ້າ ແລະ ການຂຽນບົດລາຍງານທີ່ມີຄຸນນະພາບ ເພື່ອລາຍງານຂັ້ນເທິງຕົກລົງໃຫ້ມີປະສິດທິພາບ. ສະນັ້ນ, ບັນດານັກສຳມະນາກອນທີ່ສັງກັດຢູ່ກຳມາທິການຍຸຕິທຳ ແລະ ສະພາປະຊາຊົນແຂວງວຽງຈັນ ທີ່ເຂົ້າຮ່ວມກອງປະຊຸມມີຄວາມເຂົ້າໃຈ ແລະ ເປັນເອກະພາບຕໍ່ວຽກງານພິຈາລະນາ ແລະ ແກ້ໄຂຄຳຮ້ອງຂໍຄວາມເປັນທຳ ໃຫ້ຖືກຕ້ອງ ແລະ ສອດຄ່ອງກັບກົດໝາຍ, ເພີ່ມຄວາມຮັບຜິດຊອບຂອງພະນັກງານທີ່ໄດ້ຮັບການມອບໝາຍ ໃຫ້ປະຕິບັດໜ້າທີ່ໃນການຄົ້ນຄວ້າ ແລະ ພິຈາລະນາຄໍາຮ້ອງ ຖືກຕ້ອງ, ວ່ອງໄວ, ໂປ່ງໃສ ແລະ ຍຸຕິທຳ.

ກອງປະຊຸມຄັ້ງນີ້ ໄດ້ຮັບການສະໜັບສະໜູນດ້ານງົບປະມານຈາກມູນນິທິແວສມິນສເຕີ (WFD).

(ນາງ ກຸກກິກ ບຸດດາໄຊ)