23/08/2019 00:00 -

(ສພຊ) ໃນໂອກາດຢ້ຽມຢາມຣາຊະອານາຈັກກໍາປູເຈຍ ລະຫວ່າງວັນທີ 12-17 ສິງຫາ 2019 ທ່ານ ນາງ ສວນສະຫວັນ ວິຍະເກດ ເລຂາທິການສະພາ​​ແຫ່ງ​ຊາດ ແຫ່ງ ສປປລາວ ໄດ້ນໍາພາຄະນະເຂົ້າຢ້ຽມຂໍ່ານັບທ່ານ ນາງ ກິດຕິສັງຄາຫາບິນດິດ ຄວນ ສຸດາລີ ຮອງປະທານສະພາແຫ່ງຊາດ ແຫ່ງຣາຊະອານາຈັກກໍາປູເຈຍ ທີ່​ນະຄອນພະນົມເປັນ, ຣາຊະອານາຈັກກໍາປູເຈຍ ເຊິ່ງກ່ອນອື່ນທ່ານຮອງປະທານສະພາແຫ່ງຊາດກໍາປູເຈຍ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ສວນສະຫວັນ ວິຍະເກດ ພ້ອມດ້ວຍຄະນະ ເພື່ອເປັນການຢ້ຽມຢາມຖາມຂ່າວ ແລະ ລາຍງານຈຸດປະສົງຂອງການມາຢ້ຽມຢາມ ແລະ ເຮັດວຽກ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຄັ້ງນີ້.

ໂອກາດນີ້, ທ່ານ ນາງ ສວນສະຫວັນ ວິຍະເກດ ໄດ້ສະແດງຄວາມຂອບໃຈຢ່າງຈິງໃຈທີ່ທ່ານຮອງປະທານສະພາແຫ່ງຊາດ ແຫ່ງຣາຊະອານາຈັກກໍາປູເຈຍ ໄດ້ສະຫລະເວລາ​​ຮັບການ​ເຂົ້າ​ຢ້ຽມ​ຂ່ຳນັບ​ ຂອງຄະນະ ພ້ອມທັງແຈ້ງຈຸດປະສົງຂອງການເດີນທາງມາຢ້ຽມຢາມ ແລະ ເຮັດວຽກໃນຄັ້ງນີ້ ແລະ ຂໍຖືໂອກາດອັນສໍາຄັນນີ້, ນໍາເອົາຄວາມ​ຢ້​ຽມ​ຢາມ​ຖາມ​ຂ່າວ ຂອງ​ທ່ານ ນາງ ປາ​ນີ ຢາ​ທໍ່​ຕູ້ ປະ​ທານ​ສະ​ພາ​ແຫ່ງ​ຊາດ​ລາວ ເຖິງ​ສົມເດັດ ອັກຄະມະຫາ ໂປເຢຍ ຈັກກຣີ ເຮັງ ຊຳຣິນ ປະທານສະພາແຫ່ງຊາດ ແລະ ການນຳຂັ້ນສູງ ຂອງສະພາແຫ່ງຊາດ ແຫ່ງ ຣາຊະອານາຈັກກຳປູເຈຍ ​ໃນ​ໂອກາດ​ນີ້​ດ້ວຍ ເຊິ່ງການມາຢ້ຽມຢາມ ແລະ ເຮັດວຽກ ຂອງຄະນະ ໃນຄັ້ງນີ້ ແມ່ນການຕອບ​ສະໜອງ​ຕາມ​ການ​ເຊື້ອ​ເຊີນຂອງ​ທ່ານ ເລັງ ເປັງລອງ ເລຂາທິການໃຫຍ່ສະພາແຫ່ງຊາດກໍາປູເຈຍ, ການສືບຕໍ່ຈັດຕັ້ງຜັນຂະຫຍາຍເນື້ອໃນບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງສອງປະທານສະພາແຫ່ງຊາດລາວ ແລະ ກຳປູເຈຍ ເຊິ່ງໄດ້ລົງນາມຮ່ວມກັນ ໃນວັນທີ 14 ມັງກອນ 2019 ທັງເປັນການແລກປ່ຽນບົດຮຽນກ່ຽວກັບການປະຕິບັດພາລະບົດບາດ ໃນການເປັນເສນາທິການໃຫ້ແກ່ສະພາແຫ່ງຊາດ ເຊິ່ງກັນ ແລະ ກັນ ເພື່ອປະກອບສ່ວນຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີຊ່ວຍເຫລືອເຊິ່ງກັນ ແລະ ກັນ ແລະ ການຮ່ວມມືຖານບ້ານໃກ້ເຮືອນຄຽງທີ່ມີມູນເຊື້ອອັນດີງາມມາແຕ່ບູຮານນະການ ລະຫວ່າງ ສປປລາວ ແລະ ຣາຊະອານາຈັກກໍາປູເຈຍ ເວົ້າລວມ, ເວົ້າສະເພາະແມ່ນການເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງສອງສະພາແຫ່ງຊາດ ໃຫ້ສືບຕໍ່ຂະຫຍາຍຕົວ ແລະ ເຂົ້າສູ່ລວງເລິກ.

ໂອກາດດຽວກັນນີ້, ທ່ານ ນາງ ກິດຕິສັງຄາຫາບິນດິດ ຄວນ ສຸດາລີ ໄດ້ສະແດງຄວາມຍີນດີຕ້ອນຮັບ ພ້ອມທັງຕີລາຄາສູງຕໍ່ການເດີນທາງມາຢ້ຽມຢາມ ແລະ ເຮັດວຽກຂອງຄະນະຜູ້ແທນສະພາແຫ່ງຊາດລາວຄັ້ງນີ້ ເຊິ່ງເປັນການສົ່ງເສີມການພົວພັນຮ່ວມມືຂອງສອງສະພາແຫ່ງຊາດກໍາປູເຈຍ-ລາວໃຫ້ກ້າວເຂົ້າສູ່ລວງເລິກ.

ຫລັງຈາກນັ້ນ, ທີ່ສະພາແຫ່ງຊາດກໍາປູເຈຍ ໄດ້ມີພິທີພົບປະສອງຝ່າຍ ເຊິ່ງໄດ້ແລກປ່ຽນຮ່ວມກັນ 2 ຫົວຂໍ້ຄື: 1. ວຽກງານໂຄສະນາທາງສື່ມວນຊົນ ແລະ 2. ວຽກງານໄອທີ.

ເຊິ່ງກ່ອນອື່ນ ຫົວໜ້າຄະນະຜູ້ແທນກໍາປູເຈຍ ໄດ້ແຈ້ງສະພາບ ແລະ ກົງຈັກການຈັດຕັ້ງຂອງຄະນະເລຂາທິການສະພາແຫ່ງຊາດກໍາປູເຈຍ ໃຫ້ຝ່າຍລາວຊາບວ່າ: ສໍາລັບກົມໂຄສະນາຂ່າວສານ ຮັບຜິດຊອບໂຄສະນາການເຄື່ອນໄຫວຂອງສະພາແຫ່ງຊາດ ຜ່ານສື່ຂອງສະພາ, ພົວພັນກັບສື່ມວນຊົນອື່ນ ເພື່ອໂຄສະນາການເຄື່ອນໄຫວຂອງສະພາແຫ່ງຊາດ, ຮັບຜິດຊອບລະບົບສຽງ ແລະ ພາບ ຢູ່ຫ້ອງປະຊຸມສະພາ ແລະ ຫ້ອງປະຊຸມອື່ນຂອງສະພາ ແລະ ລະບົບໄມໂຄຣໂຟນຢູ່ຫ້ອງປະຊຸມ, ລະບົບແປພາສາ, ຮັບຜິດຊອບລະບົບກ້ອງຖ່າຍວິດີໂອໃນຫ້ອງປະຊຸມ, ການຕິດຕາມຂ່າວ ແລະ ຕອບໂຕ້ຖ້າມີຂ່າວບໍ່ມີຄວາມຈິງກ່ຽວກັບສະພາ; ສ່ວນກົມໃຫຍ່ໄອຊີທີ ປະກອບມີ 2 ກົມນ້ອຍ ມີໜ້າທີ່ໃຫ້ບໍລິການດ້ານໄອຊີທີ ແລະ ພັດທະນາໄອຊີທີ. ຫລັງຈາກນັ້ນ, ກົມທີ່ກ່ຽວຂ້ອງໃນ 2 ຫົວຂໍ້ ກໍໄດ້ລາຍງານລົງເລິກຕື່ມອີກ.

ຈາກນັ້ນ, ທ່ານ ນາງ ສວນສະຫວັນ ວິຍະເກດ ຫົວໜ້າຄະນະຜູ້ແທນຝ່າຍລາວ ໄດ້ມີຄໍາເຫັນວ່າ:         ການມາຢ້ຽມຢາມ ແລະ ເຮັດວຽກ ຂອງຄະນະໃນຄັ້ງນີ້ ເປັນການສືບຕໍ່ຈັດຕັ້ງຜັນຂະຫຍາຍເນື້ອໃນບົດບັນທຶກຄວາມເຂົ້າໃຈ ວ່າດ້ວຍການຮ່ວມມືລະຫວ່າງສອງປະທານສະພາແຫ່ງຊາດລາວ ແລະ ກຳປູເຈຍ ເຊິ່ງໄດ້ລົງນາມຮ່ວມກັນໃນວັນທີ 14 ມັງກອນ 2019 ທັງເປັນການແລກປ່ຽນບົດຮຽນກ່ຽວກັບການປະຕິບັດພາລະບົດບາດໃນການເປັນເສນາທິການໃຫ້ແກ່ສະພາແຫ່ງຊາດ ເຊິ່ງກັນ ແລະ ກັນ ເພື່ອປະກອບສ່ວນຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີຊ່ວຍເຫລືອເຊິ່ງກັນ ແລະ ກັນ ແລະ ການຮ່ວມມືຖານບ້ານໃກ້ເຮືອນຄຽງທີ່ມີມູນເຊື້ອອັນດີງາມມາແຕ່ບູຮານນະການ ລະຫວ່າງ ສປປລາວ ແລະ ຣາຊະອານາຈັກກໍາປູເຈຍ ເວົ້າລວມ, ເວົ້າສະເພາະແມ່ນການເສີມຂະຫຍາຍສາຍພົວພັນ ແລະການຮ່ວມມື ລະຫວ່າງສອງສະພາແຫ່ງຊາດ ໃຫ້ສືບຕໍ່ຂະຫຍາຍຕົວ ແລະ ເຂົ້າສູ່ລວງເລິກ.

        ທ່ານເລຂາທິການສະພາແຫ່ງຊາດລາວ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ທີ່ເປັນມູນເຊື້ອ ລະຫວ່າງສອງປະເທດລາວ-ກໍາປູເຈຍເວົ້າລວມ, ເວົ້າສະເພາະແມ່ນສອງສະພາແຫ່ງ​ຊາດ ກໍຄືສອງຄະນະເລຂາທິການ ທີ່ເຫັນວ່ານັບມື້ນັບໄດ້ຮັບການເສີມຂະຫຍາຍຍິ່ງຂຶ້ນ ແລະ ກ່າວເຂົ້າສູ່ລວງເລິກ ເຊິ່ງສະແດງອອກ ຄະນະເລຂາທິການຂອງສອງສະພາແຫ່ງຊາດ ໄດ້ເອົາໃຈໃສ່ປະກອບສ່ວນ ແລະ ສ້າງສິ່ງອຳນວຍຄວາມສະດວກຮອບດ້ານ ໃຫ້ແກ່ການ​ຈັດ​ຕັ້ງ​ປະ​ຕິ​ບັດບົດ​ບັນ​ທຶກ​ຄວາມ​ເຂົ້າ​ໃຈວ່າດ້ວຍການຮ່ວມມື (MOU) ລະຫວ່າງປະທານສະພາແຫ່ງຊາດລາວ ແລະ ປະທານສະພາແຫ່ງຊາດກໍາປູເຈຍ ທີ່ໄດ້ລົງນາມຮ່ວມກັນໃນ ເດືອນມັງກອນ 2019 ແລະ ໄດ້ຮັບຜົນສຳເລັດຫລາຍ​ດ້ານ ເປັນ​ຕົ້ນ​ແມ່ນສອງ​ສະ​ພາ​ພວກ​ເຮົາ ​ໄດ້​ແລກ​ປ່ຽນ​ຄະ​ນະ​ຜູ້​ແທນ​ລະ​ດັບ​ປະ​ທານ​ສະ​ພາ​ແຫ່ງ​ຊາດ, ລະ​ດັບ​ປະ​ທານ​ກໍາມາ​ທິ​ການ, ຮອງ​ປະ​ທານ​ກໍາ​ມາ​ທິ​ການ, ເລ​ຂາ​ທິ​ການ ຈົນ​ຮອດ​ລະ​ດັບ​ວິ​ຊາ​ການ, ພ້ອມກັນ​ແລກ​ປ່ຽນ​ບົດ​ຮຽນ ແລະ ຂໍ້​ມູນ​ນໍາ​ກັນ ໂດຍສະເພາະແມ່ນ ການເປັນເຈົ້າພາບຈັດກອງປະຊຸມ ອາແຊັບ-7 ທີ່ສະພາແຫ່ງຊາດລາວ ເປັນເຈົ້າພາບຈັດຂຶ້ນ, ມີ​ການຊ່ວຍເຫລືອ ແລະ ​ສະ​ໜັບ​ສະ​ໜູນ​ເຊິ່ງ​ກັນ ແລະ ກັນ​ໃນ​ເວ​ທີ​ລັດ​ຖະ​ສະ​ພາ​ພາກ​ພື້ນ ແລະ ສາ​ກົນ ໂດຍ​ຜ່ານ​ການ​ແລກ​ປ່ຽນ​ທັດ​ສະ​ນະນຳກັນ. ນອກຈາກນີ້, ຄະນະເລຂາທິການ​ພວກ​ເຮົາ ໄດ້ປະກອບສ່ວນຊຸກຍູ້ໃຫ້​ສອງ​ລັດ​ຖະ​ບານ ​ຂອງ​ສອງ​ປະ​ເທດ ໃນການ​ຈັດ​ຕັ້ງ​ປະ​ຕິ​ບັດ​ບັນ​ດາ​ສັນ​ຍາ, ສົນ​ທິ​ສັນ​ຍາ, ຂໍ້​ຕົກ​ລົງ​ ແລະ ນິ​ຕິ​ກໍາ​ອື່ນໆ ​ທີ່​ສອງ​ຝ່າຍ​ໄດ້​ລົງ​ນາມ​ຮ່ວມ​ກັນ. ຜົນສຳເລັດໃນການຮ່ວມມື ຂອງສອງຄະນະເລຂາທິການ ຈະຕ້ອງໄດ້ສຶບຕໍ່ຮັກສາມູນເຊື້ອໄວ້ຕໍ່ໄປ, ແຕ່ແນວໃດກໍຕາມ, ຄະນະເລຂາທິການພວກເຮົາ ຈະຕ້ອງເພີ່ມທະວີການພົວພັນປະສານກັນຕື່ມ ເພື່ອສືບຕໍ່ເປັນເສນາທິການຮອບດ້ານ ໃຫ້ແກ່ສະພາແຫ່ງຊາດຂອງສອງປະເທດ ໂດຍສືບຕໍ່ຮ່ວມມືກັນໃນການສ້າງເງື່ອນໄຂອຳນວຍຄວາມສະດວກ ໃນການເຄື່ອນໄຫວວຽກງານນຳກັນ ໃຫ້ມີປະສິດທິຜົນກວ່າເກົ່າ ແລະ ມີຮູບປະທຳຫລາຍຂຶ້ນກວ່າເກົ່າ.