ຮຽບຮຽງຄືນ ກົດໝາຍວ່າດ້ວການຄຸ້ມຄອງໄພພິບັດ

23/08/2019 00:00 -

(ສພຊ) ເພື່ອເຮັດໃຫ້ວຽກງານການຄຸ້ມຄອງໄພພິບັດ ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ, ປະສິດທິຜົນ, ຮັບປະກັນການສະໜອງຂໍ້ມູນ-ຂ່າວສານ ວ່ອງໄວ, ຈະແຈ້ງ ແນໃສ່ເຝົ້າລະວັງ, ຫລຸດຜ່ອນຜົນກະທົບທີ່ເກີດຈາກໄພພິບັດ ເຊິ່ງພາກສ່ວນທີ່ກ່ຽວຂ້ອງ ເຫັນໄດ້ຄວາມສຳຄັນ ແລະ ຄວາມຈຳເປັນທີ່ຈະຕ້ອງໄດ້ມີກົດໝາຍສະບັບນີ້ອອກມາຄຸ້ມຄອງວຽກງານດັ່ງກ່າວ.

ສະນັ້ນ, ລະຫວ່າງວັນທີ 15-16 ກໍລະກົດ 2018 ທີ່ເມືອງແກ້ວອຸດົມ ແຂວງວຽງຈັນ ສະພາແຫ່ງຊາດ ຮ່ວມກັບກະຊວງແຮງງານ ແລະ ສະຫວັດດີການສັງຄົມ ໄດ້ຈັດກອງປະຊຸມຮຽບຮຽງຄືນກົດໝາຍວ່າດ້ວຍການຄຸ້ມຄອງໄພພິບັດ ທີ່ໄດ້ຜ່ານການປະກອບຄໍາເຫັນ ແລະ ຮັບຮອງເອົາໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ໂດຍການເປັນປະທານຂອງທ່ານ ສົມພູ ດວງສະຫວັນ ປະທານກໍາມາທິການວັດທະນະທຳ-ສັງຄົມ; ເຂົ້າຮ່ວມມີຮອງປະທານກໍາມາທິການວັດທະນະທໍາ-ສັງຄົມ, ຮອງປະທານກໍາມາທິການກົດໝາຍ, ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ຜູ້ຕາງໜ້າຈາກຫ້ອງວ່າການປະທານປະເທດ, ຫ້ອງວ່າການສໍານັກງານນາຍົກລັດຖະມົນຕີ, ກະຊວງຍຸຕິທໍາ, ຫົວໜ້າ-ຮອງຫົວໜ້າກົມ,  ພະນັກງານບຳນານ, ລັດຖະ ກອນວິຊາການຂອງສະພາແຫ່ງຊາດ ແລະ ກະຊວງແຮງງານ ແລະ ສະຫວັດດີການສັງຄົມ ຈໍານວນໜຶ່ງ.

           ກອງປະຊຸມຄັ້ງນີ້ ແມ່ນໄດ້ນໍາເອົາຄໍາຄິດເຫັນຂອງບັນດາທ່ານສະມາຊິກສະພາແຫ່ງຊາດ ມາຄົ້ນຄວ້າ, ປຶກສາຫາລື ເພື່ອຮຽບຮຽງຄືນໃສ່ເນື້ອໃນຂອງກົດໝາຍສະບັບດັ່ງກ່າວ ໃຫ້ມີຄວາມສົມບູນ ເພື່ອລາຍງານຕໍ່ຄະນະປະຈຳສະພາແຫ່ງຊາດ ກ່ອນສະເໜີປະທານສະພາແຫ່ງຊາດ ລົງລາຍເຊັນ ແລະ ນຳສະເໜີໃຫ້ປະທານປະເທດ ອອກລັດຖະດໍາລັດປະກາດໃຊ້.

 

(ກົມໂຄສະນາ ແລະ ຕີຄວາມໝາຍກົດໝາຍ)