ກສຜງ  ແລກປ່ຽນບົດຮຽນກ່ຽວກັບ ກົດໝາຍ ແລະ ນິຕິກຳໃຕ້ກົດໝາຍ

07/08/2019 00:00 -

(ສພຊ) ລະຫວ່າງວັນທີ 29-30 ກໍລະກົດ 2019, ຢູ່ທີ່ນະຄອນຮ່າລອງ ແຂວງ ກວາງນິງ ສສ.ຫວຽດນາມ, ກຳມາທິການແຜນການ, ການເງິນ ແລະ ການກວດສອບ (ກສຜງ) ສະພາແຫ່ງຊາດລາວ ​​ແລະ​ ກຳມາທິການ ການເງິນ-ງົບປະມານ ສະພາແຫ່ງຊາດ ສສ.ຫວຽດນາມ ໄດ້ຈັດກອງປະຊຸມສຳມະນາວິທະຍາສາດ ແລກປ່ຽນບົດຮຽນ ກ່ຽວກັບກົດໝາຍ ແລະ ນິຕິກຳໃຕ້ກົດໝາຍ ໃນຂົງເຂດການເງິນ-ງົບປະມານ  ໂດຍການເປັນປະທານຮ່ວມຂອງທ່ານ ວິໄລວົງ ບຸດດາຄຳ ປະທານ ກຜງສ ສະພາແຫ່ງຊາດລາວ ​ແລະ ທ່ານ ຫງຽນ ດຶກ ຮາຍ ປະທານກຳມາທິການ ການເງິນ-ງົບປະມານ ສະພາແຫ່ງຊາດ ສສ.ຫວຽດນາມ.

ກອງປະຊຸມສຳມະນາແລກປ່ຽນບົດຮຽນ ລະຫວ່າງສອງກຳມາ​ທິການ​ໃນ​ຄັ້ງນີ້​ໄດ້ດຳເນີນເປັນເວລາ 2 ວັນ  ເ​ຊິ່ງແມ່ນ​ການ​ເສີມ​ຂະຫຍາຍມູນເຊື້ອ​ການພົວພັນຮ່ວມມື ຂອງສອງສະພາແຫ່ງຊາດ ຂອງສອງປະເທດ ພ້ອມທັງ​ເປັນ​ການສ້າງເງື່ອນ ໄຂ ແລະ ກາລະໂອກາດ ໃຫ້ບັນດາສະມາຊິກສະພາແຫ່ງຊາດລາວ ແລະ ຫວຽດນາມ, ບັນ​ດາ​ກຳມະການ ​ແລະ ພະນັກງານ ວິຊາການ ຂອງສອງກຳມາທິການ ໄດ້ພົບປະກັນ ແລະ ແລກປ່ຽນບົດຮຽນ, ປະສົບການນຳກັນ ຢ່າງ​ເປັນປົກກະຕິ​ ໂດຍສະເພາະການແລກປ່ຽນບົດຮຽນໃນການຈັດຕັ້ງປະຕິບັດພາລະບົດບາດດ້ານນິຕິບັນຍັດ ໃນຫົວຂໍ້: ວິທີ​ການ ​ແລະ ຫລັກການ​ລວມການ​ສ້າງ ​ແລະ​ ປັບປຸງ​ກົດໝາຍ ​ແລະ ​ນິຕິ​ກໍາໃຕ້​ກົດໝາຍ​ໃນ​ຂົງ​ເຂດ​ຂອງ​ກຳມາ​ທິການ​ການ​ເງິນ​ ​ແລະ ງົບປະມານ  ຢູ່​ຂັ້ນສູນ​ກາງ ​ແລະ ​ທ້ອງ​ຖິ່ນ ຂອງ ສສ.ຫວຽດນາມ; ກົນ​ໄກ​ປະສານ​ງານ ​ແລະ​ ກຳນົດໝາຍ​ການ​ສ້າງ​ແຜນ-ການຈັດ​ແບ່ງ​ງົບປ​ະມານ ​ແລະ​ ການ​ຕິດຕາມ​ກວດກາບັນ​ດາ​ກົດໝາຍ​ທີ່ຖືກ​ຮັບຮອງ ​ແລະ​ ກຽມ​ນຳ​ສະ​ເໜີ​ໃນ​ກອງ​ປະຊຸມສະພາ​ແຫ່ງ​ຊາດຄື: ກົດໝາຍວ່າ​ດ້ວຍ​ການ​ຄຸ້ມ​ຄອງ​ສ່ວຍ​ສາ​ອາກອນ, ອາກອນ​ລາຍ​ໄດ້,​ ​ອາກອນ​ຊົ​ມ​ໃຊ້, ຫລັກ​ຊັບ, ປະກັນ​ໄພ ​ແລະ​ພາສີ ​ແລະ​ບັນຫາ​ອື່ນໆ.

ກອງປະຊຸມຄັ້ງນີ້​ ໄດ້ດຳ​ເນີນ​ໄປຢ່າງ​ຟົດຟື້ນ ມີ​ບັນຍາກາດ​ຖານ​ອ້າຍ​ນ້ອງ ກຳມາ​ທິການ​ການ​ເງິນ​ ​ແລະ​ ງົບປະມານ ສະພາ​ແຫ່ງ​ຊາດ ສສ.ຫວຽດນາມ ​ໄດ້​ຖ່າ​ຍທອດ​ບົດຮຽນ​ ​ແລະ​ ປະສົບ​ການ​ຕົວ​ຈິງກ່ຽວ​ກັບ​ການ​ສ້າງ, ການ​ປັບ​ປຸງ ​ແລະ ​ການຈັດຕັ້ງປະຕິ​ບັດກົດໝາຍ​ໃນ​ຂົງ​ເຂດ​ການ​ເງິນ-ງົບປະມານ ທັງ 11 ສະບັບ ​ໂດຍ​ໄດ້​​ເຊີນຕາງໜ້າ​ຈາກຂະ​ແໜງ​ການ​ກ່ຽວຂ້ອງ​ຂອງ ສສ.ຫວຽດນາມ ​ເຊັ່ນ: ກຳມາ​ທິການ​ກ່ຽວຂ້ອງ, ກະຊວງການ​ເງິນ, ອົງການ​ກວດ​ສອບ​ແຫ່ງລັດ ​ແລະ​ ແຂວງ​ກວາງ​ນິງ ​ແລະ​ ກວາງ​ນາມ ສະ​ເໜີ​ບົດຮຽນ​ໃຫ້​ຝ່າຍ​ລາວ ​ເປັນຕົ້ນການຫັນເປັນທັນສະໄໝ​ໃນ​ຂົງ​ເຂດ​ພາສີ-ອາກອນ ດ້ວຍການນຳໃຊ້ໃບບິນ ແລະ ເອກະສານຢັ້ງຢືນ ເອເລັກໂຕຣນິກ, ອັດ​ຕາ​ອາກອນ​ລາຍ​ໄດ້ບຸກຄົນ ແລະ ວິສາຫະກິດ​, ​ອາກອນ​ຊົມ​ໃຊ້​ສຳລັບ​ພາຫະນະ, ການຍົກເວັ້ນ ຫລື ຫລຸດຜ່ອນອັດຕາ​ພາສີ-ອາກອນ ລວມທັງມາດຕະການ ຕໍ່ຜູ້ປະຕິບັດພັນທະອາກອນ ​ແລະ ​ບັນຫາ​ອື່ນ ເຊິ່ງບັນດາບົດຮຽນດັ່ງກ່າວ ຈະເປັນປະໂຫຍດທີ່ສຸດ ໃນການນຳໄປ ປັບປຸງກົດ ໝາຍຂອງລາວ​ໃນ​ຕໍ່ໜ້າ.

ນອກຈາກ​ເຂົ້າຮ່ວມ​ກອງ​ປະຊຸມ​ສຳ​ມະ​ນາ, ຄະນະຜູ້ແທນກຳມາ​ທິການ​ແຜນ ການ , ການ​ເງິນ ​ແລະ​ ການກວດ​ສອບ ຍັງຈະ​ໄດ້​​​​ມີໂອກາດ​ເຂົ້າຢ້ຽ​ມຂໍ່ານັບທ່ານ ຟຸງ ກວກ ຫຽນ ກຳມະການ​ຄະນະ​ບໍລິຫານ​ງານ​ສູນ​ກາງ​ພັກກອມ​ມູນິດ, ຮອງ​ປະທານ​ສະພາ​ແຫ່ງ​ຊາດຫວຽດນາມ ​ແລະ ​ເຄື່ອນ​ໄຫວຢ້ຽ​ມຢາມແຂວງກວາງ​ນິງ ​ ແລະ ​ແຂວງ ​ເຫ​ງະ​ອານ ຕື່ມ​ອີກ.