ເອກອັກຄະລັດຖະທູດ ຝຮັ່ງ ຄົນໃໝ່ ຢ້ຽມຂຳນັບປະທານກຳມາທິການກົດໝາຍ

07/08/2019 00:00 -

 (ສພຊ) ວັນສຸກ 26 ກໍລະກິດ 2019 ທີ່ສະພາແຫ່ງຊາດ, ທ່ານ ສາຍທອງ ແກ້ວດວງດີ ປະທານກໍາມາທິການກົດໝາຍ ສະພາແຫ່ງຊາດ ໄດ້ຕ້ອນຮັບທ່ານ ນ. ຟລໍຣັອງສ ຊັອງບລັອງ-ຣິສແລກ (Frorence Jeanblanc-Risler) ເອກອັກ ຄະລັດຖະທູດ ຝຣັ່ງ ປະຈໍາ ສປປລາວ ເນື່ອງໃນໂອກາດທີ່ ຫາກໍມາດໍາລົງຕໍາແໜ່ງ ເປັນເອກອັກ ຄະລັດຖະທູດຄົນໃໝ່.

ທ່ານ ສາຍທອງ ແກ້ວດວງດີ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ໄດ້ອວຍພອນໃຫ້ທ່ານ ເອກອັກຄະລັດຖະ ທູດຝຣັ່ງ ຄົນໃໝ່ ປະຈໍາ ສປປລາວ ຈົ່ງປະສົບຜົນສໍາເລັດໃນການປະຕິບັດໜ້າທີ່ວຽກງານຂອງທ່ານ; ພ້ອມນັ້ນ ທ່ານຍັງໄດ້ ສະເໜີໃຫ້ ຊຸກຍູ້ການຮ່ວມມືແລກປ່ຽນລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດຝຣັ່ງ ຫລາຍຂຶ້ນ ໂດຍສະເພາະ ໃນຂົງເຂດກໍາມາທິການກົດໝາຍ.

ທ່ານ ນ. ຟລໍຣັອງສ ຊັອງບລັອງ-ຣິສແລກ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ເຫັນດີຕໍ່ການ ສະເໜີຂອງທ່ານປະທານກໍາມາທິການກົດໝາຍ ເຊິ່ງທ່ານເອງກໍເຫັນວ່າການຄຸ້ມຄອງລັດດ້ວຍກົດໝາຍ ແມ່ນມີຄວາມ ທ້າທາຍພໍສົມຄວນ ໂດຍສະເພາະແມ່ນການໂຄສະນາເຜີຍແຜ່ກົດໝາຍ ແລະ ການປຸກລະດົມໃຫ້ ທຸກພາກສ່ວນໃນສັງຄົມ ປະຕິບັດກົດໝາຍຢ່າງເຂັ້ມງວດ.