ກອງປະຊຸມຄົບຄະນະບໍລິຫານງານ ສະມາຄົມມິດຕະພາບ ລາວ-ຫວຽດນາມ ທົ່ວປະເທດ

01/08/2019 00:00 -

(ສພຊ) ໃນວັນທີ 5 ກໍລະກົດ 2019 ທີ່ຫ້ອງວ່າການແຂວງເຊກອງ ໄດ້ຈັດກອງປະຊຸມສາມັນຄົບຄະນະ ບໍລິຫານງານສະມາຄົມມິດຕະພາບລາວ-ຫວຽດນາມທົ່ວປະເທດ ໂດຍການເປັນປະທານຂອງສະຫາຍ ວິໄລວົງ ບຸດດາຄໍາ ກໍາມະການສູນກາງພັກ, ປະທານກໍາມາທິການແຜນການ, ການເງິນ ແລະ ກວດ ສອບ ສະພາແຫ່ງຊາດ, ປະທານສະມາຄົມມິດຕະພາບລາວ-ຫວຽດນາມຂັ້ນສູນກາງ; ເຂົ້າຮ່ວມມີສະ ຫາຍ ຄໍາເຜີຍ ບຸດດາວຽງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ, ສະຫາຍ ສົມສີ ບຸນຄຸ້ມ ຮອງຫົວໜ້າຄະນະພົວພັນຕ່າງປະເທດສູນກາງພັກ, ມີບັນດາສະຫາຍປະທານສະມາ ຄົມມິດຕະພາບ ລາວ-ຫວຽດນາມ ແລະ ພະແນກການຕ່າງປະເທດ ແລະ ບັນດາສະຫາຍກໍາມະການ ສະມາຄົມມິດຕະພາບ ລາວ-ຫວຽດນາມ ຂັ້ນສູນກາງເຂົ້າຮ່ວມ.ກອງປະຊຸມຄັ້ງນີ້ ແມ່ນເພື່ອຕີລາຄາ ຄືນຮອບດ້ານການຈັດຕັ້ງປະຕິບັດວຽກງານ ຂອງສະມາຄົມມິດຕະພາບ ລາວ-ຫວຽດນາມ ໃນໄລຍະ 2 ປີຜ່ານມາ (2016-2018) ແລະ ກໍານົດທິດທາງ, ແຜນການໃນຊຸມປີຕໍ່ໜ້າ (2019-2021).   ໃນໄລຍະຜ່ານມາສະມາຄົມມິດຕະພາບລາວ-ຫວຽດນາມ ໄດ້ເອົາໃຈໃສ່ເຄື່ອນໄຫວ ຕາມພາລະບົດ ບາດ, ສິດ ແລະ ໜ້າທີ່ໃນການເຮັດວຽກງານການທູດປະຊາຊົນ ໂດຍສະເພາະເຮັດໜ້າທີ່ເປັນຂົວຕໍ່ ທີ່ດີໃນການຊຸກຍູ້ພົວພັນດ້ານລັດໃຫ້ມີປະສິດທິພາບ ແລະ ປະສິດທິຜົນຍິ່ງຂຶ້ນ, ເອົາໃຈໃສ່ສຶກສາອົບ ຮົມໃຫ້ຊາວໜຸ່ມຂອງສອງປະເທດລາວ ແລະ ຫວຽດນາມໃຫ້ຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ສາຍ ພົວພັນອັນພິເສດທີ່ຫາຍາກ ໃນການພົວພັນສາກົນຂອງສອງຊາດ ລາວ-ຫວຽດນາມ, ໂດຍສະເພາະ ໃຫ້ເຫັນໄດ້ການເສຍສະຫລະອັນໃຫຍ່ຫລວງ ຂອງການນໍາຮຸ່ນກ່ອນ ຕໍ່ການເສີມຂະຫຍາຍສາຍພົວ ພັນແບບພິເສດ, ບໍລິສຸດຜຸດຜ່ອງລະຫວ່າງສອງປະເທດ ເພື່ອພ້ອມກັນປົກປັກຮັກສາ ແລະ ເສີມຂະ ຫຍາຍໃຫ້ແຕກດອກອອກຜົນເລື້ອຍໆໄປ. ສະມາຄົມມິດຕະພາບ ລາວ-ຫວຽດນາມ ໄດ້ເຄື່ອນໄຫວ ຢ່າງມີຜົນສໍາເລັດໃນຫລາຍດ້ານ ອັນພົ້ນເດັ່ນແມ່ນການຈັດກິດຈະກໍາທີ່ເປັນປະຫວັດສາດ ເຊັ່ນ: ກິດຈະກໍາເດີນຕາມຮອຍປະທານ ໂຮ່ຈີ່ມິງ ແລະ ປະທານ ໄກສອນ ພົມວິຫານ, ງານບຸນມະໂຫລານ ລາວ-ຫວຽດນາມ, ງານແຂ່ງຂັນກິລາມິດຕະພາບ, ສ້າງເຮືອນມິດຕະພາບ ລາວ-ຫວຽດນາມ; ບັນດາກິດຈະກໍາເຫລົ່ານັ້ນ ເປັນການປະກອບສ່ວນໃນການປົກປັກຮັກສາ ແລະ ເພີ່ມພູນຄູນ ສ້າງສາຍພົວພັນມິດຕະພາບ ທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໃຫ້ນັບມື້ໄດ້ຮັບການເສີມ ຂະຫຍາຍທັງລວງກວ້າງ ແລະ ລວງເລິກ.

          ກອງປະຊຸມສາມັນຄົບຄະນະບໍລິຫານງານສະມາຄົມມິດຕະພາບ ລາວ-ຫວຽດນາມ ທົ່ວປະເທດ ໄດ້ດໍາເນີນໄປດ້ວຍບັນຍາກາດຟົດຟື້ນ, ບັນດາຜູ້ແທນກອງປະຊຸມໄດ້ຜັດ ປ່ຽນກັນປະກອບຄໍາເຫັນ ໃສ່ຮ່າງບົດລາຍງານ ຢ່າງກົງໄປກົງມາ ແລະ ມີຄວາມຮັບຜິດຊອບສູງ ເປັນຕົ້ນແມ່ນປະກອບຄໍາເຫັນ ໃສ່ບັນດາກິດຈະກໍາ, ທິດທາງແຜນການ ເພື່ອກະກຽມສະເຫລີມສະຫລອງວັນສໍາຄັນຕ່າງໆ ຂອງສອງ ຊາດທີ່ຈະມາເຖິງນີ້.

(ສອນສັກ ວັນວິໄຊ)