ພົບປະສອງຝ່າຍ ຄລສ ລາວ-ໄທ

01/08/2019 00:00 -

(ສພຊ) ຕອນເຊົ້າວັນທີ 2 ກໍລະກົດ 2019, ສະພາແຫ່ງຊາດ (ສພຊ) ໄດ້ຈັດກອງປະຊຸມພົບ ປະສອງຝ່າຍ ລາວ-ໄທ ທີ່ຫ້ອງປະຊຸມຄະນະປະຈໍາສະພາແຫ່ງຊາດນະຄອນຫລວງວຽງຈັນ ລະຫວ່າງ ຄະນະເລຂາທິການສະພາແຫ່ງຊາດ (ຄລສ) ລາວ ແລະ ຄະນະຜູ້ແທນຂອງສໍານັກງານ ເລຂາທິການ ສະພາຜູ້ແທນລາຊດອນ ແຫ່ງ ຣາຊະອານາຈັກໄທ; ຝ່າຍລາວນໍາໂດຍທ່ານ ສຸບັນ ສະວະບຸດ ຮອງເລຂາທິການສະພາແຫ່ງຊາດ ແລະ ຝ່າຍໄທນໍາໂດຍທ່ານ ນາງ ສຸພາສີນີ ຂະມະສູນທອນ ຮອງເລຂາທິການສະພາຜູ້ແທນຣາຊະດອນໄທ ໂດຍມີຄະຜູ້ແທນທັງສອງຝ່າຍເຂົ້າຮ່ວມ. ໂອກາດດັ່ງກ່າວ ທ່ານ ສຸບັນ ສະວະບຸດ ໄດ້ກ່າວສະແດງຄວາມຍິນດີຕ້ອນຮັບຢ່າງຈິງໃຈຕໍ່ທ່ານ ນາງ ສຸພາສີນີ ຂະມະສູນທອນ ພ້ອມດ້ວຍຄະນະ ທີ່ເດີນທາງມາຢ້ຽມຢາມ ຄະນະເລຂາທິການສະພາແຫ່ງ ຊາດ ແຫ່ງ ສປປລາວ ໃນຄັ້ງນີ້ ພ້ອມທັງຕີລາຄາສູງຕໍ່ການຢ້ຽມຢາມຂອງຄະນະນໍາ ສໍານັກງານເລຂາ ທິການສະພາຜູ້ແທນຣາຊະດອນຂອງ ຣາຊະອານາຈັກໄທ ເຊິ່ງເປັນການຈັດຕັ້ງຜັນຂະຫຍາຍ ຜົນສໍາເລັດຂອງການຢ້ຽມຢາມຢ່າງເປັນທາງການ ຂອງຄະນະຜູ້ແທນຂັ້ນສູງສະພາແຫ່ງຊາດ ແຫ່ງ ສປປລາວ ເຊິ່ງນໍາພາໂດຍທ່ານ ປະທານສະພາແຫ່ງຊາດ ໂດຍການຕ້ອນຮັບຂອງທ່ານປະທານສະພາ ນິຕິບັນຍັດແຫ່ງຊາດ ແຫ່ງ ຣາຊະອານາຈັກໄທ ໃນວັນທີ 1 ມິຖຸນາ  2018 ຜ່ານມານັ້ນ ການນໍາ ຂັ້ນສູງຂອງສອງຝ່າຍ ໄດ້ມີຄໍາເຫັນເປັນເອກະພາບກັນ ໃນການສ້າງເງື່ອນໄຂໃຫ້ຄະນະເລຂາທິການ ສະພາແຫ່ງຊາດ ແຫ່ງ ສປປລາວ ແລະ ສໍານັກງານເລຂາທິການສະພາຜູ້ແທນຣາຊະດອນ ແຫ່ງຣາ ຊະອານາຈັກໄທ ສືບຕໍ່ພົບປະ ແລະ ແລກປ່ຽນບົດຮຽນດ້ານຕ່າງໆຮ່ວມກັນ. ທ່ານຮອງເລຂາທິການ ສະພາ ແຫ່ງຊາດລາວ ຍັງໄດ້ສະແດງຄວາມຊົມເຊີຍຕໍ່ສະພາຜູ້ແທນຣາຊະດອນ ແຫ່ງ ຣາຊະອານາ ຈັກໄທ ທີ່ໄດ້ສໍາເລັດການເລືອກຕັ້ງ, ດໍາເນີນກອງປະຊຸມສະພາຜູ້ແທນຣາຊະດອນ ເພື່ອເລືອກຕັ້ງ ປະທານສະພາຜູ້ແທນຣາຊະດອນ, ເລືອກຕັ້ງນາຍົກລັດຖະມົນຕີ ດ້ວຍຜົນສໍາເລັດເປັນຢ່າງດີ ພ້ອມ ທັງລາຍງານກ່ຽວກັບສະພາແຫ່ງຊາດ, ກົງຈັກການຈັດຕັ້ງ, ສິດ, ພາລະບົດບາດ ຂອງສະພາແຫ່ງຊາດ ແລະ ຄະນະເລຂາທິການສະພາແຫ່ງຊາດ ແຫ່ງ ສປປລາວ ໂດຍສັງເຂບ ທ່ານຮອງເລຂາທິການສະພາ ແຫ່ງຊາດລາວ ຍັງໄດ້ສະເໜີຕໍ່ກອງປະຊຸມພົບປະວ່າ: ໃຫ້ມີການສືບຕໍ່ຮ່ວມມືໃຫ້ເຂົ້າສູ່ລວງເລິກ; ສືບຕໍ່ຢ້ຽມຢາມແລກປ່ຽນຄະນະຜູ້ແທນ ເພື່ອສ້າງຄວາມເຂັ້ມແຂງໃຫ້ແກ່ສອງສະພາລາວ-ໄທ; ແລກ ປ່ຽນຂໍ້ມູນ-ຂ່າວສານ, ສ້າງບຸກຄະລາກອນໃນການສ້າງ ແລະ ປັບປຸງກົດໝາຍ ແລະ ບັນຫາອື່ນໆ ທີ່ສອງສະພາແຫ່ງຊາດລາວ-ໄທຄວນຊຸກຍູ້ຕາມສິດ, ໜ້າທີ່ ແລະ ພາລະບົດບາດ ຂອງສະພາແຫ່ງ ຊາດ. ໃນໂອກາດດຽວກັນ, ທ່ານ ນາງ ສຸພາສີນີ ຂະມະສູນທອນ ກໍໄດ້ກ່າວສະແດງຄວາມຂອບອົກ ຂອບໃຈ ຕໍ່ທ່ານ ສຸບັນ ສະວະບຸດ ທີ່ໄດ້ໃຫ້ກຽດຕ້ອນຮັບອັນອົບອຸ່ນ ແລະ ໄດ້ລາຍງານໂດຍຫຍໍ້ກ່ຽວ ກັບສະພາຜູ້ແທນຣາຊະດອນໄທ ພ້ອມທັງຈະນໍາເອົາຂໍ້ສະເໜີດັ່ງກ່າວ ໄປຄົ້ນຄວ້າພິຈາລະນາໃຫ້ ການຮ່ວມມື ຈາກນັ້ນ, ຄະນະຜູ້ແທນທັງສອງຝ່າຍກໍໄດ້ໂອ້ລົມ ສົນທະນາຕໍ່ບັນຫາທີ່ຕົນເອງໃຫ້ຄວາມ ສົນໃຈ ເປັນຕົ້ນແມ່ນການສ້າງ ແລະ ປັບປຸງກົດໝາຍ, ການສ້າງຄວາມເຂັ້ມແຂງໃຫ້ບຸກຄະລາ ກອນທີ່ເປັນເສນາທິການໃຫ້ສະພາແຫ່ງຊາດ, ການໃຫ້ຄວາມສໍາຄັນປະຊາຄົມອາຊຽນ ຫລື ກົດໝາຍກ່ຽວກັບອາຊຽນ ແລະ ການຮ່ວມມືກັບພາກພື້ນ ແລະ ສະເໜີໃຫ້ມີການຮ່ວມມືແລກປ່ຽນ ພະນັກງານ ລັດຖະກອນລະຫວ່າງສອງສະພາແຫ່ງຊາດ ໂດຍສະເພາະພະນັກງານຮັບຜິດຊອບ ຂໍ້ມູນ-ຂ່າວສານ, ນັກຂ່າວວິທະຍຸ, ໂທລະພາບ ແລະ ໜັງສືພິມ ທັງສອງສະພາແຫ່ງຊາດ ນອກນັ້ນ, ຄະນະທັງສອງຝ່າຍ ຍັງໄດ້ທ່ຽວຊົມຫ້ອງສະໝຸດຂອງສະພາແຫ່ງຊາດລາວ.

(ສອນສັກ ວັນວິໄຊ)