13/05/2019 00:00 -

(ສພຊ)​ເອກະສານ​​ແມ່ນຂໍ້​ມູນຂ່າວສານທີ່​ສ່ອງ​ແສງ​ເຖິງ​ເຫດການ ​ແລະປາກົດການ​ຕ່າງໆທີ່​ສ້າງ​ຂຶ້ນ​ໃນ​ຂະ​ບວນການ​ເຄື່ອນ​ໄຫວ​ຂອງ​ອົງການ​ຈັດ​ຕັ້ງ​ພັກ-​ລັດ, ນິຕິບຸກຄົນແລະບຸກຄົນ ​ເພື່ອ​ເປັນ​ເຄື່ອງມື ​ແລະພາຫະນະ ​ໃນ​ການ​ຄຸ້ມ​ຄອງ​ລັດ, ຄຸ້ມ​ຄອງ​ເສດຖະກິດ-​ສັງຄົມ, ຕິດ​ຕໍ່​ພົວພັນ​ຊຶ່ງ​ກັນແລະກັນດັ່ງ​ນັ້ນ, ຈຶ່ງ​ຈໍາ​ເປັນ​ຕ້ອງ​​ມີ​ກົດໝາຍວ່າ​ດ້ວຍ​ເອກະສານຂຶ້ນ​ມາ ​ເພື່ອ​ເຮັດ​ໃຫ້​ວຽກງານ​ເອກະ​ສານ​ເປັນ​ລະບົບ, ມີ​ປະສິດທິພາບ ​ແລະ ​ເປັນ​ເອກະ​ພາບ​ໃນ​ຂອບ​ເຂດ​ທົ່ວ​ປະ​ເທດ ​ແລະ​ເພື່ອ​ເປັນ​ການກຽມຄວາມ​ພ້ອມ​ໃນ​ດ້ານຕ່າງໆ ​ຂອງຮ່າງ​ກົດໝາຍທີ່​ຈະ​ນໍາ​ເຂົ້າ​ພິຈາລະນາ​ໃນ​ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VIII ທີ່​ຈະ​ຈັດ​ຂຶ້ນ​ໃນ​ມໍ່ໆນີ້ໃນລະຫວ່າງ​ວັນ​ທີ6-8ພຶດສະພາ 2019ທີ​ເມືອງ​ແກ້ວ​ອຸດົມ, ແຂວງວຽງຈັນກໍາມາ​ທິການກົດໝາຍ ​ແລະກໍາມາ​ທິການ​ວັດທະນະ​ທໍາ-​ສັງຄົມຮ່ວມ​ກັບກະຊວງ​ພາຍ​ໃນໄດ້ຈັດກອງປະຊຸມກວດກາເນື້ອໃນຮອບດ້ານຂອງຮ່າງກົດໝາຍວ່າດ້ວຍ​ເອກະສານຂຶ້ນໂດຍການເປັນຄະນະປະທານ​ຂອງທ່ານສາຍທອງແກ້ວ​ດວງ​ດີກໍາມະການ​ຄະນະ​ປະ​ຈໍາ​ສະພາ​ແຫ່ງ​ຊາດ, ປະທານ​ກໍາມາ​ທິການ​ກົດໝາຍ; ທ່ານສົມ​ພູດວງ​ສະຫວັນກໍາມະການ​ຄະນະ​ປະ​ຈໍາ​ສະພາ​ແຫ່ງ​ຊາດ, ປະທານ​ກໍາມາ​ທິການວັດທະນະ​ທໍາ-​ສັງຄົມເຂົ້າຮ່ວມມີບັນດາທ່ານ​ຮອງ​ປະທານ​ກໍາມາ​ທິການກົດໝາຍ,ທ່ານຮອງ​ລັດຖະມົນຕີ​ກະຊວງພາຍ​ໃນ, ບັນດາທ່ານຫົວໜ້າກົມ, ຮອງ​ຫົວໜ້າກົມ,ພະນັກງານບໍານານ ​ແລະລັດຖະກອນວິຊາ​ການທີ່ກ່ຽວຂ້ອງຈາກສະພາແຫ່ງຊາດ ແລະ  ກະຊວງພາຍ​ໃນຈໍານວນໜຶ່ງ.

​ກົດໝາຍວ່າ​ດ້ວຍ​ເອກະສານສະບັບນີ້ ​ເປັນ​ກົດໝາຍທີ່ສ້າງ​ໃໝ່ ​ຊຶ່ງປະກອບ​ມີ10 ພາກ, 16 ໝວດ ແລະ 100 ມາດຕາ.ພ້ອມ​ດຽວກັນ​ນັ້ນ, ຜູ້ເຂົ້າຮ່ວມກອງປະຊຸມຍັງໄດ້ສຸມ​ໃສ່ສະຕິ​ປັນຍາ​ເຂົ້າ​ໃນ​ການປະກອບຄໍາຄິດຄໍາເຫັນຢ່າງກົງໄປກົງມາຕໍ່ບັນດາມາດຕາເພື່ອເຮັດໃຫ້ມີເນື້ອໃນ ຊັດ​ເຈນ, ຈະ​ແຈ້ງ, ຮັດ​ກຸນ ​ແລະສອດ​ຄອງ​ກັບ​ກົດໝາຍອື່ນ​ທີ່​ກ່ຽວຂ້ອງ​ ພາຍຫຼັງສໍາເລັດການກວດກາ​ເນື້ອ​ໃນຮອບດ້ານແລ້ວ ຈະໄດ້ລາຍງານຕໍ່ກອງ​ປະຊຸມຄະນະປະຈໍາສະພາແຫ່ງຊາດ ພິຈາລະນາຕົກລົງ​ນໍາ​ສະ​ເໜີຕໍ່ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VIII ພິຈາລະນາຮັບຮອງເອົາ​.

 

(ກົມໂຄສະນາ ແລະ ຕີຄວາມໝາຍກົດໝາຍ)