23/02/2018 00:00 -

     (ສພຊ) ໃນລະຫວ່າງວັນທີ 12-16 ກຸມພາ 2018 ທີ່ສະ​ໂມ​ສອນເຮືອນພັກແຄມງື່ມ ແຂວງວຽງຈັນ, ກຳມາທິການກົດໝາຍ ສະພາ​ແຫ່ງ​ຊາດ ຮ່ວມກັບກະຊວງພາຍໃນ ໄດ້ຈັດກອງປະຊຸມກວດກາເນື້ອໃນຮອບດ້ານຮ່າງກົດໝາຍວ່າດ້ວຍທະບຽນຄອບຄົວ (ສະບັບປັບປຸງ) ​ໂດຍເປັນປະທານຮ່ວມຂອງທ່ານສາຍທອງ ແກ້ວດວງດີ ປະທານກຳມາທິການກົດໝາຍສະພາ​ແຫ່ງ​ຊາດ ແລະ ທ່ານ ສີພຸກ ວົງພັກດີ ຮອງລັດຖະມົນຕີກະຊວງພາຍໃນ; ເຂົ້າຮ່ວມມີທ່ານຮອງປະທານກຳມາທິການກົດໝາຍ,  ຜູ້​ຕາງໜ້າຈາກ ຫ້ອງວ່າການປະທານປະເທດ, ຫ້ອງວ່າການສຳນັກງານນາຍົກລັດຖະມົນຕີ, ກົມກົດໝາຍຈາກກະຊວງຍຸຕິທຳ, ຈາກກະຊວງການຕ່າງປະເທດ, ຈາກກະຊວງປ້ອງກັນຄວາມສະຫງົບ ແລະ ພະນັກງານ-ລັດຖະກອນທີ່ກ່ຽວຂ້ອງຂອງສະພາ​ແຫ່ງ​ຊາດ ແລະ ກະຊວງພາຍໃນ.

     ກົດໝາຍວ່າດ້ວຍທະບຽນຄອບຄົວສະບັບປີ 2009 ມີ VIII ພາກ 8 ໝວດ ແລະ 59 ມາດຕາ, ສຳລັບສະບັບປັບປຸງປີ 2018 ມີ VIII ພາກ 9 ໝວດ ແລະ 71 ມາດຕາ ​​​ເຊິ່ງກົດໝາຍສະບັບປັບປຸງແມ່ນມີ​ການເພີ່ມໝວດ, ມາດຕາ ແລະ ປັບປຸງເນື້ອໃນບາງມາດຕາ ເພື່ອເຮັດໃຫ້ວຽກງານທະບຽນຄອບຄົວມີຄວາມຈະ​ແຈ້ງ, ຖືກຕ້ອງ ແລະ ສະໜອງຂໍ້ມູນທີ່ເປັນລະບົບ, ຮອບດ້ານ ແລະ ຄົບຖ້ວນ; ແນໃສ່ປົກປ້ອງສິດ ແລະ ຜົນປະໂຫຍດອັນຊອບທຳຂອງພົນລະເມືອງ, ຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍຂອງສັງຄົມ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດຊາດ.

     ກອງປະຊຸມ​ຄັ້ງ​ນີ້, ຜູ້​ເຂົ້າ​ຮ່ວມ​ໄດ້​ສຸມ​​ໃສ່ປະກອບ​ຄຳ​ເຫັນ​, ກວດກາ​ດ້ານ​ເນື້ອ​ໃນ​ໃສ່​ແຕ່​ລະ​ມາດ​ຕາ ເຮັດໃຫ້ມີຄວາມລະອຽດ, ຮັດກຸມ, ເຂົ້າໃຈງ່າຍ, ສາມາດຈັດຕັ້ງປະຕິບັດໄດ້ ແລະ ສອດຄ່ອງກັບສະພາບຄວາມເປັນຈິງຂອງປະເທດຊາດ ​​ ​ແລະ ເປັນການກະກຽມຄວາມພ້ອມຮ່າງກົດໝາຍວ່າດ້ວຍທະບຽນຄອບຄົວ (ສະບັບປັບປຸງ) ທີ່ຈະນຳເຂົ້າ ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ​ພິຈາລະນາຮັບຮອງ​.