ປະທານ ກສຕສ ເຄື່ອນໄຫວຊຸກຍູ້ ແລະ ຕິດຕາມກວດກາຢູ່ 2 ແຂວງພາກກາງ

23/02/2018 00:00 -

     (ສພຊ)​ ເພື່ອຕິດຕາມກວດກາການຈັດຕັ້ງປະຕິບັດມະຕິຂອງກອງປະຊຸມສະພາແຫ່ງຊາດ ສະບັບເລກທີ 018/ສພຊ, ລົງວັນທີ 28 ພະຈິກ 2016 ວ່າດ້ວຍການຮັບຮອງເອົາແຜນການຕິດຕາມກວດກາກ່ຽວກັບການອອກນິຕິກຳລຸ່ມກົດໝາຍ ແລະ ຜົນກະທົບຈາກການນຳໃຊ້ເຄມີອັນຕະລາຍເກີນຄ່າມາດຖານຕໍ່ສິ່ງແວດລ້ອມ, ສັງຄົມ ແລະ ທຳມະຊາດຂອງຂະແໜງການທີ່ກ່ຽວຂ້ອງ ທັງສູນກາງ ແລະ ທ້ອງຖິ່ນ ທັງເພື່ອຮັບປະກັນຄວາມຖືກຕ້ອງ, ສອດຄ່ອງໃນການອອກນິຕິກຳລຸ່ມກົດໝາຍ ແລະ ນຳໃຊ້ເຂົ້າໃນການຈັດຕັ້ງປະຕິບັດວຽກງານຂອງຂະແໜງການຕ່າງໆ ທັງສູນກາງ ແລະ ທ້ອງຖິ່ນ.

ໃນລະຫວ່າງວັນທີ 12-14 ກຸມພາ 2018 ທ່ານ ບຸນປອນ ສີສຸລາດ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດມະຕິດັ່ງກ່າວ ເຊິ່ງໄດ້ຮ່ວມເຮັດວຽກກັບອຳນາດການປົກຄອງແຂວງ ແລະ ບັນດາພະແນກການອ້ອມຂ້າງແຂວງຂອງທັງ 2 ແຂວງພາກ​ກາງຄື: ຄຳມ່ວນ ແລະ ສະຫວັນນະເຂດ; ໃນນັ້ນ, ແຂວງຄຳມ່ວນແມ່ນໄດ້ລົງຕິດຕາມກວດກາ ແລະ ຊຸກຍູ້ ຢູ່ບໍລິສັດ ລາວຄາຍຢວນບໍ່ແຮ່ ຈຳກັດ ເມືອງທ່າແຂກ ແລະ ເຂດກະສິກຳບ້ານແກ້ງແປ ເມືອງເຊບັ້ງໄຟ; ສ່ວນແຂວງສະຫວັນນະເຂດ ແມ່ນຢູ່ຟາມໝູວັນທະວີໄຊ ບ້ານຫລັກ 35 ເມືອງໄຊບູລີ ແລະ ຢ້ຽມຢາມປະຊາຊົນຊາວສວນໝາກໂມ ຢູ່ບ້ານໜອງນົກຂຽນ ເມືອງສອງຄອນ.

       ໃນການລົງຕິດຕາມກວດກາ ແລະ ຊຸກຍູ້ໃນຄັ້ງນີ້, ທ່ານ ບຸນປອນ ສີສຸລາດ  ພ້ອມດ້ວຍຄະນະ ໄດ້ຮັບຟັງການລາຍງານການຈັດຕັ້ງປະຕິບັດຂອງແຂວງ; ບັນດາພະແນກກການຕ່າງໆ; ບໍລິສັດ; ຟາມ ແລະ ຢ້ຽມຢາມບັນດາຊາວສວນໝາກແຕງ ແລະ ໝາກໂມ. ພ້ອມນັ້ນ, ທ່ານ ບຸນປອນ ສີສຸລາດ ຍັງໄດ້ມີຄໍາເຫັນໂອ້ລົມ ໂດຍເນັ້ນໃຫ້ເພີ່ມທະວີເອົາໃຈໃສ່ຮັກສາສິ່ງແວດລ້ອມເພື່ອໃຫ້ຍືນຍົງ ເພາະບັນຫາດັ່ງກ່າວ ແມ່ນຕິດພັນກັບຊີວິດການເປັນຢູ່ຂອງພໍ່ແມ່ປະຊາຊົນ, ຮຽກຮ້ອງໃຫ້ມີມາດຕະການ ແລະ ວິທີການປ້ອງກັນ ເພື່ອຫລີກລ່ຽງຜົນກະທົບທາງລົບ ຕໍ່ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ກໍຄືການປົກປ້ອງສິດ ແລະ ຜົນປະໂຫຍດ, ຊີວິດ, ສຸຂະພາບ ແລະ ຊັບສິນຂອງປະຊາຊົນລາວບັນດາເຜົ່າ ທັງຮັບປະກັນໃນການຄຸ້ມຄອງການນຳເຂົ້າ ແລະ ການນຳໃຊ້ເຄມີເຂົ້າໃນທຸລະກິດ, ການບໍລິການ ແລະ ການຜະລິດຕ່າງໆ ໂດຍສະເພາະແມ່ນການນຳໃຊ້ເຄມີຢ່າງຊະຊາຍ, ເກີນຄ່າມາດຕະຖານ ແລະ ບໍ່ຖືກຕ້ອງຕາມຫລັກວິຊາການ ເຂົ້າໃນການຜະລິດກະສິກຳ ແລະ ອຸດສາຫະກຳປຸງແຕ່ງ ເຊິ່ງສົ່ງຜົນກະທົບຢ່າງຮ້າຍແຮງຕໍ່ກັບຊີວິດ, ສຸຂະພາບຂອງຄົນ, ສັດ, ພືດ, ລະບົບນິເວດ ແລະ ການພັດທະນາເສດຖະກິດ-ສັງຄົມ ທັງໄລຍະສັ້ນ ແລະ ໄລຍະຍາວ.

       ພ້ອມດຽວກັນນັ້ນ, ທ່ານປະທານ ກສຕສ ພ້ອມດ້ວຍຄະນະ ແມ່ນຈະໄດ້ສືບຕໍ່ເດີນທາງໄປແຂວງຈຳປາສັກ ເພື່ອເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດມະຕິສະບັບດັ່ງກ່າວຕື່ມອີກ.